ဒေါ်အောင်ဆန်းစုကြည်၏ မိန့်ခွန်း (မင်္ဂလာတောင်ညွန့်မြို့နယ်NLDရုံးခန်းဖွင့်ပွဲ )

ရုံးခန်းဖွင့်တယ်ဆိုတာက ပြည်သူတွေရဲ့လိုအပ်ချက်ကို သိနိုင်ဖို့။ အဲဒါသိမှပဲ ပြည်သူတွေရဲ့ လိုအပ်ချက်ကို ပြည်သူတွေရဲ့လိုအပ်ချက်ကို ဖြည့်ဆည်းပေးနိုင်မှာပါ။ အနှစ် ၂၀ ကျော်အတွင်းကျမတို့တတ်နိုင်သလောက် တော့ ပြည်သူတွေရဲ့လိုအပ်ချက်တွေကို ဖြည့်ဆည်းပေးပါတယ်။ ကျေနပ်လောက်အောင် မဟုတ်ပါဘူး။

ဒါကို ကျမ၀န်ခံပါတယ်။ ဒါပေမဲ့ အခက်အခဲအမျိုးမျိုးအကြားကနေ လုပ်နေတဲ့အခါကျတော့ ကျမတို့လည်း
မကျေနပ်ဘူး။ ပြည်သူတွေလည်း မကျေနပ်ဘူး။ ကျမတို့ထပ်ပြီးတော့ လုပ်စရာတွေလည်း အများကြီးရှိတယ်။ လုပ်ဖို့ကြိုးစားပါ့မယ်။ အခုဆိုလို့ရှိရင် ကြားဖြတ်ရွေးကောက်ပွဲမှာ မင်္ဂလာတောင်ညွှန့်မြို့ နယ်မှာ လစ်လပ်နေတဲ့အတွက်ကြောင့်မို့လို့ NLD က၀င်ပြီးတော့ အရွေးခံမှာဖြစ်ပါတယ်။

ကျမတို့ကိုယ်စားလှယ်တွေကို ဘယ်လိုရွေးသလဲဆိုတာ ကျမနည်းနည်းရှင်းပြချင်ပါတယ်။ ဘာဖြစ်လို့လဲဆိုတော့ မြို့နယ်က ပြည်သူတွေက သိပိုင်ခွင့်ရှိပါတယ်။ ဒီမြို့နယ်မှာ ဒီကိုယ်စားလှယ်ကို
ဘာဖြစ်လို့ အရွေးခံဖို့ ရွေးသလဲဆိုတာ ဘယ်လိုမူတွေနဲ့ ရွေးသလဲဆိုတာ ပြည်သူတွေမှာ သိပိုင်ခွင့်ရှိပါတယ်။ အဲဒါ ကျမ သတိပေးပါရစေ။ ဒီမိုကရေစီစနစ်မှာ ပြည်သူတွေက အားလုံးကို သိပိုခွင့်ရှိတယ်နော်။ နိုင်ငံနဲ့ပတ်သက်လို့။ ကိုယ်ရဲ့သိပိုင်ခွင့်ကိုလည်း ကိုယ်ကကာကွယ်ရမယ်။ ဘယ်လို ကာကွယ်ရမလဲဆိုတော့ ပထမဦးဆုံးကတော့  မေးခွန်းမေးတတ်ဖို့ပဲ။ တစ်ခုခုဖြစ်ရင် တစ်ခုခုကို အာဏာရှိတဲ့သူတွေ သြဇာရှိတဲ့သူတွေက လုပ်လို့ရှိရင် ဒီလိုပဲ မခံဘဲနဲ့ ဘာဖြစ်လို့ လုပ်တာလဲဆိုတာကိုတော့ သိချင်တဲ့စိတ်ရှိရမယ်။ လုပ်တဲ့အကြောင်း မှန်ရဲ့လား၊ မမှန်ဘူးလားဆိုတာ ပြည်သူတွေက သိချင်တဲ့စိတ်ရှိရမယ်။

