မြန်မာပြည်မှာ လျှပ်စစ် အသုံးဆုံး ဒေသက ရန်ကုန်ဖြစ်ပါတယ်။ 600MW လောက်သုံးပါတယ်။ ဒုတိယ မန္တလေးပါ။ 120MW လောက်သုံး ပါတယ်။နေပြည်တော် 50MW တောင်ကြီး25MW မုံရွာ 15MW စသည်ဖြင့် အခြား မြို့ကြီးတွေလည်း ရှိပါတယ်။ အိမ်ထောင်စု အနေနဲ့ ခွဲပြောရင် ရန်ကုန်တိုင်းဒေသကြီးမှာ သုံးအိမ်မှာ နှစ်အိမ် မီးရပါတယ်။ ၆၆% ဆိုပါတော့။ ဒုတိယက ကယားပြည်နယ်ပါ သူက ၃၅%နှုန်းလောက်ရှိပါတယ်။ နာမည်ကျော် ဘီလူးချောင်းစက်ရုံကြီးကျေးဇူးကြောင့်ပါ။ ပြီးတော့ ပြည်နယ်ကလည်း သေးတော့ မီးရတဲ့ အိမ်များတာပါ။ သူတို့နောက်မှာ အစဉ်လိုက် နေပြည်တော်ဒေသ ၃၄% မန္တလေးတိုင်းဒေသကြီး ၃၃% စသည်ဖြင့်ရှိပါတယ်။ ထူးဆန်းတာ တစ်ခုက တိုင်းနဲ့ ပြည်နယ် ၁၄ခုမှာ မီးအရအနည်းဆုံးက ဧရာဝတီတိုင်းပါ ၁၀%ကျော် လေးပဲရှိပါတယ်။ သူက လူဦးရေများပြီး မြစ်ချောင်း များလို့ ဖြစ်ပါလိမ့်မယ်။ ချင်းပြည်နယ်တောင်မှ ဧရာဝတီရဲ့ အထက်မှာ ရှိပါတယ်။ နောက်တစ်ခု ကြားဖြတ်ကျွန်တော့်အမြင်လေး ပြောရရင် ရှမ်းပြည်နယ်ဟာ အိမ်ထောင်စုတွေရဲ့ ၃၀%လောက်ပဲ မီးရတယ်ဆိုပါတယ်။ သူက ပြည်နယ်တိုင်း၁၄ခုမှာ အဆင့်လေးမှာပါ။ ဒါဟာ ရှမ်းတစ်ပြည်နယ်လုံးကို ပြောထားလို့ ဖြစ်ပါလိမ့်မယ်။ ရှမ်းရှေ့ ရှမ်းတောင် ရှမ်းမြောက် ပြန်ခွဲရင်တော့ ရှမ်းတောင်က ကယားပြည်နယ်ထက် မီးရတဲ့နှုန်းသာမယ် ထင်ပါတယ်။ ဘာလို့လဲ ဆိုတော့ တောင်ကြီးခရိုင်တစ်ကြောမှာ မီးမရတဲ့ရွာနဲ့ မီးရတဲ့ရွာဆိုရင် မီးရတဲ့ရွာက ပိုများပါတယ်။ လွိုင်လင်ခရိုင်ဆိုရင်လည်း မီးရတဲ့နှုန်းမြင့်ပါတယ်။ ကျောက်ဆည်နဲ့ ကပ်ရက် ရွာငံမြို့ဆို မြန်မာပြည်တစ်ပြည်လုံး မီးပျက်တောင် သူက တစ်ခါတစ်လေ မပျက်ပါဘူး။ ကင်းတားစက်ရုံက မီးကို တိုက်ရိုက်ယူထားတာမို့ပါ။ ရှမ်းတောင်နဲ့ ပတ်သက်တဲ့ ကျွန်တော့်အမြင်သက်သက်ပါ။
