၂၀၁၀ ရွေးကောက်ပွဲထက် ကြားဖြတ်ရွေးကောက်ပွဲကို လူထု စိတ်ဝင်စားမှုများလာ

ဖေဖေါ်ဝါရီ ၂၁၊ ၂၀၁၂ (YPI)

လာမည့်ဧပြီလ ၁ ရက်နေ့တွင် ကျင်းပမည့် ကြားဖြတ်ရွေးကောက်ပွဲကို ၂၀၁၀ ရွေးကောက်ပွဲထက် မဲဆန္ဒရှင်ပြည်သူများအနေဖြင့် ပိုမိုစိတ်ဝင်စားလျက်ရှိကြောင်း မဲဆွယ်စည်းရုံးရေး ဆင်းလျက်ရှိသော နိုင်ငံရေးပါတီများမှ ပြောရေးဆိုခွင့်ရှိသူတို့က ပြောသည်။

ဒေါ်အောင်ဆန်းစုကြည်ခေါင်းဆောင်သော အမျိုးသားဒီမိုကရေစီအဖွဲ့ချုပ် ကြားဖြတ်ရွေးကောက်ပွဲတွင် ပါဝင်လာခြင်း၊ ပြည်သူများအနေဖြင့် နိုင်ငံရေးနှင့် ပိုမိုယဉ်ပါးလာခြင်းစသော အကြောင်းများကြောင့် ကြားဖြတ်ရွေးကောက်ပွဲကို ပြည်သူများပိုမိုစိတ်ဝင်စားလာခြင်းဖြစ်ကြောင်း နိုင်ငံရေးသမားများက သုံးသပ်ပြောကြားသည်။

ယင်းကိစ္စနှင့် ပတ်သက်၍ အမျိုးသားဒီမိုကရေစီ အင်အားစုပါတီ၏ ဗဟိုအလုပ်အမှုဆောင်အဖွဲ့ အတွင်းရေးမှူး ဦးဝင်းနိုင်က “ ဒေါ်အောင်ဆန်းစုကြည်လို မြန်မာနိုင်ငံရဲ့ ဒီမိုကရေစီခေါင်းဆောင်အနေနဲ့ တတိုင်းပြည်လုံးမှာ လှည့်လည်ပြီး ဟောပြောတာဟာ ပြည်သူတွေကို ပိုမိုစိတ်ဝင်စားစေတဲ့အချက်ပါ။ အဲဒါကြောင့်လည်း ပြည်သူတွေအနေနဲ့ အကြောက်တရား လျော့ပါးလာပြီး နိုင်ငံရေးနဲ့ယဉ်ပါးလာတယ်” ဟု ပြောကြားသည်။

မွန်ဒေသလုံးဆိုင်ရာ ဒီမိုကရေစီပါတီ ဥက္ကဋ္ဌ ဦးနိုင်ငွေသိန်းကလည်း ပြည်သူများအနေဖြင့် ကြားဖြတ်ရွေးကောက်ပွဲအား ယခုကဲ့သို့ စိတ်ဝင်စားလာကြခြင်းမှာ ဒေါ်အောင်ဆန်းစုကြည် ပါဝင်လာ၍ဖြစ်ကြောင်း၊ ထိုသို့ ရွေးကောက်ပွဲအပေါ်ပြည်သူများ စိတ်ဝင်စားလာခြင်းကြောင့် နိုင်ငံရေးပါတီများမဲဆွယ်စည်းရုံးရေးပြုလုပ်ရာတွင် ပိုမိုလွယ်ကူလာပြီး ပြည်သူများဘက်မှလည်း သိလိုသည်များကို ယခင်ကနှင့်မတူ ရဲဝံ့စွာ မေးမြန်းလာကြကြောင်း ၀ိုင်ပီအိုင်သို့ပြောကြားသည်။

၎င်းက “ ခုဒေါ်အောင်ဆန်းစုကြည်ပါလာပြီဆိုတော့ ပြည်သူတွေက သူ့ကိုအထင်ကြီးတယ်။ သူကပြည်သူတွေကို လွှမ်းမိုးနိုင်တယ်။ သူပြောတာတွေ လုပ်နေတာတွေကိုကြည့်ပြီး ပြည်သူတွေကပါ ရဲဝံ့လာကြတယ်။ ” ဟု ပြောကြားသည်။

ရှမ်းတိုင်းရင်းသားများ ဒီမိုကရက်တစ်ပါတီ ၏ ဘဏ္ဍာရေးမှူးဖြစ်သည့် ဦးစောသန်းမြင့်ကလည်း ပြည်သူများအနေဖြင့် ကြားဖြတ်ရွေးကောက်ပွဲအား တရားမျှတမှုရှိမရှိစိတ်ဝင်စားလျက်ရှိပြီး၊ ၂၀၁၀ ရွေးကောက်ပွဲကဲ့သို့ မသမာမှုများ ထပ်မံဖြစ်ပေါ်ခြင်း ရှိမရှိကိုပါစောင့်ကြည့်လျက်ရှိကြောင်း ပြောကြားသည်။

“ ၂၀၁၀ တုန်းကပြည်သူတွေဘယ်လိုပဲ မဲပေးမဲပေး နောက်ဆုံး လုပ်ချင်ရာလုပ်သွားတယ်။ စနစ်လည်းပြောင်းပြီပြောနေတယ် ရွေးကောက်ပွဲကော်မရှင်ဥက္ကဋ္ဌလည်းပြောင်းသွားပါလျက်နဲ့ ၂၀၁၀ တုန်းကလိုထပ်ဖြစ်လာမလားဆိုတာကို စိတ်ဝင်စားနေကြတယ်။” ဟု ဦးစောသန်းမြင့်ကဆိုသည်။

ဒေါ်အောင်ဆန်းစုကြည်လှည်းကူးမြို့ လူထုပရိသတ်အား လက်ပြနှုတ်ဆက်နေစဉ်။

ယမန်နှစ် နှစ်လည်ပိုင်းက အမျိုးသားဒီမိုကရေစီအဖွဲ့ချုပ် ခေါင်းဆောင် ဒေါ်အောင်ဆန်းစုကြည်နှင့် နိုင်ငံတော်သမ္မတ ဦးသိန်းစိန်တို့ တွေ့ဆုံဆွေးနွေးခဲ့အပြီးတွင် နိုင်ငံရေးပါတီများ မှတ်ပုံတင်ခြင်း ဥပဒေနှင့် အမျိုးသားလွှတ်တော်၊ ပြည်သူ့လွှတ်တော် ရွေးကောက်ပွဲဥပဒေများကို ပြင်ဆင်ခဲ့သည်။

ထို့နောက်တွင် ၂၀၁၀ ရွေးကောက်ပွဲကာလက ပါတီမှတ်ပုံတင်ခြင်းမပြုဘဲ ရွေးကောက်ပွဲကို သပိတ်မှောက်ခဲ့သော အမျိုးသားဒီမိုကရေစီ အဖွဲ့ချုပ်ပါတီမှာ တရားဝင်နိုင်ငံရေးပါတီအဖြစ် ပြန်လည်မှတ်ပုံတင်ပြီး ကြားဖြတ်ရွေးကောက်ပွဲဝင်ရန် ဆုံးဖြတ်ခဲ့သည်။      ။