ရှမ်းတိုင်းရင်းသားခေါင်းဆောင် ဦးခွန်ထွန်းဦးနှင့်တွေ့ဆုံခြင်း

ဇန်န၀ါရီလ ၁၂ ရက်နေ့ညပိုင်း လွတ်ငြိမ်းချမ်းသာခွင့်သတင်းတွေ ထွက်ပေါ်ပြီးတဲ့နောက် ကျမဆီကို ရှမ်းပြည်နယ်က မိတ်ဆွေတော်တော်များများက ဖုန်းဆက်ပြီးမေးကြပါတယ်။

`ကျမတို့ရဲ့ ခေါင်းဆောင် ဦးခွန်ထွန်းဦးတို့ ရော..လွတ်တဲ့ထဲမှာပါပါသလား`တဲ့…။

ရှမ်းတိုင်းရင်းသားတွေက အန်ကယ့်ဦးခွန်ထွန်းဦးကို ချစ်ကြ လေးစားကြပါတယ်။ ပြီးတော့ယုံကြည်မှု အပြည့်အ၀ရှိကြတာလည်း တွေ့မြင်ကြရပါတယ်။ တကယ်ပဲ  ဦးခွန်ထွန်းဦး လွတ်မဲ့နေ့ကို စောင့်ကြိုနေခဲ့ကြတာပါ။

လွတ်ငြိမ်းချမ်းသာခွင့်ပေးတိုင်း တိုင်းရင်းသားထဲကဆို ဦးခွန်းထွန်းဦးတို့ကော ပါသလားဆိုတဲ့ မေးခွန်းကို ရှမ်းတိုင်းရင်းသားတွေသာမက၊နိုင်ငံရေးအသိုင်းအ၀ိုင်းထဲက နိုင်ငံရေးသမားတွေကလည်း အမြဲမေးလေ့ရှိတဲ့မေးခွန်းတခုဖြစ်ပါတယ်။

ရှမ်းတိုက်ပုံနဲ့ ရှမ်းဘောင်းဘီဝတ်ထားတဲ့ ခပ်၀၀၊မျက်နှာ ပြည့်ပြည့်၀၀၊ ပြုံးလိုက်တိုင်း မျက်လုံးတွေပိတ်မတတ် ပြည့်ပြည့်၀၀ ပြုံးတတ်တဲ့ မျိုးချစ်ပုဂ္ဂုလ်ကြီး ဦးခွန်ထွန်းဦးကို ကျမ ရှမ်းပြည်မှာ နေထိုင်စဉ် ဆယ်ကျော်သက်အရွယ်ကတည်းက ကြားဖူးခဲ့ရတာပါ။

`ဦးခွန်ထွန်းဦးက တို့ရှမ်းစော်ဘွားမျိုးနွယ်ဝင်လေ..နော့၊ သူက ခေတ်ပညာလည်း တတ်တယ်၊ အမျိုးကိုလည်း ချစ်တယ်၊စောင့်ရှောက်တယ်ဆိုတော့ သူ့ကို ချစ်ကြတာပေါ့လေ`လို့ ရှမ်းသံဝဲ၀ဲနဲ့ ပြောပြတတ်တဲ့ အသံတွေကိုလည်း ကျမ မှတ်မိနေခဲ့ပါတယ်။

၁၉၈၈ခုနှစ် နောက်ပိုင်းကာလတွေ မှာတော့ ရှမ်းတိုင်းရင်းသားတွေရဲ့အမျိုးသားရေးစိတ်ဓါတ်နိုးကြားလာခြင်းနဲ့အတူ အန်အယ်ဦးခွန်ထွန်းဦးတို့ရဲ့ ရှမ်းတိုင်းရင်းသားများ ဒီမိုကရေစီပါတီ (SNLD)ကလည်း ရှမ်းပြည်နယ်၊မြောက်ပိုင်းရော တောင်ပိုင်းမှာပါ အားကောင်းလာခဲ့ပါတယ်။၁၉၉၀ရွေးကောက်ပွဲမှာ ရှမ်းပြည်နယ်မှာ  ရှမ်းတိုင်းရင်းသားများ ဒီမိုကရေစီပါတီ (SNLD)က အနိုင်ရခဲ့ပါတယ်။