မြန်မာပြည်လျှပ်စစ်ရဲ့ ၇၀%ကျော်ကို ရေအားကထုတ်ပါတယ်။ ၂၀%နှုန်းလောက်ကို သဘာဝဓာတ်ငွေ့ကထုတ်ပြီးတော့ ၈%က ရေနွေးငွေ့စက်ရုံတွေက ရပါတယ်။ အခြားနည်းတွေက ၁%အောက်မှာပဲ ရှိပါသေးတယ်။ အားနည်းချက်လာပါပြီ။ မီးသုံးပါတယ်ဆိုတဲ့ ရန်ကုန်နား တစ်ဝိုက်မှာ တစ်မြို့လုံးစာကို စက်ရုံတစ်ခုတည်းက နေပေးဖို့ စက်ရုံလောက်လောက်လားလား မရှိပါဘူး။ မန္တလေးဆိုရင် သူ့သုံးတာရဲ့ ငါးဆလောက် ထုတ်ပေးမယ့် ရဲရွာစက်ရုံက မိုင် ၄၀ လောက်မှာ ရှိနေပါတယ်။ တောင်ကြီးဆိုရင် ကျိုင်းတောင်း၊တီကျစ်၊ ဇော်ဂျီ စတဲ့ စက်ရုံတွေ ရှိပါတယ်။ နေပြည်တော်ဆို လည်း သူသုံးတာရဲ့ ငါးဆကျော် ထုတ်နိုင်တဲ့ ပေါင်းလောင်းစက်ရုံက ၁၁မိုင် အကွာမှာ ရှိပါတယ်။ အကြောင်းရင်းကတော့ ရေအားလျှပ်စစ်ရဲ့ သဘာဝအရ တောထဲမှာပဲ ရှိတာပါ။ ဒါကြောင့် တောနက်နက်နဲ့ ဝေးတဲ့ ရန်ကုန်ဟာ မီးရဖို့ အတွက် လိုင်းအရှည်ကြီးတွေ ဆွဲရပါတယ်။ လိုင်းရှည်ရင် ဆုံးရှုံးမှုများတာ ထုံးစံပါပဲ။ ဒါကြောင့် ရန်ကုန်ကို လျှပ်စစ် 100MW ရောက်ဖို့ ကျွန်တော့စိတ်ထင် 125MW လောက်ပို့ပေးမှ ရပါလိမ့်မယ်။ ရန်ကုန်မှာရှိတဲ့ သဘာဝဓာတ်ငွေ့စက်ရုံတွေကလည်း 300MW လောက်ပဲ ထုတ်နိုင်တာပါ။ ရန်ကုန်သုံးတာရဲ့ တစ်ဝက်ပဲ ရှိပါတယ်။ ၀မ်းသာစရာကတော့ ရန်ကုန်နားမှာ သဘာဝဓာတ်ငွေ့ ဓာတ်အားပေးရုံဆောက်ဖို့ ကိုရီးယားက လာပြီးဆွေးနွေးနေတာ သတင်းဖတ်လိုက်ရပါတယ်။ MW 500 ကျော်ရှိပြီး ဒလမှာ ဆောက်မှာ လို့သိရပါတယ်။ နောက်ပြီး ထန်းတပင်မှာလည်း 375MW ရှိတဲ့ ကျောက်မီးသွေးသုံး ဓာတ်အားပေးစက်ရုံဆောက်နေသံ ကြားပါတယ်။
စဉ်းစားစရာတစ်ခုပေါ်လာပါပြီ။ ရန်ကုန်လူဦးရေက ၆သန်းပါ။ လက်ရှိလျှပ်စစ်သုံးနေတာ 600MW။ စင်ကာပူလူဦးရေက ၄သန်းခွဲပါ။ လက်ရှိလျှပ်စစ်သုံးနေတာက 11000MW တောင်ရှိပါတယ်။ အဲတော့ မြန်မာပြည်သာ စီးပွားရေးတိုးတက်လာခဲ့ရင် လျှပ်စစ် အသုံးက ဆတိုးနဲ့ ကိုတက်လာမယ့် သဘောရှိပါတယ်။ စက်မှုလုပ်ငန်းတွေ များလေ လျှပ်စစ်သုံးတာများလေ ဖြစ်လာမှာဆိုတော့။ ရန်ကုန်အတွက် အနည်းဆုံး MW 10000 လောက် ရအောင် အစီအစဉ်လေး ဘာလေးရှိရင် သိပ်ကောင်းမှာပါ။ ဗြုန်းခနဲ မဟုတ်ဘူး ဆယ်နှစ် (သို့မဟုတ်) ဆယ့်ငါးနှစ် အတွင်းပေါ့။ ထားပါလေ။ ဒါတွေက လူကြီးတွေလုပ်ပါလိမ့်မယ်။
