မသန်စွမ်းသူများနေ့ အထိမ်းအမှတ်ပွဲ ((ရုပ်/သံ)

  ၁၇ ကြိမ်မြောက် အပြည်ပြည်ဆိုင်ရာ မသန်စွမ်းသူများနေ့ အထိမ်းအမှတ်ပွဲကို ရန်ကုန်မြို့ တိရစ္ဆာန် ဥယျာဉ်မှာ ဒီဇင်ဘာလ ၃ ရက်နေ့က ကျင်းပပြုလုပ်နေတာဖြစ်ပါတယ်။
ဒီပွဲကို (TLMI Myanmar ) လို့ခေါ်တဲ့ The Leprosy Mission International Myanmar က ဦးစီးကျင်းပခဲ့တာဖြစ်ပြီး မနက် ၉ နာရီကနေ ညနေ ၃ နာရီထိ ကျင်းပခဲ့တာပါ။
ဒီပွဲမှာ မသန်စွမ်းသူများအကြောင်းနဲ့ ပတ်သက်တဲ့ ပဟေဠိဥာဏ်စမ်းပွဲကို ပြုလုပ်ခဲ့ကြသလို မသန်စွမ်းသူတွေပြုလုပ်ထားတဲ့ လူမှုအသုံးပစ္စည်းတွေကိုလည်း ရံပုံငွေအဖြစ် (TLMI Myanmar) ကရောင်းချခဲ့ပါတယ်။
မသန်စွမ်းတွေ အပါအ၀င် လူဦးရေ ၃၀၀ လောက် လာရောက်ခဲ့ကြတဲ့ ဒီပွဲမှာ ရွှေပြည်သာလင်းရောင်ခြည် အဖွဲ့ကလည်း အဆိုအကတွေနဲ့ဖျော်ဖြေသွားခဲ့တယ်လို့သိရပါတယ်။
ဒီပွဲကို ဦးဆာင်ကျင်းပပေးတဲ့ TLMI Myanmar အနေနဲ့ လည်း ရပ်ရွာအခြေပြုပြန်လည်ထူထောင်ရေးဆိုတဲ့ မသန်စွမ်းသူတွေနဲ့ပတ်သက်တဲ့ ဖွံ့ဖြိုးရေးလုပ်ငန်းတွေကို ထပ်မံလုပ်ဆောင်ပေးသွားမယ်လို့ဆိုပါတယ်။
အပြည်ပြည်ဆိုင်ရာ မသန်စွမ်းသူများနေ့ အထိမ်းအမှတ်ပွဲကို မြန်မာနိုင်ငံမှာ ၁၉၉၄ ခုနှစ်မှာ စတင်ပြီးကျင်းပပြုလုပ်ခဲ့တာဖြစ်ပါတယ်။
တဆက်ထဲမှာပဲ အပြည်ပြည်ဆိုင်ရာ မသန်စွမ်းသူများနေ့အထိမ်းအမှတ်ပွဲကို နေပြည်တော် ဇမ္ဗူသီရိမြို့မှာရှိတဲ့ MICC ခန်းမမှာလည်း လူမှုဝန်ထမ်း ဦးစီးဌာနက ဦးစီးကျင်းပပြုလုပ်ခဲ့ကြပါတယ်။
မြန်မာနိုင်ငံမှာရှိတဲ့ လူဦးရေရဲ့ ၁ ဒသမ ၃ သန်းဟာ မသန်စွမ်းသူများဖြစ်ကြပြီး အဲဒီထဲကမှ ၇ဝ ရာခိုင်နှုန်းဟာ လှုပ်ရှားသွားလာမှု ခက်ခဲသူတွေဖြစ်ကြသလို ကျန်တဲ့ ၃ဝ ရာခိုင်နှုန်းဟာ အသိညဏ်ခံစားမှု မသန်စွမ်းသူများ ဖြစ်ကြောင်း မြန်မာနိုင်ငံ လူမှုဝန်ထမ်းဦးစီးဌာန စစ်တမ်းများအရ သိရပါတယ်ခင်ဗျာ။

 

Burma VJ Media Network