ဗိုလ်ချုပ်မှူးကြီး သန်းရွှေ စစ်တပ်ရာထူးမှ အနားယူမယူ အတည်မပြုနိုင်သေး

ခင်နှင်းလွင်၊ ရန်ကုန်

ဧပြီ ၈ ၊ ၂၀၁၁

မကြာမီရက်ပိုင်းက ဖျက်သိမ်းခဲ့သည့် နအဖ အစိုးရ၏ နံပါတ်တစ် ခေါင်းဆောင် ဗိုလ်ချုပ်မှူးကြီး သန်းရွှေနှင့် ဒုတိယခေါင်းဆောင် ဒု-ဗိုလ်ချုပ်မှူးကြီး မောင်အေးတို့နှစ်ဦးမှာ တပ်မတော်မှ အနားယူမယူ ဆိုသည့်အချက်ကို မည်သူမျှ အတည်မပြုနိုင်သေးဟု ပြည်တွင်း သတင်းမီဒီယာနယ်ပယ်တွင် ပြောဆိုလျက်ရှိသည်။

မတ်လ ၃၀ ရက်နေ့ နအဖ အစိုးရ အဖွဲ့ကို ဗိုလ်ချုပ်မှူးကြီး သန်းရွှေ လက်မှတ်ဖြင့် ဖျက်သိမ်းခဲ့ပြီးနောက် ကာကွယ်ရေး ဦးစီးချုပ်ရာထူးကို ဗိုလ်ချုပ်ကြီး မင်းအောင်လှိုင်အား ခန့်အပ်ခဲ့သော်လည်း နအဖ နံပါတ် ၁နှင့် ၂ ခေါင်းဆောင်တို့မှာ တပ်ရာထူးမှ တရားဝင် အနားယူခြင်းရှိမရှိ မကြေညာသေးပေ။

၃၀ ရက်နေ့ ကြံ့ဖွံ့အစိုးရသစ် အာဏာလွှဲပြောင်းယူပြီးနောက် ဖွဲ့စည်းခဲ့သည့် အမျိုးသားကာကွယ်ရေးနှင့် လုံခြုံရေးကောင်စီတွင်လည်း ထိပ်ဆုံးခေါင်းဆောင် ၂ ဦး၏ အမည်ပါရှိခြင်းမရှိပေ။ အဆိုပါလုံခြုံရေး ကောင်စီကို သမ္မတ၊ ဒုသမ္မတ၊ လွှတ်တော်ဥက္ကဌ ၂ ဦးနှင့်အတူ ကာကွယ်ရေး ဦးစီးချုပ်နှင့် ဒုကာကွယ်ရေး ဦးစီးချုပ်၊ အခြားပြည်ထောင်စု ၀န်ကြီး ၄ ဦးတို့ဖြင့် ဖွဲ့စည်းခဲ့ခြင်းဖြစ်သည်။

ယခုကဲ့သို့ ကြံ့ဖွံ့အစိုးရသစ် တာဝန်လွှဲခြင်းမပြုမီက ဗိုလ်ချုပ်မှူးကြီး သန်းရွှေနှင့် ဒုဗိုလ်ချုပ်မှူးကြီး မောင်အေးတို့ ၂ ဦးမှာ အမျိုးသားကာကွယ်ရေးနှင့် လုံခြုံရေးကောင်စီတွင် ပါဝင်ပြီး အစိုးရအာဏာကို ကြိုးကိုင်လိမ့်မည်ဆိုသည့် တွေးဆချက်များ၊ နိုင်ငံဥသျှောင်အဖွဲ့ဖွဲ့စည်းပြီး အပေါ်ဆုံးမှ အာဏာကို ထိန်းချုပ်ကိုင်တွယ်သွားမည် ဆိုသည့် ယူဆချက်များ ပေါ်ထွက်ခဲ့သည်။

သို့သော် ကြံ့ဖွံ့အစိုးရသစ် အာဏာလွှဲယူပြီး တစ်ပတ်ကြာသည့် ယခုအချိန်ထိ အဆိုပါ ခေါင်းဆောင် ၂ ဦးကို တရားဝင် အခမ်းအနား၊ ပွဲများ၊ တွေ့ဆုံခြင်းများ တခုတလေမှ မတွေ့ရသေးပေ။

ရုံးများ၊ ၀န်ကြီးဌာနများတွင်မူ ဗိုလ်ချုပ်မှူးကြီး သန်းရွှေ၏ ဓါတ်ပုံကို ယခုအချိန်ထိ ချိတ်ဆွဲထားဆဲ ဖြစ်သည်။ အစိုးရပိုင် သတင်းစာများ၏ မျက်နှာဖုံးစာမျက်နှာ အပေါ်ဆုံးတွင် ယခင်တောက်လျှောက်ဖေါ်ပြခဲ့သည့် ဗိုလ်ချုပ်မှူးကြီး သန်းရွှေ၏ မိန့်ခွန်း ကောက်နှုတ်ချက်များကို အာဏာလွှဲပြောင်းခြင်း မပြုမီ ရက်ပိုင်းအလိုမှစပြီး ယခုအချိန်ထိ  ဖေါ်ပြခြင်းမပြုတော့ပဲ ရပ်ဆိုင်းထားသည်။