မန္တလေးကတော့ လျှပ်စစ်ကံကောင်းနေပါတယ်။ မန္တလေးနားမှာ ရေမြေသဘာဝ အရ ရဲရွာစက်ရုံလာဆောက်တယ်။ လျှပ်စစ်က 790MW တောင်ထွက်တယ်။ နောက် ဟိုးဖက် မူဆယ်နားမှာ ရွှေလီ-၁ စက်ရုံဆောက်တယ်။ မြန်မာပြည်အောက်ပိုင်းကို ပို့ဖို့ မန္တလေးနားက ဖြတ်သွားရတယ်။ နောက်ပြီး ဆည်တော်ကြီးတို့ ကင်းတားတို့လို စက်ရုံ အသေးလေးတွေ လည်း ရှိသေးတယ်။ နောက်ပြီး ကျွန်တော့်အထင် မန္တလေးက နိုင်ငံတကာ မြို့တော်ဖြစ်ဖို့ သဘာဝက အခြေအနေ မပေးပါဘူး။ မဖြစ်ဖြစ်အောင် လုပ်ရင်တော့ ရပါတယ်။ ဖြစ်လည်း ဖြစ်နိုင်တယ်။ သို့သော် ရန်ကုန်လိုတော့ ပင်လယ်ဆိပ်ကမ်းမရှိပါဘူး။ အဲဒီတော့ နိုင်ငံခြား ရင်းနှီးမြုပ်နှံမှုတွေ ၀င်လာတယ် ဆိုရင်တောင်မှ ရန်ကုန်တို့ ထားဝယ်တို့ ကျောက်ဖြူတို့ မှာလို ကုန်ထုတ်လုပ်မှုလုပ်ငန်း ကြီးကြီး တွေ မန္တလေးကို ၀င်ဖို့နည်းပါတယ်။ ၀န်ဆောင်မှုလုပ်ငန်းနဲ့ ခရီးသွားလုပ်ငန်းလောက်ပဲ အားကိုးလို့ ရမှာပါ။ ပြောချင်တာက မြန်မာပြည်ကြီး ဗြုန်းခနဲ ဖွံ့ဖြိုးလာရင်တောင်မှ မန္တလေးကတော့ သူ့နှုန်းနဲ့သူ ပဲ တိုးတက်ပါလိမ့်မယ်။ လျှပ်စစ်အသုံးကလည်း တအိအိပဲ တက်လာပါလိမ့်မယ်။ နည်းနည်းပါးပါး တိုးနှုန်းမြန်လာတာတော့ ရှိမှာပေါ့လေ။
ကဲ... မီးဘာကြောင့်ပျက်ရတယ် ဆိုတဲ့ အကြောင်းလေး ပြောပါဦးမယ်။ မီးဘာလို့ ပျက်လဲ ဆိုတော့ မလာလို့ပေါ့ဗျာ။ အဲလို ဖြေတာ အရှင်းဆုံးဖြစ်မယ်ထင်တယ်။ အတည်ပြောပါ့မယ်။ အပေါ်မှာ ပြောခဲ့သလိုပဲ ဓာတ်အားပေးစက်ရုံတွေက တောထဲမှာ။ အဲဒီကနေ မြန်မာပြည်အောက်ပိုင်းကို ပို့နေရတာ။ ဓာတ်အားထုတ်လုပ်မှုရဲ့ ငါးပုံနှစ်ပုံ(၄၀%)က မန္တလေးတိုင်းက