အဲဒီစိတ်ပေါ်မှာ အခြေခံပြီးတော့  ကိုယ်ကနေပြီးတော့ ထောက်ခံသင့်တဲ့သူကို ထောက်ခံရမယ်၊ မထောက်ခံသင့်တဲ့သူကို မထောက်ခံရဘူး။ ဒီတော့ ကျမတို့က ကိုယ်စားလှယ်တွေရွေးတဲ့အခါမှာ အခြေခံအားဖြင့်တော့ ပြည်သူတွေက လေးစားမယ့်သူတွေ ပုဂ္ဂိုလ်တွေကို ကျမတို့ ရွေးရတာပေါ့။ ဒီမိုကရေစီအရေးပေါ်မှာ သစ္စာရှိခဲ့တဲ့ပုဂ္ဂိုလ်တွေ၊ ဒါ ပထမ ကျမတို့ အခြေခံပြီးတော့ ကြည့်ပါတယ်။
ဒါပေမဲ့ ဒါနဲ့တင်မကသေးပါဘူး။ ကျမတို့ရဲ့ အမျိုးသားဒီမိုကရေစီအဖွဲ့ချုပ်ထဲမှာ ဆိုလို့ရှိရင် နှစ် ၂၀ ကျော် အနစ်နာခံလုပ်ခဲ့လို့ ပြည်သူတွေက လေးစားတဲ့သူတွေရှိတယ်။ ဒီမိုကရေစီပေါ်မှာ သစ္စာထား တယ်ဆိုတာကို အနစ်နာခံချက်တွေနဲ့ သက်သေထူခဲ့တဲ့သူတွေအများကြီးရှိပါတယ်။ဒါပေမဲ့ ဒါကိုပဲကြည့်ပြီး ရွေးတာမဟုတ်ပါဘူး။

အဓိက ပြည်သူ့ကိုယ်စားလှယ်တွေရွေးတယ်ဆိုရင် ပြည်သူတွေအတွက် ဘယ်လောက်လုပ်နိုင်မလဲ။ ပြည်သူတွေရဲ့အကျိုးကို ဘယ်လောက်ထိ ဘယ်လိုနည်းနဲ့ ထမ်းဆောင်နိုင်မလဲဆိုတာကို ကြည့်ပြီးတော့ ရွေးတယ်။ ပညာအရည်အချင်းနဲ့ အလုပ်အကိုင်ကျွမ်းကျင်မှု၊ အလုပ်အကိုင်အတွေ့အကြံကို ကျမတို့ အလေးထားပါတယ်။ ပညာကလည်းရှိမယ်၊ အလုပ်အကိုင် ကျွမ်းကျင်မှုလည်းရှိမယ်၊ အလုပ်အကိုင်အတွေ့အကြုံလည်းရှိမယ်ဆိုမှ ပြည်သူတွေအတွက် လုပ်သင့်လုပ်ထိုက်တာကို လုပ်ပေးနိုင်မှာပါ။

ဘာဖြစ်လို့လဲဆိုတော့ စေတနာတခုရှိရုံနဲ့မရဘူး၊ လုပ်နိုင် ကိုင်နိုင်တဲ့ အရည်အချင်းရှိဖို့လဲလိုပါတယ်။ နောက်ပြီးတော့ အမျိုးသမီးတွေကို ဦးစားပေးရွေးမယ်လို့ ဆုံးဖြတ်ပါတယ်။ အဲဒီတော့ အမျိုးသမီးရွေးမယ်ဆိုတာက နိုင်ငံတစ်နိုင်ငံမှာ အမျိုးသမီးတ၀က်၊ အမျိုးသားတ၀က်ဆိုပါတော့။ တိတိကျကျတော့မဟုတ်ပါဘူး။ အဲဒီလို အင်အားတွေအားလုံးနိုင်မှ တိုးတက်မှုက မြန်ဆန်မယ်။ တိုးတက်မှုက တည်တည်ငြိမ်ငြိမ်ဖြစ်သွားမယ်။ ဒါကြောင့် အမျိုးသမီးတွေကို ဦးစားပေးမယ်။ နောက်ပြီးတော့ တိုင်းရင်းသူ တိုင်းရင်းသားတွေကို ဦးစားပေးမယ်။ ဒီလို ပြောတဲ့အခါမှာ ဗမာဆိုတာလည်း တိုင်းရင်းသူ၊တိုင်းရင်းသားထဲက တမျိုးပဲဆိုတာ သတိပေးချင်ပါတယ်။ တိုင်းရင်းသူ တိုင်းရင်းသားတွေလို့ ပြောတဲ့အခါကျရင် လူများစုမဟုတ်တဲ့ တိုင်းရင်းသူ တိုင်းရင်းသားတွေကို ဦးစားပေး ရမယ်။

