ဘဏ်တိုးနှုန်းများ လျှော့ချ

အစိုးရက သတ်မှတ်ထားသည့် ဘဏ်တိုးနှုန်းများကို ၂ ရာခိုင်နှုန်းစီ လျှော့ချကြောင်း ယနေ့ ဗဟိုဘဏ်မှတဆင့် တရားဝင် အမိန့် ထုတ်ပြန် လိုက်သည်။

ဘဏ်တိုးနှုန်းများကို စုဆောင်းငွေ အတွက် တနှစ်လျှင် ၁၂ ရာခိုင်နှုန်းမှ ၁၀ ရာခိုင်နှုန်းသို့လည်းကောင်း၊ ချေးငွေအတွက် ၁၇ ရာခိုင်နှုန်းမှ ၁၅ ရာခိုင်နှုန်းသို့လည်းကောင်း ၂ ရာခိုင်နှုန်းစီ အသီးသီး လျှော့ချ သတ်မှတ်လိုက်ခြင်းဖြစ်ကြောင်း၊ ပုဂ္ဂလိကဘဏ်၊ အစိုးရဘဏ် အားလုံးအကျုံးဝင်ပြီး စက်တင်ဘာ ၁ ရက်မှစတင် သတ်မှတ်ကြောင်း ပုဂ္ဂလိကဘဏ် အသိုင်းအ၀န်းမှ သိရသည်။

ရန်ကုန်မြို့ရှိ ကမ္ဘောဇ ဘဏ်ခွဲတခု (ဓာတ်ပုံ - kbzbank.asia)

ဘဏ်တိုးနှုန်းများ လျှော့ချလိုက်ခြင်းသည် စီးပွားရေး လုပ်ငန်းရှင်များ လတ်တလော အရှုံးပေါ်နေခြင်းမှ သက်သာစေရေး၊ ကျဆင်း နှေးကွေးနေသည့် တိုင်းပြည်စီးပွားရေး ဦးမော့လာစေရေး၊ ဘဏ်များတွင် ရောက်ရှိနေသည့် ငွေများ ဈေးကွက်အတွင်းသို့ ပြန်လည် ရောက်ရှိစေရေး လုပ်ဆောင်ခြင်း ဖြစ်သည်ဟု ဘဏ်လုပ်ငန်းရှင် တဦးက ဆိုသည်။

“စီးပွားရေး သွက်လာအောင် လုပ်တာပါ။ အိမ်ပေါင်၊ ခြံပေါင်သမားတွေ နဲနဲတော့ သက်သာသွားတာပေါ့” ဟု ၎င်းက ဆိုသည်။

ယခုအခါ မြန်မာနိုင်ငံတွင် အိမ်နှင့်ခြံမြေ စသည်တို့ကို ဘဏ်များတွင် ပေါင်နှံကာ အလုပ်လုပ်ကိုင်သူ ပိုမိုများပြားလာသော်လည်း အရောင်းအ၀ယ်များမှာ တနိုင်ငံလုံး အတိုင်းအတာနှင့် ကျဆင်းလာသည့်အတွက် အိမ်ခြံမြေ ပေါင်နှံထားသူများအနေဖြင့် အတိုးပုံမှန် မပေးနိုင်ခြင်း၊ ပြန်လည်ရွေးယူနိုင်မှု မရှိခြင်း ပိုမိုများပြားလာသည်ဟုလည်း အဆိုပါ ဘဏ်လုပ်ငန်းရှင်က ပြောသည်။

ငါးလုပ်ငန်း အဖွဲ့ချုပ်မှ စီးပွားရေး လုပ်ငန်းရှင် ဦးလှမောင်ရွှေကလည်း ဘဏ်တိုးနှုန်းများ လျှော့ချခြင်းသည် လုပ်သင့် လုပ်ထိုက် သည့် လုပ်ရပ်တခု ဖြစ်ကြောင်း၊ ယခုထက်ပိုမိုပြီး ဘဏ်အတိုးနှုန်းများ လျှော့ချနိုင်လျှင် ငါးပုစွန် ရေထွက်ပစ္စည်းလုပ်ငန်း ပြည်ပ တင်ပို့မှုတွင် တခြားသောနိုင်ငံများနှင့် ယှဉ်ပြိုင်နိုင်မည်ဟု ထင်မြင်ကြောင်း ပြောသည်။