ထုတ်တာပါ။ (ရဲရွာ၊ ပေါင်းလောင်း၊ ဆည်တော်ကြီး၊ ကင်းတား) နောက် ၂၀%လောက်ကို ရှမ်းတောင်နဲ့ ကယားက ထုတ်ပါတယ် (လောပိတ၁ နှင့် ၂၊ တီကျစ်၊ ကျိုင်းတောင်း၊ ဇော်ဂျီ ၁နှင့်၂) ရန်ကုန်နားက သဘာဝဓာတ်ငွေ့စက်ရုံတွေက ၂၀%လောက်ထုတ်ပါတယ်။ (အလုံ၊ လှော်ကား၊ ရွာမ၊ သာကေတ) ရှမ်းမြောက်က ၁၅%နှုန်း(ရွှေလီ-၁) နောက်ကျန်တာတွေက ပဲခူး၊ စစ်ကိုင်း၊ မကွေး၊ မွန် စတာတွေမှာ နည်းနည်းစီ ထုတ်ပါတယ်။
လျှပ်စစ်အသုံးကျတော့ ရန်ကုန်က ၄၅%နှုန်း မန္တလေးက ၁၀%ခန့် နေပြည်တော်က ၄%ခန့် သုံးပါတယ်။ အဲတော့ ရန်ကုန်မှာ သုံးဖို့ ဆွဲရတဲ့ လိုင်းတွေက ရွှေလီကနေ ဆို ရွှေလီ-မန်စံ-ရွှေစာရံ(မန္တလေးအနီး) ကနေတဆင့် ဘဲလင်း-သပြေ၀(မိတ္ထီလာအနီး) ဆက်သွား ပြီးတော့မှ သာစည်-ပျဥ်းမနား-တောင်ငူ-ကမာနတ်(ပဲခူးအနီး) ကနေပြီး ရန်ကုန်နားက ခွဲရုံတွေကို ၀င်ရပါတယ်။ ရဲရွာဓာတ်အားက ဘဲလင်းနဲ့ သပြေ၀မှာ လာပေါင်းပါတယ်။ ပေါင်းလောင်းဓာတ်အားက ပျဉ်းမနားမှာ လာပေါင်းပါတယ်။ လောပိတက ထုတ်တဲ့ ဓာတ်အားက သာစည်မှာ လောပိတ-တီကျစ်-ကလော-သာစည် ဓာတ်အားလိုင်းက လည်းကောင်း တောင်ငူမှာ လောပိတ-တောင်ငူဓာတ်အားလိုင်းကလည်းကောင်း တဆင့်လာပေါင်းပါတယ်။ အဲဒီမှာ ဘာရည်ရွယ်ချက်ရှိလို့ ရှိမှန်းမသိတဲ့ ကောင်တွေက လောပိတ-တောင်ငူနဲ့ ရွှေလီ-မန်စံ လိုင်းတွေကို ဖျက်ဆီးလိုက်ပါတယ်။ အဲဒီမှာတင် ထုတ်သမျှလျှပ်စစ်က ရန်ကုန်ကို ဘယ်လိုင်းက စီးလို့ စီးရမှန်းမသိဖြစ်ကုန်ပါတယ်။ လိုင်းတွေရဲ့ သယ်ဆောင်နိုင်အားတွေ အသေးစိတ်ပြောရင် ရှုပ်ကုန်မှာစိုးလို့ မပြောတော့ပါဘူး။ သေချာတာကတော့ အဲဒီ လောပိတ-တောင်ငူနဲ့ ရွှေလီ-မန်စံ လိုင်းတွေ အဖျက်ခံရတဲ့အတွက် ရန်ကုန် မီးမပျက်ဖို့ သေမလောက် လုံးပန်းနေရပါတယ်။ ရန်ကုန်မပျက်တောင် အနည်းဆုံး တောင်ငူနဲ့ ပဲခူးလောက်မှာ ပျက်ပါတယ်။ မန္တလေးတို့လို မြန်မာပြည်အထက်ပိုင်းမှာ ပျက်တာကတော့ ဓာတ်အားလိုင်းခပ်ငယ်ငယ်လေးတွေရဲ့ ယာယီအပြစ်ကြောင့်သာ ဖြစ်ပါလိမ့်မယ်။