အဲဒီနောက်ပိုင်းမှာတော့ ညီလာခံခေါ်ချိန်မှာ SNLD ပါတီက ညီလာခံတက်ခဲ့ကြတာလည်းတွေ့မြင်ခဲ့ရ ပါတယ်။
၂၀၀၅ခုနှစ်ဖေဖော်ဝါ၇ီလ ၉ ရက်နေ့မှာတော့ ပြည်ထောင်စုနေ့မတိုင်မီမှာ ဦးခွန်ထွန်းဦးနှင်အတူ့ ရှမ်းတိုင်းရင်းသားများ ဒီမိုကရေစီပါတီ (SNLD)ပါတီက ခေါင်းဆောင်ပိုင်းအချို့ကိုလည်း ဖမ်းဆီးထ်ိန်းသိမ်းခံခဲ့ကြရပါတယ်။

၇ နှစ်ဝန်းကျင်ကြာအောင် ဖမ်းဆီးထိန်းသိမ်းထားခဲ့ပြီး နောက်ပိုင်း အရပ်သားအစိုးရလက်ထက်၊ ဇန်န၀ါရီလ ၁၂ ရက်နှေ့၊ လွတ်ငြိမ်းချမ်းသာခွင့်နဲ့ ဦးခွန်ထွန်းဦးအပါအ၀င် ဖမ်းဆီးခဲ့တဲ့ ရှမ်းတိုင်းရင်းသားများ ဒီမိုကရေစီပါတီ (SNLD)ပါတီက ခေါင်းဆောင်ပိုင်းအချို့ကိုလည်း ပြန်လွတ်ပေးခဲ့ခြင်းဖြစ်ပါတယ်။

အန်ကယ်ဦးခွန်ထွန်းဦးနဲ့ တွေ့ခွင့်ရတဲ့အချိန်မှာတော့ အန်ကယ်က ကျမထင်မှတ်ထားတာထက် အများကြီး ပိုဝနေတာကိုတွေ့ရပါတယ်။ ရှမ်းအကျီာင်္နဲ့ ရှမ်းဘောင်းဘီကို ၀တ်ဆင်ထားပြီးဧည့်ခန်းထဲမှာပဲ ခန့်မိန့်မိန့်ကြီး ထိုင်နေတာပါ။ ဒါပေမဲ့ အန်ကယ့်အပြုံးတွေကတော့ ဟိုအရင်တုန်းကလိုပဲ နုပျိုလတ်ဆတ်နေတာတွေ့ရပါတယ်။

`အန်ကယ် ကျန်းမာရေးကောင်းတယ်နော်`လို့ ကျမက နှုတ်ဆက်တော့ အန်ကယ်က ကောင်းပါတယ်။ ဒါပေမဲ့ အထဲမှာ နားနည်းနည်းထိခိုက်ခဲ့တယ်လို့ ပြောပါတယ်။

 အန်ကယ့်ဘေးမှာတော့ အန်ကယ် ဦးစိုင်းညွှန့်လွင်ကလည်း ရှမ်းတိုင်းရင်းသား ၀တ်စုံနဲ့ပဲ ထိုင်နေပါတယ်။ အန်ကယ်ဦးစိုင်းညွှန့်လွင်ကတော့ အရင်ကလိုပဲ သိပ်ပြောင်းလဲမှု မရှိလှဘူးလို့ ထင်ရပါတယ်။

ကျမကို မေးခွန်းတွေ မေးခွင့်ပြုဖို့ တောင်းဆိုပြီးတဲ့နောက်မှာ ကျမမေးခွန်းအချို့ကို မေးမြန်းခဲ့ပါတယ်။

မေး။    ။ အခုလိုလွတ်ငြိမ်းချမ်းသာခွင့် အပေါ် အန်ကယ့် အနေနဲ့ ဘယ်လိုမြင်ပါသလဲ။
ဖြေ။    ။ လွတ်ငြိမ်းချမ်းသာခွင့် ဆိုတာထက် လွတ်ပေးတာတောင်နောက်ကျနေပြီ။ လွတ်ငြိမ်းချမ်းသာခွင့် ဆိုတာထက် ကျွန်တော်အနေနဲ့ကတော့ နိုင်ငံတော်ပုန်ကန်မှု့လည်း မရှိခဲ့ဘူး။ ဘာမှလည်းမမှားခဲ့ဘူး။ ၀မ်းလည်းမသာဘူး။ ၀မ်းလည်းမနည်းဘူး။ အပြစ်မရှိပဲနဲ့ဖမ်းတယ်။ လွှတ်ပေးတယ် ဆိုတဲ့ခံယူချက်ပဲ ရှိပါတယ်။