ယခုကဲ့သို့ ဘဏ်တိုးနှုန်းများ လျော့နည်းသွားသောကြောင့် ဘဏ်တွင်ငွေအပ်နှံသူ များအနေဖြင့် အတိုးနှုန်းရရှိမှု နည်းပါးသွား မည်ဖြစ်ကာ ဘဏ်တွင်အပ်နှံမှု လျော့ကျသွားမည်ဖြစ်သည်။ ထိုကြောင့် အမေရိကန်ဒေါ်လာနှင့် ရွှေကို ပိုမိုဝယ်ယူမှု များပြား လာနိုင်မည်ဖြစ်ပြီး ကျဆင်းနေသည့် အမေရိကန်ဒေါ်လာဈေးမှာလည်း ပိုမို မြင့်တက်လာမည် ဖြစ်သည်။

အမေရိကန်ဒေါ်လာ ဈေးနှုန်းသည် သြဂုတ်လကုန်ပိုင်းက တဒေါ်လာ ၆၇၆ ကျပ်အထိ ကျဆင်းခဲ့သော်လည်း ယမန်နေ့က တဒေါ်လာ ၇၅၀ ကျပ်အထိ တက်ခဲ့ပြီး ယနေ့တွင် တဒေါ်လာ ၇၇၀ ကျပ်အထိ ဈေးမြင့်တက်ခဲ့သည်။ ယနေ့ အကယ်ဒမီ အခေါက်ရွှေ တကျပ်သားဈေးမှာလည်း ကျပ် ၇ သိန်း ၁ သောင်း ကျော်သွားခဲ့သည်။

ပြီးခဲ့သည့် ရက်ပိုင်းက နေပြည်တော်တွင် ကျင်းပနေသည့် ပြည်သူ့လွှတ်တော်နှင့် အမျိုးသားလွှတ်တော် ၂ ရပ်စလုံးတွင် ငွေကြေးလဲလှယ်နှုန်း ကျဆင်းနေသည့် အတွက် ပို့ကုန်များ ကျဆင်းကာ တိုင်းပြည်စီးပွားရေး ထိခိုက်နေကြောင်း၊ ထို့ကြောင့် ငွေလဲနှုန်းကို ပြင်ဆင်သတ်မှတ်ရန်လိုအပ်လာ သဖြင့် အပြည်ပြည်ဆိုင်ရာ ငွေကြေးရန်ပုံငွေအဖွဲ့ (IMF) အကူအညီ လိုအပ်ကြောင်း ပြောဆို ဆွေးနွေးမှုများ ပြုလုပ်ခဲ့သည်။

IMF အဖွဲ့မှ ငွေကြေးဆိုင်ရာ ကျွမ်းကျင် ပညာရှင်များ လာမည့် အောက်တိုဘာလတွင် မြန်မာနိုင်ငံသို့ လာရောက်မည်ဟု သိရသည်။

အတည်မပြုနိုင်သေးသော သတင်းများအရ မြန်မာနိုင်ငံ ဗဟိုဘဏ်ကို ဘဏ္ဍာရေးနှင့် အခွန်ဝန်ကြီး ဌာန လက်အောက်တွင် ထားရှိတော့မည်မဟုတ်ဘဲ သီးခြားလွတ်လပ်သော ဗဟိုဘဏ်အဖြစ် ထားရှိရန် ပြုပြင်ဆောင်ရွက်မှုများ စတင်နေပြီဟု သိရသည်။

အစိုးရသစ်သည် ကျဆင်းနေသည့် မြန်မာ့စီးပွားရေးလုပ်ငန်းများ ပြန်လည်မြှင့်တင်ရန်အတွက် ပြီးခဲ့သည့် လအတွင်းက ဆန်၊ ပဲမျိုးစုံ၊ ပြောင်း၊ နှမ်း၊ ရော်ဘာ၊ ရေချိုရေငန်ထွက် ပစ္စည်းများ၊ တိရစ္ဆာန်နှင့် တိရစ္ဆာန်ထွက် ပစ္စည်းများ ပြည်ပ တင်ပို့မှုအပေါ် ၆ လ ကုန်သွယ်ခွန် စည်းကြပ်ခြင်း မပြုတော့ဟု အမိန့်ထုတ်ပြန်ခဲ့သေးသည်။