အမျိုးသား လူ့အခွင့်အရေး ကော်မရှင်နှင့် မိုက်ကယ်ပေါ့စနာတွေ့ဆုံ

Michael Posner meet with National Human Rights commission
ဒီဇင်ဘာ ၂၊ ၂၀၁၁ (YPI)

မြန်မာနိုင်ငံ အမျိုးသားလူ့အခွင့်အရေးကော်မရှင် အဖွဲ့ဝင်အချို့နှင့် မြန်မာနိုင်ငံရောက်ရှိနေသည့် အမေရိကန်နိုင်ငံ ဒီမိုကရေစီ၊ လူ့အခွင့်အရေးနှင့် အလုပ်သမားရေးရာ လက်ထောက် နိုင်ငံခြားရေးဝန်ကြီး မိုက်ကယ်ပေါ့စနာတို့ ယနေ့ နံနက် ၇ နာရီက ချက်ထရီယမ် ဟိုတယ်၌ တွေ့ဆုံခဲ့ကြောင်း ကော်မရှင် အတွင်းရေးမှူး ဦးစစ်မြိုင်က YPI သို့ပြောသည်။

အမေရိကန် လက်ထောက် နိုင်ငံခြားရေးဝန်ကြီး ပေါ့စနာမှာ အမေရိကန်နိုင်ငံခြားရေး ၀န်ကြီး ဟီလာရီ ကလင်တန်နှင့်အတူ လိုက်ပါလာခြင်းဖြစ်သည်။

အမေရိကန် နို်င်ငံခြားရေး ၀န်ကြီး ဟီလာရီ ကလင်တန် ယမန်နေ့ညက ရွှေတိဂုံစေတီသို့ သွားရောက်စဉ်

ယနေ့ နံနက်တွေ့ဆုံမှုတွင် တနာရီဝန်းကျင်ကြာမြင့်ပြီး လူ့အခွင့်အရေးကောင်မရှင်ဥက္ကဋ္ဌ ဦးဝင်းမြ၊ အတွင်းရေးမှူးဦးစစ်မြိုင်နှင့် အခြားအဖွဲ့ဝင်နှစ်ဦးပါဝင်ကာ  အမေရိကန်နိုင်ငံဘက်မှ လက်ထောက် နိုင်ငံခြားရေးဝန်ကြီးနှင့် ၎င်း၏ လက်ထောက်နှစ်ဦး တို့ပါဝင်သည်ဟုလည်း ဦးစစ်မြိုင်က ပြောသည်။

“ အဓိကဆွေးနွေးတာကတော့ သူတို့ ကကျွှန်တော်တို့ ကော်မရှင်ကို ကူညီချင်တယ်လို့ ကမ်းလှမ်းတယ်။ နောက်အသိအမှတ်လည်း ပြုတယ်ပေါ့။ ဆက်လက်ပူးပေါင်းရမယ့် လုပ်ဆောင်ချက်တွေ ဆွေးနွေးကြတယ်။ အသေးစိတ်ကတော့ လောလောဆယ် ထုတ်ပြောလို့တော့မရသေးဘူး”ဟု ၎င်းတို့ကဆိုသည်။

မိုက်ကယ်ပေါ့စနာ ဘက်မှ ကော်မရှင်အနေနှင့် မဟုတ်ဘဲ လူ့အခွင့်အရေးနှင့် ပတ်သတ်သည့် လုပ်ဆောင်ချက်များကို ကူညီချင်ကြောင်း ပြောကြားခဲ့သည့်အပြင် ပူးပါင်းဆောင်ရွက်ရမည့်လုပ်ငန်းများမှာ လာမည့်အနာဂတ်တွင် ဆက်လက်ဆွေးနွေးရမည်ဖြစ်ပြီး ၄င်းမှာ နှစ်နိုင်ငံ ရင်းနှီးချစ်ကြည်မှုနှင့်လည်း သက်ဆိုင်ကြောင်းပြောသည်။

ကော်မရှင်ဘက်မှ ၎င်းတို့၏ လုပ်ဆောင်ချက်များ၊ အိတ်ဖွင့်ပေးစာနှင့်ပတ်သတ်သည့် ရှင်းပြချက်များ နိုင်ဝင်ဘာတွင်ကျင်းပခဲ့သည့် အရှေ့တောင်အာရှ လူ့အခွင့်အရေးကော်မရှင်ရုံးနှင့် ပူးပေါင်းဆောင်ရွက်သည့် အလုပ်ရုံဆွေးနွေးပွဲ အကြောင်းကို ရှင်းပြခဲ့သည်ဟုဆိုသည်။

ထို့ပြင် လူ့အခွင့်အရေးကော်မရှင် မှလာမည့်လများတွင်  လူ့အခွင့်အရေးနှင့် ပတ်သက်သည့်ပြည်တွင်းခရီး စဉ်သွားရန် ရှိသည့်အစီအစဉ်များကိုလည်း ရှင်းပြခဲ့သည်ဟုဆိုသည်။

ယမန်နေ့က  နိုင်ငံတော်သမ္မတ ဦးသိန်းစိန် နှင့် အမေရိကန်နိုင်ငံခြားရေးဝန်ကြီး မစ္စစ်ဟီလာရီ ကလင်တန် ဦးဆောင်သည့် အဖွဲ့တို့ တွေ့ဆုံရာတွင် လူ့အခွင့်အရေးကိစ္စနှင့်စပ်လျဉ်းပြီး ပြောဆိုရာတွင် မြန်မာနိုင်ငံ မြန်မာနိုင်ငံ အမျိုးသား လူ့အခွင့်အရေး ကော်မရှင်ဖွဲ့စည်း လုပ်ဆောင်လျှက်ရှိသည်များကို အသိအမှတ်ပြုပါကြောင်းနှင့်  လာမည့်နှစ်အစောပိုင်းတွင်အဖွဲ့တဖွဲ့စေလွှတ်လိုကြောင်း ပြောကြားခဲ့သည်။ ထို့ပြင် လူ့အခွင့်အရေး ဆိုင်ရာကိစ္စများနှင့်ပတ်သက်ပြီး ကမ္ဘာ့ကုလသမဂ္ဂနှင့် ပူးပေါင်းဆောင်ရွက်စေလိုကြောင်းလည်း နိုင်ငံခြားရေး ၀န်ကြီးက တိုက်တွန်းခဲ့သည်။

ကော်မရှင်၏ အတွင်းရေးမှူးဖြစ်သူ ဦးစစ်မြိုင်က အဆိုပါအဖွဲ့ကို ၎င်းတို့အနေဖြင့်  ကြိုဆိုပါကြောင်း YPI သို့ပြောသည်။
လက်ရှိ အမျိုးသား လူ့အခွင့်အရေးကော်မရှင်ထံသို့  မြေယာသိမ်းဆည်းခံရခြင်းနှင့်ပတ်သတ်သော အငြင်းပွားမှုများနှင့် တရားရုံးအမှုများ လာရောက်တိုင်ကြားမှုများပြား၍  နယ်မှလာရောက် တိုင်ကြားသူများကြောင်းလည်း ၄င်းကဆက်ပြောသည်။      ။