ဒါဟာ ပြည်ထောင်စုစိတ်ဓာတ်နဲ့ လုပ်တာဖြစ်ပါတယ်။ နောက်ပြီး ကျမတို့ လူငယ်တွေကိုလည်း တတ်နိုင်သမျှ  ရှေ့တန်း ထုတ်ပါ့မယ်။ လူငယ်တွေကို နောက်ဆုံးထားတာက လူငယ်တွေကို အလေးမထား လို့မဟုတ်ပါဘူး။ ဒါပေမဲ့ ပညာတတ်တွေထဲမှာလည်း လူငယ်တွေပါသွားမယ်။ ပညာတတ်တွေ၊ အလုပ်ကျွမ်း ကျင်တဲ့သူတွေထဲမှာလည်း လူငယ်တွေပါသွားမယ်။ အမျိုးသမီးတွေထဲမှာလည်း လူငယ်တွေပါမယ်။ တိုင်းရင်းသူတိုင်းရင်းသားတွေထဲမှာလည်း လူငယ်တွေပါမယ်ဆိုတော့ လူငယ်တွေကို သက်သက်ရယ်လို့ ကျမတို့က မထားဘဲနဲ့ တတ်နိုင်သလောက်တော့ ထည့်မယ်ဆိုပြီးတော့ ကျမတို့ ဒီလို စဉ်းစားထားတာဖြစ်ပါတယ်။ ကျမတို့ မင်္ဂလာတောင်ညွှန့်အတွက် အမျိုးသားဒီမိုကရေစီအဖွဲ့ချုပ်ကိုယ်စားလှယ်လောင်းအဖြစ်နဲ့ အရွေးခံဖို့ ဒေါ်ဖြူဖြူသင်းကိုရွေးထားပါတယ်။ ဖြူဖြူကို ရွေးရတဲ့အကြောင်းကို ရှင်းပြချင်ပါတယ်။

ဖြူဖြူက အမျိုးသားဒီမိုကရေစီအဖွဲ့ချုပ်ထဲမှာ လူငယ်ကနေ စပြီးတော့ လုပ်ခဲ့တာပါ။ အမှန်ပြောရင် ကျမတို့ ရုံးမှာ သတိတောင်မှ မထားမိဘူး။ နေ့တိုင်း နေ့တိုင်း ကိုယ့်စရိတ်နဲ့ကိုယ်လာပြီးတော့ အလုပ်တွေလုပ်သွားတဲ့ လူငယ်တွေထဲက တယောက်ပါပဲ။
အေးအေးဆေးဆေး ငြိမ်ငြိမ်သက်သက်နဲ့ ဘာမှ အသံမကြားရဘဲနဲ့ အလုပ်ကိုပဲ ကျေကျေပွန်ပွန်လုပ်တဲ့ လူငယ်တွေထဲမှာ ပါပါတယ်။ ၂၀၀၁ ကျတော့ ကုလသမဂ္ဂနေပြီးတော့ HIV/AIDS နဲ့ပတ်သက်လို့ သင်တန်း တွေလုပ်ပေးပါတယ်။ လုပ်ပေးတော့ ကျမကလည်း ကျမတို့လူငယ်တွေလည်း ဒီလိုရောဂါသည်တွေကို ကူညီနိုင်ဖို့၊ ရောဂါမပျံ့ပွားဖို့ လုပ်တဲ့နေရာမှာ တက်တက်ကြွကြွနဲ့ပါဝင်စေချင်လို့ ဒီသင်တန်းကို ကျမတို့ လူငယ်အယောက် ၂၀ လွှတ်လိုက်ပါတယ်။ အယောက် ၂၀ လွှတ်တဲ့အထဲမှာ တကယ်ထူးထူးချွန်ချွန်နဲ့ အားလုံးသိလာတာကတော့ ဖြူဖြူပါပဲ။ ပါရမီလည်းပါတယ်၊ စိတ်ဓာတ်လည်းပါတယ်၊ ပြည်သူရဲ့အကျိုးကို ထမ်းဆောင်ချင်တဲ့ စေတနာလည်း ထက်သန်တာလည်းပါပါတယ်။ လုပ်နိုင်ကိုင်နိုင်တာလည်းပါပါတယ်။