မီးအမြဲလာဖို့(လုံးဝမပျက်ဘဲ လာဖို့) ကတော့ ဓာတ်အားပေးစက်ရုံတွေကို တိုးဆောက်ရမယ်။ ရေအားချည်းပဲ ကတော့ မဖြစ်ပါဘူး။ ရေအားပဲ ဆောက်ရင်တော့ ရန်ကုန်မှာ ခုလက်ရှိတောင် မလွယ်တာ။ နောင်လေးငါးနှစ် နှစ်ဆလောက် တက်လာမယ့် အချိန်ဆို လုံးဝ မလွယ်တော့ပါဘူး။ နောက်ဓာတ်အားလိုင်းတွေ သေချာတွက်ပြီးဆွဲရမယ်။ ဆွဲပြီးကာမှ ထုတ်ထားသလောက် မစီးနိုင်ရင် အလကားပါ။ နောက်ပြီး ဓာတ်အားဖြန့်ဖြူးရေး အပိုင်းမှာ သေသေချာချာ လုပ်ရပါမယ်။ သူများနိုင်ငံမှာ Technical Loss ဆိုတဲ့ စက်ပစ္စည်းတွေ ကြောင့်ပဲ ဆုံးရှုံးတာ။ ကျွန်တော်တို့ ဆီမှာ Non-technical Loss ဆိုတဲ့ လူကြောင့် ဆုံးရှုံးတာပါ တော်တော်များနေတယ်လေ။ အဲဒါလေးတွေ သေချာလုပ်ရပါမယ်။ နောက် အရေးကြီးတာတစ်ခုက ဓာတ်အားစနစ် တစ်ခုလုံးကို Frequency and Voltage Control သေချာလုပ်ဖို့လိုပါမယ်။ အရေးပေါ်မှ ဟိုခေါ်ဒီဆက်လုပ်နေရတဲ့ လက်ရှိစနစ်ကနေ ဓာတ်အားစနစ်ကြီး တစ်ခုလုံးကို တစ်နေရာတည်းက မောက်စ်ကလစ်ရုံနဲ့ ထိန်းနိုင်ဖို့ လုပ်နေကြပြီလို့ ထင်ပါတယ်။
ကဲ... ပြီးပါပြီ။ တော်တော်တော့ မျက်စိနောက်သွားမယ်ထင်တယ်။ စိတ်ဝင်စားရင် သေချာဖတ်ကြည့်ဗျာ။ နောက် ကျွန်တော့်ကို မေးပါ။ မသိရင် သိတဲ့သူကို ပြန်မေးပြီး ကျွန်တော်ဖြေပါ့မယ်။
(အပေါ်တွင် ဖော်ပြထားသော အချက်အလက် အများစုမှာ နိုင်ငံပိုင် သတင်းစာ၊ ရုပ်သံများတွင်ဖော်ပြသမျှ အချက်အလက် အများစု ဖြစ်ပါသည်။ အချို့ အချက်အလက် များမှာ ခိုင်မာသော အဖွဲ့အစည်းတို့၏ ကွင်းဆင်းကောက်ယူထားသော အချက်အလက်များ ဖြစ်ပါသည်။ ထိုအချက်အလက်များမှာ သတင်းစာ၊ ရုပ်သံတို့တွင် ပါဝင်သေးခြင်းမရှိပါ။ ထို့ကြောင့် ထိုသို့ အချက်အလက်များကို အတိအကျဖတ်ဖူးသော်လည်း အနည်းငယ် မဆိုသလောက် ခန့်မှန်းချေ သဘောမျိုးသာ ရေးသားထားပါသည်။ သို့သော် ဤစာစုပါ အချက်အလက် များတွင် တက်တက်စင်အောင်လွဲသော အချက်လုံးဝမပါကြောင်း အာမခံပါသည်။)
