SNLD ပြန်လည်မှတ်ပုံတင်ရန် ဆုံးဖြတ်

SNLD ပါတီ

         နိုင်ငံရေးလုပ်ငန်းစဉ်များအား တရားဝင်လုပ်ကိုင်နိုင်ရန်အတွက် SNLD ပါတီသည် ပြန်လည်မှတ်ပုံတင်တော့မည်ဟု SNLD ပါတီဥက္ကဋ္ဌ ဦးခွန်ထွန်းဦးက ဇန်န၀ါရီ ၂၀ရက်နေ့တွင် ကျင်းပပြုလုပ်သည့် ဗဟိုကော်မတီ အစည်းအဝေးတွင် ပြောသွားသည်။

နိုင်ငံတော်သမ္မတ၏ လွတ်ငြိမ်းချမ်းသာခွင့်အမိန့်နှင့်အတူ ဇန်နဝါရီ ၁၃ရက်နေ့တွင် တောင်ငူထောင်မှ လွတ်မြောက်လာသည့် SNLD ပါတီဥက္ကဋ္ဌ ဦးခွန်ထွန်းဦးက ဇန်န၀ါရီ ၂၀ရက်နေ့တွင် ကျင်းပပြုလုပ်သည့် ဗဟိုကော်မတီ အစည်းအဝေးတွင် နိုင်ငံရေးလုပ်ငန်းစဉ်များအား တရားဝင်လုပ်ကိုင် နိုင်ရန်အတွက် SNLD သည် ပြန်လည်မှတ်ပုံတင်ရခြင်း ဖြစ်သည်ဟုဆုံးဖြတ်လိုက်သည်ဟု ပြောသွားခြင်းဖြစ်သည်။

သို့သော် ရှမ်းတိုင်းရင်းသားများ ဒီမိုကရေစီအဖွဲ့ချုပ်သည် မှတ်ပုံတင်သည့်ကိစ္စရပ်အား လာမည့်ကြား ဖြတ်ရွေးကောက်ပွဲစာရင်း ကိုယ်စားလှယ် လောင်းအမည်စာရင်း တင်သွင်းမှုများအပြီးကို စောင့်ဆိုင်းပြီးမှသာ ပြုလုပ်မည်ဟုလည်း သိရှိရသည်။

                SNLD ပါတီသည် ယခင်က ၁၉၉၀ ရွေးကောက်ပွဲတွင် အနိုင်ရ တိုင်းရင်းသားငါးပါတီ မဟာမိတ်အဖွဲ့ UNA တွင် ပါဝင်ခဲ့ပြီး ယခုတွင် ဥက္ကဋ္ဌ ဦးစိုင်းအိုက်ပေါင်း ဦးဆောင်သော ရှမ်းအမျိုးသားများ ဒီမိုကရက်တစ်ပါတီမှ (၁၈)ရက်နေ့တွင် ဦးခွန်ထွန်းဦးနေအိမ်သို့ လာရောက်ကမ်းလှမ်းမှုကိုလည်း ငြင်းဆိုလိုက်သည်ဟု သိရှိရသေးသည်။                "ကျွန်တော်တို့ဟာ လာမည့်ကြားဖြတ်ရွေးကောက်ပွဲအတွက် အချိန်မရတော့တာကြောင့် ဝင်မပြိုင်ဘူးလို့ ဆုံးဖြတ်လိုက်တာ ဖြစ်ပါတယ်။ ပြီးတော့ SNDP က ဥက္ကဋ္ဌ ဦးစိုင်းအိုက်ပေါင်းနဲ့ အဖွဲ့ကလည်း ကြားဖြတ်ရွေးကောက်ပွဲမှာ လာရှိုးမဲဆန္ဒနယ်ရဲ့ အမျိုးသား လွှတ်တော်နေရာမှာ ဝင်ပြိုင်ဖို့ ၁၈ ရက် နေ့က အိမ်ကိုလာပြီး ကမ်းလှမ်းခဲ့ပါတယ်။ ဒါပေမယ့် အခြေအနေအမျိုးမျိုးကြောင့် ကမ်းလှမ်းချက်ကို ငြင်းဆိုတယ်ဆိုတာ ၂၀ ရက်နေ့ကပဲ အထွေထွေ အတွင်းရေးမှူး ဦးစိုင်းညွန့်လွင် လက်မှတ်နဲ့ SNDP ကိုပြန်ပြီး ပို့လိုက်ခဲ့ပါတယ်" ဟု SNLD ပါတီမှ ဦးစိုင်းလိတ်က ဆိုသည်။

ထိုဆုံးဖြတ်ချက်များကို ရန်ကုန်မြို့ ကိုးမိုင်လမ်းရှိ ဦးခွန်ထွန်းဦးနေအိမ်တွင် နှစ်ရက်ကြာကျင်းပခဲ့သည့် အစည်းအဝေးတွင် ဆုံးဖြတ်ချက် ချခဲ့ခြင်းဖြစ်သည်ဟု ၎င်းမှပြောသွားခဲ့သည်။

SNLD ပါတီသည် ၁၉၉၀ ရွေးကောက်ပွဲတွင် ဒုတိယမဲအများဆုံး အနိုင်ရခဲ့သည့် ပါတီဖြစ်သည်။ သို့သော် ၎င်းတို့သည် ၂၀၁၀ရွေးကောက်ပွဲတွင် ဝင်ရောက်ယှဉ်ခဲ့ခြင်းမရှိဟုလည်း သိရသည်။

ATM

သစ်ထူးလွင်