စေတနာရှိပြီးတော့ မလုပ်နိုင် မကိုင်နိုင်ဆိုလို့ရှိရင် မလုပ်နိုင်မကိုင်နိုင်လို့ရှိရင် ဖြူဖြူက တကယ်ပဲ ပြည်သူ့အကျိုးထမ်းဆောင်ချင်တဲ့ စိတ်ရှိရုံမကဘူး၊ ထမ်းဆောင်နိုင်တဲ့ အရည်အချင်းရှိတယ်ဆိုတာကို သက်သေနဲ့ကို ပြနိုင်လို့ ကျမတို့ ရွေးချယ်လိုက်တာဖြစ်ပါတယ်။ ကျမတို့ရဲ့ ပြည်သူအများစုက ဆင်းရဲမှုနဲ့ ရုန်းကန်နေရတယ်ဆိုတာကို နားလည်ပါတယ်။ ဒီလိုရုန်းကန်နေရတဲ့နေရာမှာ ပြည်သူတွေရဲ့ စိတ်ဆန္ဒကို နားလည်ပြီးတော့ ပြည်သူတွေရဲ့ ဒုက္ခတွေကို တတ်နိုင်သလောက် ကျဆင်းသွားအောင်လုပ်ပေးနိုင်မယ့် ကိုယ်စားလှယ်တွေကို ကျမတို့ရွေးမှာဖြစ်ပါတယ်။

အခုရွေးကောက်ပွဲမှာဆိုလို့ရှိရင် လစ်လပ်တဲ့နေရာက ၄၈ နေရာပဲရှိပါတယ်။ တချို့ကတော့ ပြောမှာပေါ့။ ၄၈ ယောက်တည်းနဲ့ ဘာလုပ်နိုင်မှာမို့လို့လဲ။လွှတ်တော်ထဲမှာ ၄၈ ယောက်တည်းနဲ့ ဘာလုပ်နိုင်မှာမို့လို့လဲလို့  မေးတဲ့သူတွေရှိတယ်။ ကျမကတော့ ယုံကြည်ချက်ရှိတယ်။ တကယ် စိတ်ဆန္ဒရှိလို့ရှိရင် လူတယောက်တောင်မှ တိုင်းပြည်တပြည်ကို လှုပ်ရှား အောင် လုပ်နိုင်တယ်။ ကျမတို့က ကျမတို့ကိုယ်စားလှယ်တွေမှာ နှစ်ခုရှိသွားပြီ။ တခုက ကိုယ့်ကိုယ် ရွေးချယ်ပေးလိုက်တဲ့ မြို့နယ်အတွက် တာဝန်၊ နောက်တခုက တတိုင်းပြည်လုံးအတွက် တာဝန်။ နှစ်ခုစလုံးကို တပြိုင်နက် ထမ်းဆောင်သွားရမှာပါ။ နှစ်ခုစလုံးကို တပြိုင်နက် ထမ်းဆောင်နိုင်မယ့်သူမျိုး ကို ကျမတို့ရွေးတာဖြစ်ပါတယ်။ ရွေးချယ်တာတွေအားလုံးက အမြဲပဲ မှန်နိုင်မလားလို့ မေးနိုင်ပါတယ်။