ပေါက်ကျိုင်း
၂၃.၁၂.၂၀၁၁
မြန်မာလျှပ်စစ်အကြောင်း ခပ်ပါးပါးလေးပြောပြမယ်
Reviewed by သစ်ထူးလွင်
on
05:08
Rating:
Reviewed by သစ်ထူးလွင်
on
05:08
Rating:
9 comments:
Thanks you for the post. Very Knowledgeable. Any master plan to adapt the future power consumption or any way to protect the bombing?
ပုဂ္ဂလိက လွှဲမယ်ဆိုတာ ဘယ်အပိုင်းလွှဲမှာလဲ..သူတို့လုပ်နိုင်ဘို့ အချိန်ဘယ်လောက်ပေးရမလဲ...
အ၇မ်းကောင်းတဲ့ စာလေးပါ။ ကျေးဇူးပါ
thanks a lot.
thanks for a very informative post.
ဆေ့ဖ်ဂါတ် ဆောင်ရန်မလိုသော မီးမြှင့်စက်ဆောင်ရန်မလိုသော နိုင်ငံတော်သစ်ဆီသို့......
ကိုပေါက်ကျိုင်း တင်ပြတာကို အထူးကျေးဇူးတင်ရှိပါတယ်...။
ကျွန်တော်တခုသိချင်တာကတော့ ရင်ကုန်မြို့မှာ လျှပ်စစ်ပေးဝေပုံ အသေးစိတ်သိရင်ဖော်ပြပေးစေလိုပါတယ်..ဆိုလိုတာက ရန်ကုန်တွင်းမြို့နယ်ဘယ်နခုရှိပြီး ဘယ်လိုအလှည့်ကျပေးတယ်..ဘယ်မြို့နယ်ကိုဘယ်လောက်ပေးတယ်ပေါ့ဗျာ
ကျွန်တ်ာတို့မင်္ဂလာဒုံမှာဆိုကို့အားကိုကိုး transformer တွေသုံးကျတာတွေရှိတယ်ပေါ့ဗျာ.. အဲ့ဒါဟာတွေကိုရော အစိုးကပေးတဲ့ ယူနစ်ထဲကိုထည့်တွက်ပါသလား...စတာတွေပေါ့
အော် အဲလိုလား....ထူးတော့ထူးဆန်းတယ် လူကြီးတွေရဲ့အိမ်တွေတော့ မီးဘယ်တော့မှ မပျက်ဘူး...တစ်ခါက သူငယ်ချင်းတစ်ယောက်မူးပြီး ကောင်းမောင်းရာ လူကြီးတစ်ယောက်အိမ်နားက ဓတ်တိုင်ကိုတိုက်မိလို့ ရဲက လျော်ကြေး သိန်း20ချက်ချင်းတောင်းတယ်.ဘာဖြစ်လို့လဲဆိုတော့ လူကြီးအိမ် မီးမပျက်အောင် emergency ပြင်ရမယ်ဆိုပဲ..ငါတို့တွေတစ်သက်လုံးအမှောင်ထဲမှာ နေရတာတော့ သူတို့မမြင်ဘူး.သူ့အိမ်လေး မီးတစ်ရက်ပျက်တာ သေမတတ်ဖြစ်နေတယ်လေ.လူတွေများတရားကျဖို့ကောင်းတယ်..
