ဆောင်းဦးလှိုင်နှင့် ရဲလွင်(မဇ္ဈိမလှိုင်း)တို့ ကို နာရေးကူညီမှု အသင်း၏ ရာသက်ပန် ဂုဏ်ထူးဆောင် အသင်းသားအဖြစ် ဂုဏ်ပြု

ရာသက်ပန် ဂုဏ်ထူးဆောင် အသင်းသားလက်မှတ် ပေးအပ်နေစဉ်

ဆောင်းဦးလှိုင်နှင့် ရဲလွင်(မဇ္ဈိမလှိုင်း)တို့အား နာရေးကူညီမှုအသင်း(ရန်ကုန်)မှ ရာသက်ပန် ဂုဏ်ထူးဆောင် အသင်းသားအဖြစ် နိုဝင်ဘာလ ၂၅ ရက်နေ့က အသိအမှတ်ပြု လက်မှတ် ပေးအပ်ခဲ့ကြောင်း သတင်းရရှိပါသည်။
“ကိုဆောင်းဦးလှိုင်နဲ့ ကိုရဲလွင် တို့က နာရေးကူညီမှု အသင်းရဲ့လုပ်ဆောင်ချက်တွေကို ယုံကြည်ပြီးအသင်းမှာ သူတို့တတ်ကျွမ်းကြတဲ့ အနုပညာနဲ့၊ ဂီတနဲ့ကူညီပံ့ပိုးပေးနေကြတာ ကြာပါပြီ။ အဲဒီအပြင် ကိုရဲလွင်ဆိုရင်လည်း ကျွန်တော်တို့နဲ့အတူ နာရေးလုပ်ဆောင်မှုတွေ လိုက်လုပ်ပေး ဖူးပါတယ်။ ဒါကြောင့် သူတို့ကို သာမန်အသင်းဝင်တွေနဲ့ မတူတဲ့ရာသက်ပန် ဂုဏ်ထူးဆောင် အသင်းသားအဖြစ် သီးသန့်အနေနဲ့ ပေးရတာပါ” ဟု နာရေးကူညီမှုအသင်း (ရန်ကုန်)မှဥက္ကဋ္ဌ ဦးကျော်သူက ရှင်းပြပါသည်။
အဆိုပါနေ့က ဂုဏ်ထူးဆောင် အသင်းသားအဖြစ် အသိအမှတ်ပြု လက်မှတ်ပေးအပ်မှုနှင့် အတူ ကိုဆောင်းဦးလှိုင်နှင့် မိတ်ဆွေများကလည်း အလှူငွေများ ပေးအပ်လှူဒါန်းမှုပြုခဲ့ကြောင်း သိရသည်။
နာရေးကူညီမှု အသင်းအား ၂၀၀၁ ခုနှစ် ဇန်န၀ါရီလ ၁ ရက်နေ့ မှ စတင်ဖွဲ့စည်းခဲ့ခြင်းဖြစ်ပြီး ယခုအခါ နာရေး အရေအတွက်ပေါင်း တစ်သိန်းကျော်ကို ကူညီခဲ့ပြီးဖြစ်သည်။

Eleven Media Group