မေးရမယ့် မေးခွန်းပဲ။ လုံးဝ တစ်ရာရာခိုင်နှုန်းအာမခံနိုင်ပေမယ့် ဖြူဖြူအတွက်တော့ ရဲရဲကြီး အာမခံနိုင်ပါတယ်။ ပြည်သူတွေကလည်း ကိုယ့်ကိုယ်စားလှယ်တွေကို ကိုယ်ထိန်းထားရမယ်။
မမေ့နဲ့နော် ဒီကိုယ်စားလှယ်တွေက ကိုယ်ရွေးချယ်မှ နေရာရမယ့်သူတွေ၊ ကိုယ့်လက်ထဲမှာ သူတို့ရဲ့ ကံကြမ္မာက ရှိတယ်ဆိုတာ ပြည်သူက အဲဒီလိုယုံကြည်ချက်နဲ့လုပ်ပါ။ ကိုယ်ရဲ့ ကိုယ့်ကံကြမ္မာက သူ့လက်ထဲမှာ မဟုတ်ဘူး။ သူ့ကံကြမ္မာက ကိုယ်လက်ထဲမှာဆိုတာ သိထားပါ။ ကိုယ်ဖြစ်စေချင်တဲ့ ကိုယ်စားလှယ် မျိုးဖြစ်အောင် ပြည်သူတွေက ၀ိုင်းပြီးတော့ လုပ်ပေးရမယ်။ ကိုယ်လိုချင်တဲ့ပုံစံဖြစ်အောင် ပြည်သူတွေက ၀ိုင်းပြီးတော့ ထိန်းသွားရမယ်။ ဒါ ဒီမိုကရေစီရဲ့ အရေးကြီးဆုံး အချက်တခုပဲ။

ဘာဖြစ်လို့လို့ ဒီမိုကရေစီဒီမိုကရေစီပဲလို့ပြောနေလဲဆိုတော့ နောက်ဆုံးတော့ ကိုယ့်တိုင်းပြည်ရဲ့ ကံကြမ္မာကို ဆုံးဖြတ်ဖို့က ပြည်သူတွေရဲ့ လက်ထဲမှာပဲရှိနေတယ်။ အဲဒါကြောင့်မို့လို့ ဒီမိုကရေစီစနစ်ကို လိုလားတာပါ။ ပြည်သူတွေက ကိုယ့်ကံကြမ္မာကိုယ် ဖန်တီးပိုင်ခွင့်ရှိတယ်ဆိုရင် ကိုယ်ရဲ့ ချမ်းသာမှုအတွက်ပဲလုပ်မှာပေါ့။ ဘယ်သူကမှ ကိုယ့်ကိုယ်ကိုယ် ဆင်းရဲအောင်မလုပ်ဘူး။ ဒါကြောင့်မို့လို့ ကိုယ့်ကံကြမ္မာကိုယ် ဖန်တီးနိုင် အောင်လုပ်ပေးတဲ့စနစ်ကို လက်ခံကြပါ။ အားပေးကြပါလို့ ကျမက မေတ္တာရပ်ခံချင်ပါတယ်။