ကောင်းပါတယ်၊ကိုပေါက်ကျိူင်းရေ ၊တစ်ခုတော့မေးချင်တယ်၊တရုတ်ကိုခွဲပေးနေတဲ့ရေအားစက်ရုံတွေပေါ့ဗျာ၊လာမဲ့စီမံ ကိန်းတွေ မှာလဲတရုတ်ကိုပေးရမှာကများမယ်၊ ကျွန်တော်တို့ရေအားစက်ရုံတွေကတရုတ်ကိုဘာလို့ခွဲပေးရတာလဲ၊တရုတ်နဲ့ အကျိုးတူလုပ်တာနဲ့ တရုတ်ဆီကပိုက်ဆံချေးပြီးနိုင်ငံအတွက်ချည်းပဲလုပ်လုပ်တာနဲ့ဘာကွာပါသလဲ၊ဘာလို့လောပိတကအခုထိ(တရုတ်စက်ရုံတွေအများကြီးဖြစ်နေတဲ့အချိန်မှာတောင်)ကျေးဇူးရှင်ပုံစံမျိုးဖြစ်နေရတာပါလဲ၊...နောက်တစ်ခုကကိုပေါက်ကျိုင်းပြောတဲ့ စက်ရုံတစ်ရုံကထွက်တဲ့မီဂါဝပ်တွေကတကယ်အပြည့်ထွက်ပါရဲ့လားခင်ဗျား၊နွေဘက်မှာရောဒီလောက်ပဲလားခင်ဗျား၊မြစ်ချောင်းတွေဆည်တွေကရေအမြဲပြည့်နေလို့ပါလား၊ကျွန်တော်တို့မြစ်ဆုံကိစ္စဖြစ်တုန်းကလေ့လာကြည့်မိတော့လက်ရှိစက်ရုံတွေက တပ်ထားတဲ့စက်တွေကတကယ်ထွက်တာနေ့စဉ်ထုတ်ပေးနေတာတပ်ထားတာရဲ့(ကြော်ငြာနေတာရဲ့)တစ်ဝက်ရှိပါသလားခင်ဗျား၊ လျှပ်စစ်၁က၀န်ထမ်းတွေပြောတာကတော့ရေလှောင်ထားတာကိုတစ်နှစ်စာမီးပေးလို့ရအောင် ချိုပြီးစက်တွေမောင်းရတယ်လို့ပြောပါတယ်၊ကိုပေါက်ကျိုင်းပြောတဲ့ ရဲရွာ ၇၉၀ ဆိုတာ နေ့စဉ်ပေးနေတဲ့မီးအားလား၊သူ့ဆီမှာတပ်ထားတဲ့စွမ်းရည်လားလဲသဲသဲကွဲကွဲသိချင်ပါတယ်၊ရဲရွာစီမံကိန်းလုပ်နေတုန်းကလဲသတင်းစာထဲမှာမစားရ၀ခမန်းတွေ မီဂါဝပ် ၇၀၀ ကျော်လို့ရေးထားပြီးမှ မီးပျက်တာမလျော့ခဲ့ပါဘူးအကိုရေ၊တကယ်ရဲရွာဘယ်လောက်နေ့စဉ်ထွက်နေလဲသိချင်ပါတယ်၊ရွေလီကတော့တရုတ်ကိုရောင်းနေရတာမီဒီယာတွေမှာပါလာတော့မပြောတော့ပါဘူးဗျာ အကျိူးတူနဲ့တင်ခံရတာပါ ၊ကျန်တဲ့စက်ရုံတွေရောဘယ်လောက်ထွက်ပါသလဲ၊ တစ်ချို့စက်ရုံတွေဆိုရင်တကယ်မထွက်နိုင်ပဲနဲ့ကိုစရိတ်ကြီးအောင်မတန်တဆတပ်ဆင်ထားတာတွေတောင်ရှိပါတယ်တဲ့ ၊တကယ်ကျတော့ စက်တွေတပ်ထားတာရဲ့ ၃ပုံ၁ပုံတောင် မီးမထုတ်ရဘူးလို့သိရပါတယ်၊၊နောက်တစ်ခုကမီးပေးတာ Frequency and Voltage Control သေချာလုပ်ဖို့မှန်ပါတယ်ခင်ဗျား၊တိုးတက်နေတဲ့ခေတ်မှာလုပ်သင့်တယ်လို့မပြောသင့်လောက်အောင်ကိုနောက်ကျနေပါတယ်၊ အရင်နှစ်ပေါင်းများစွာက ရေအားစက်ရုံတွေတည်ဆောက်ဖို့ကိုပဲဇောင်းပေးခဲ့တာ အဆင့်မြင့်နည်းပညာတွေ၊လိုင်းသွယ်ဖို့တွေမစဉ်းစားခဲ့တာဘာကြောင့်ပါလဲခင်ဗျား၊ လိုအပ်မှန်းတော့သိကြမှာပါခင်ဗျား ၊ Non-technical Loss ဆိုတဲ့နေရာမှာ သက်ဆိုင်ရာဝန်ထမ်းအဆင့်ဆင့်ရဲ့မသမာမှုကြောင့်ဆုံးရှုံးတာကအများဆုံးလို့ထင်ပါတယ်၊ အဆင့်မြင့်နည်းပညာနဲ့ မီးကိုမထိန်းတော့နေရာတိုင်းမှာအဂတိလိုက်စားပြီးမီးခိုးပေးတာ စာရင်းမရှိပဲလိုင်းခိုးချိတ်တာတွေအများဆုံးဖြစ်မှာပါ၊မြို့တိုင်းမှာပြည်သူကဒါတွေပဲကြုံနေရတာပါ၊ဘယ်အဆင့်အထိပါလဲဆိုတာလဲသက်ဆိုင်ရာဝန်ထမ်းတွေအသိဆုံးဖြစ်မှာပါ၊ကျွန်တော်တို့ရန်ကုန်မှာအဆိုးဆုံးပါ၊ရန်ကုန်အတွက် အနည်းဆုံး MW 10000 လောက် ရအောင် အစီအစဉ်လေး တော့သွားမပြောပါနဲ့ဗျာ တရုတ်ကိုပေးမဲ့ပရောဂျက်ထဲကပဲပြန်ဝယ်မှရတော့မှာပါ၊ သူတို့မှာကျွန်တော်တို့ဆီကအများကြီရထားတာ(လုပ်ပြီးမှသိတာ)ကျွန်တော်တို့ဆီမှာ နေရာကောင်းတွေကိုတရုတ်ကလုပ်နေပြီလို့ထင်ပါတယ်၊သဘာဝပတ်ဝန်းကျင်တွေလဲ ချွတ်ခြုံကျနေပြီလေ၊အသစ်ထပ်လုပ်ဖို့ကတော့ရေအားလျှပ်စစ်နဲ့မဟုတ်ပဲတခြားနည်း၊ တခြားနည်းနဲ့မရရင်နေရာအသစ်တော့မဖေါ်ပါနဲ့ပါတော့ခင်ဗျာ၊ရွှေလီလိုပဲ ကိုယ်လှူတဲ့သွေးကိုကိုယ်ပဲပြန်ဝယ်သွင်းမှအဆင်ပြေမယ်ထင်ပါတယ်၊ရောင်းစားတာများပြီကိုယ်သုံးဖို့မရှိတာတွေကကျွန်တော်တို့နိုင်ငံရဲ့ရင်နာစရာဖြစ်စဉ်တွေပါအကိုရာ..ကျေးဇူးပါ၊
Post a Comment