ဆက်လျက်ပြီး အန်ကယ်ဦးခွန်ထွန်းဦးက လက်ရှိ မြန်မာနိုင်ငံရဲ့ နိုင်ငံရေးအခင်းအကျင်းက စပြီး ပြောင်းလဲနေပြီလို့ ပြောလို့ရပေမဲ့ ထင်သလောက်တော့ မပြောင်းလဲသေးကြောင်း၊ အမှန်တော့ခုထက်မက ပြောင်းလဲဖို့ လိုအပ်နေပြီ ဖြစ်ကြောင်း ပြောဆိုပါတယ်။
ဒါ့အပြင် ယခုလက်ရှိမှာ ကရင်တိုင်းရင်းသားလက်နက်ကိုင်အဖွဲ့အစည်းတွေနဲ့ ငြိမ်းချမ်းရေးအတွက် လက်မှတ်ရေးထိုးနေချိန်၊ ကချင်တိုက်ရင်းသားလက်နက်ကိုင်အဖွဲ့အစည်းတခုဖြစ်တဲ့ KIA နဲ့ အစိုးရတပ် တိုက်ခိုက်နေချိန်မှာငြိမ်းချမ်းရေးနဲ့ပတ်သက်ပြီး ဘယ်လိုမြင်ပါသလဲ။ ဘာပြောချင်ပါသလဲလို့လည်း ဆက်မေးမိခဲ့ပါတယ်။

`စစ်မှန်တဲ့ ငြိမ်းချမ်းရေးဆိုတာ စစ်မှန်တဲ့ ဆန္ဒတွေ၊ စစ်မှန်တဲ့ စေတနာတွေ၊ စစ်မှန်တဲ့ လုပ်ဆောင် ချက်တွေ အပေါ်မှာ မှုတည်တာပဲလေ။ ကရင်ကိုလတ်မှတ်ထိုးပေးတယ်။ ကချင်ကို တိုက်နေတယ်။  ယုံလား မယုံလားတော့ မသိဘူး။ ဖားတပိုင်း ငါးတပိုင်း ဖြစ်နေတယ်။ အဲ့တော့ ဒီလိုအနေအထားမျိုးနဲ့ စစ်မှန်တဲ့ ငြိမ်းချမ်းရေးလို့ ကျွန်တော်က ဘယ်လိုပြောနိုင်မှာလဲ။ လုပ်ကြတဲ့ ပါဝင်ကြတဲ့ ဇာတ်ကောင်အချင်းချင်းကတော့ ညှိုကြပြီးတော့ စစ်မှန်တဲ့ ငြိမ်းချမ်းရေးဖြစ်အောင် သူတို့ လုပ်ကြရမှာပေါ့` လို့ အန်ကယ် ဦးခွန်ထွန်းဦးက ပြောပါတယ်။

ကျမတို့ တိုင်းပြည်မှာ ပြည်တွင်းစစ်ဖြစ်ခဲ့တဲ့ကာလတွေက မနည်းခဲ့ပါဘူး။ ခုချိန်ထိလည်း ပြည်တွင်းစစ်တွေ ဖြစ်နေဆဲပါပဲ။ပြည်တွင်းစစ် ဖြစ်တိုင်း စစ်ဖြစ်ပွားရာဒေသက ဒေသခံတွေရဲ့ မျက်ရည်တွေ၊ ဒုက္ခတွေ၊ အသက်သွေးတွေ ပေးဆပ်ခဲ့ရတာလည်း မနည်းလှတော့ပါဘူး။

၁၉၆၂ ခုနှစ်နောက်ပိုင်းမှာ တိုင်းရင်းသားလက်နက်ကိုင်အဖွဲအစည်းတွေရဲ့ အခန်းကဏ္ဍကလည်း မြန်မာ့နိုင်ငံရေးမှာ အရေးပါလာခဲ့သလို၊စစ်မှန်တဲ့ ငြိမ်းချမ်းရေးရဖို့အတွက်လည်း အရေး ကြီးတဲ့အနေအထားမှာ ရှိနေဆဲပဲဖြစ်ပါတယ်။

` အဓိကကတော့ တကယ် ငြိမ်းချမ်းရေး ဖြစ်ချင်တယ်ဆိုရင် ရက်ပေါင်း(၉၀)တန်သည် (၆၀)တန်သည် အပစ်ခတ် ရပ်စဲပြီးတော့ သူတို့ဘာသာသူတို့ လွတ်လွတ်လပ်လပ် ဆွေနွေးပြီးတော့ နောက်ဆုံး ဆုံတွေ့ကြပေါ့။ စကားပြောကြာပေါ့။ အဲဒါအကောင်းဆုံးပါပဲ တကယ့်ငြိမ်းချမ်းရေးကို လိုချင်ဖို့တော့လိုတောပေါ့`လို့ ဦးခွန်ထွန်းဦးက ပြောဆိုခဲ့ပါတယ်။