၁ရက်နေ့ကျလို့ရှိရင် ရွေးကောက်ပွဲတွေလုပ်တဲ့အခါကျရင် ငါတို့ရဲ့ ပြည်သူပြည်သားတွေက ငါတို့ရဲ့ ကံကြမ္မာကို အတိုင်းအတာတခုအထိ ဆုံးဖြတ်ပိုင်ခွင့်ရပြီဆိုပြီးတော့ မဲပေးခွင့်ရှိတဲ့သူအားလုံး မဲပေးကြပါ။ မဲပေးတဲ့အခါလည်း ဖြူဖြူကိုပဲ မဲပေးကြပါ။ မဲစာရင်းမပါရင် ကျမတို့အဖွဲ့ချုပ်ကို ပြောလို့ရတယ်။ ပညာပေး အစီအစဉ်များ ပြုလုပ်မည်။ ရပိုင်ခွင့်ဆိုတာ တာဝန်အမြဲဒွန်တွဲနေတယ်ဆိုတာ သတိပေးပါရစေ။ ပြည်သူတွေမှာ မဲပေးပိုင်ခွင့်ရှိပေမယ့်လည်း ကိုယ့်မှာလည်း လုပ်ရမယ့် တာဝန်လေးတွေရှိပါတယ်။ ဒါကြောင့် ကျမတို့ ပညာပေးအစီအစဉ်တွေလည်း လုပ်ပါ့မယ်။ အားလုံးက တတ်နိုင်သမျှ ကိုယ့်မှာ တာဝန်ရှိ တယ်ဆိုပြီး မဲပေးကြပါ။ ငါတယောက် မဲပေးလို့ ဘာထူးမလဲဆိုတဲ့ စိတ်ကို မထားပါနဲ့ ။

လူတိုင်းလူတိုင်းက အရေးကြီးတယ်။ တယောက်ကစမှ တထောင်တသောင်းတသိန်းတသန်းကုဋေကုဋာဆိုတာဖြစ်နိုင်ပါတယ်။ နံပါတ်တစ်က မစဘဲနဲ့ ဟိုးကုဋကုဋာအထိမဖြစ်နိုင်ဘူး။ အဲဒီတော့ တဦးချင်းက ကိုယ့်တာဝန်ကို သိသိနဲ့ မဲပေးဖို့ ဆုံးဖြတ်ကြပါ။ မဲပေးရတယ်ဆိုတာက ဂုဏ်ယူသင့်တဲ့ကိစ္စပါ။ ငါက ငါရဲ့တာဝန်ကို ပြည်သူတယောက်ရဲ့ တာဝန်ကို ကျေပွန်တယ်ဆိုပြီး မဲထည့်လိုက်ရင် ကိုယ်မဲထည့်လိုက်တဲ့ ကိုယ်စားလှယ်က သူ့တာဝန် ကျေပွန်လား၊ မကျေပွန်လားဆိုတာ ဝေဖန်ပိုင်ခွင့်ရှိသွားပြီ။ ကိုယ်က လည်းမဲမထည့်ဘူး၊ ဂရုမစိုက်ဘူး။ ငါနဲ့ မဆိုင်ဘူး ဒီရွေးကောက်ပွဲဆိုပြီးတော့။ နောက်တော့မှ ဒီကိုယ်စားလှယ် ဘာမှ မလုပ်သေးဘူး ပြောလို့ရှိရင် တော့ တာဝန်မဲ့ စိတ်ဓာတ်ထားပဲလို့ထင်ပါတယ်။ ပြည်သူအားလုံးဆန္ဒဖြည့်ဆည်းပေးနိုင်မယ်လို့ ကတိမပေးပါဘူး။ ကြိုးစားမယ်လို့ ကတိပေးပါတယ်။ ပြည်သူကလည်း ကြိုးစားပါ။ တယောက်အပေါ် ယုံကြည်မှုနဲ့ တွဲပြီး လုပ်သွားမယ်ဆိုလို့ရှိရင် ရောက်ချင်တဲ့ ပန်းတိုင်ကို ရောက်သွားမယ်လို့ ပြောပါရစေ။


ဒေါ်အောင်ဆန်းစုကြည်ကို မင်္ဂလတောင်ညွန့်မြို့နယ် ပြည်သူ ထောင်ဂဏန်းချီက လှိုက်လှဲစွာကြိုဆိုနှုတ်ဆက်ခဲ့ ကြသည်။
 
ဒေါ်အောင်ဆန်းစုကြည်နှင့် မိန့်ခွန်းပြောနေစဉ်။
မင်္ဂလာတောင်ညွှန့်မြို့နယ်မှ ပြည်သူ့လွှတ်တော်ကိုယ်စားလှယ် အဖြစ်ဒေါ်ဖြူဖြူသင်းအရွေးချယ်ခံမည်ဖြစ်သည်။

The Voice Weekly (Facebook)