ရှမ်းတိုင်းရင်းသားများ ဒီမိုကရေစီပါတီ (SNLD)ဟာ ၂၀၁၀ခုနှစ်ရွေးကောက်ပွဲအတွက် မှတ်ပုံမတင်ခဲ့ပါဘူး။  အဲဒီအချိန်မှာ ဦးစိုင်းအိုက်ပေါင်းဦးစီးတဲ့ ရှမ်းတိုင်းရင်းသားများ ဒီမိုကရက်တစ်(ကျားဖြူပါတီ)ကိုဖွဲ့စည်းပြီး  ၂၀၁၀ ရွေးကောက်ပွဲကို ၀င်ရောက်ယှဉ်ပြိုင်ခဲ့ပါတယ်။ ၂၀၁၀ ရွေးကောက်ပွဲမှာလည်း ရှမ်းပြည်နယ်မှာ ကျားဖြူပါတီက အနိုင်ရရှိခဲ့ပါတယ်။

အန်ကယ်ဦးခွန်ထွန်းဦးတို့ပြန်လည်လွတ်မြောက်လာချိန်မှာ အန်ကယ်တို့အနေဲ့ SNLD ပါတီကို ဆက်လက်တည်ထောင်ပြီးတော့ ရွေးကောက်ပွဲဝင်ဖို့ အစီအစဉ်ရှိပါသလားဆိုတဲ့ မေးခွန်းကို ကျမ မေးခဲ့ပါတယ်။

ဖြေ။    ။ ကျွန်တော် ဗဟိုကော်မတီတွေနဲ့ မတွေ့ရသေးတဲ့ အတွက်ကြောင့် ဆုံးဖြတ်ချက်မပေးနိုင်သေးပါဘူး။ ဗဟိုကော်မတီက ဘယ်လိုဆုံးဖြတ်မယ် မသိသေးဘူး။ အတိအကျမဖြေနိုင်သေးဘူး ခင်ဗျ။
မေး။      ။ရှမ်းတိုင်းရင်းသား ခေါင်းဆောင်တစ်ဦးအနေနဲ့ ရှမ်းတိုင်းရင်းသားတွေ အတွက်ကို ဘာတွေများ ဆက်လက် လုပ်ကိုင် ဆောင်ရွက် သွားဖို့ ရှိပါသလဲ။

ဖြေ။   ။ မပြီးသေးတဲ့လုပ်ငန်းအချို့ကိုတော့ လုပ်ပေးရမှာပေါ့ဗျာ။ ဥပမာ ရှမ်းပညာရေးတို့ ကိုယ့်ယဉ်ကျေးမှု့ကို ထိန်းသိမ်းတာမျိုးတို့ အဓိကတော့ ကလေး၊လူကြီးပါမကျန် ဒုက္ခပေးနေတာက ဘိန်းပဲ။ ဒါကြောင့် ဘိန်း ပပျောက်ရေး တို့ကို လုပ်ကိုလုပ်ရတော့မှာပါ။ လုပ်ရမဲ့ လုပ်ငန်းတွေပါ။ နောက်ပြီး နယ်စပ်နဲ့နီးနေပြီးတော့ ရှမ်းကုမ္ပဏီကို ငွေလွှဲခွင့်မပေးဘူး။ (၀) ကို ကြတော့နယ်စပ်ကုန်သွယ်ခွင့်ရတယ်ဆိုတော့ အဲဒါမျိုးတွေက မဖြစ်သင့် မဖြစ်ထိုက်တဲ့ အခြေအနေတွေ လေ။ ဒါမျိုးတွေကို ပြောပြီးတော့ လုပ်ယူရဦးမှာပေါ့ဗျာ။

အန်ကယ်ဦးခွန်ထွန်းဦးက သူ့စိတ်ထဲမှာ ဘယ်လို လုပ်ကိုင်ဆောင်ရွက်ရမယ်ဆိုတာကို ရှင်းရှုင်းလင်းလင်းသိပြီး ဆုံးဖြတ်ထားပုံရပါတယ်။ သူ့စကားတွေက ပြတ်သားလှပါတယ်။ ရှမ်းတိုင်းရင်းသားတွေအတွက် သူဟာ ခုချိန်ထိ မားမားမတ်မတ်ရပ်တည်နေဦးမယ်ဆိုတာကို သူ့စကားတွေထဲကနေ ကြားနေရပါပြီ။

မေသင်္ကြန်ဟိန်(ရွှေမြစ်မခ)





မေသင်္ကြန်ဟိန်(ရွှေမြစ်မခ) ဇန်န၀ါ၇ီလ ၁၈၊ ၊ ရန်ကုန်မြို့။