ရှမ်းမြောက် မူဆယ်ဆန္ဒပြ CDM ဝန်ထမ်းများ ခြိမ်းခြောက်ခံနေရ

People take part in a demonstration against the February 1 military coup, along a street in the town of Muse in Shan state, near the China-Myanmar border on February 8, 2021. (Photo by STR / AFP)

ရှမ်းပြည်နယ်မြောက်ပိုင်း မူဆယ်မြို့မှာ စစ်အဏာရှင်ဆန့်ကျင်ရေး သပိတ်မှောက်ဆန္ဒပြမှုတွေ နေ့စဉ်ရှိနေချိန်မှာပဲ CDM လုပ်တဲ့ ဝန်ထမ်းတချို့ ခြိမ်းခြောက်မှုတွေကြုံနေရပါတယ်။ ဒီအကြောင်း ဗွီအိုအေသတင်းထောက် နိုင်ကွန်းအိန် သတင်းပေးပို့ထားပါတယ်။

မူဆယ်မြို့မှာ ဆန္ဒပြနေကြတဲ့ ဝန်ထမ်းတချို့ကို လက်နက်ကိုင်အဖွဲ့တချို့ကနေ ခြိမ်းခြောက်နေတယ်လို့ ဝန်ထမ်း တဦးကပြောပါတယ်။

“ကျနော်တို့ ဒီသပိတ်စစ်ကြောင်းက ပုံမှန်ပဲသွားနေကြတယ်။ CDM လုပ်နေတဲ့ဆရာ ဆရာမတွေကို တက်တိုင် ထားတယ်။ စာနဲ့တက်တိုင်ထားတယ်လို့ အယောက် (၃၀) လားမသိဘူး။ ပြည်သူ့စစ်နှစ်ဖွဲ့ထင်တယ်။ ဦးမျိုးခိုင်ရယ် ပရဟိတအသင်းအဖွဲ့တခုပေါ့နော်။ ပြီးတော့ နောက်ထပ်တယောက်က ကိုအောင်ဂျာတဲ့။ သူက မုန်းပေါ်ပြည်သူ့ စစ် အဖွဲ့ဝင်ပေါ့နော်။ ပြီးတော့သူက ကြံ့ခိုင်ရေးအဖွဲ့ထဲမှာ ပါတယ်။ ပြီးတော့ဒီ တာမိုးညဲကလို့ ပြောပာတာပဲ။”

မူဆယ်မြို့မှာ သပိတ်မှောက်ဆန္ဒပြမှုတွေ နေ့စဉ်ရှိနေပေမဲ့ သပိတ်ဖြိုခွင်းမှုတွေတော့ မရှိသေးဘူးလို့ ဆိုပါတယ်။

မတ်လ (၄) ရက်နေ့ကလည်း မူဆယ်မြို့ဆေးရုံဝင်းထဲမှာ လက်နက်ကိုင်အဖွဲ့တခုကနေ ဆန္ဒဖော်ထုတ်ကျန်းမာရေး ဝန်ထမ်းတွေကို လာခြိမ်းခြောက်နေတယ်လို့ မြို့ခံတဦးဖြစ်သူကိုစိုင်းငယ်က ဆိုပါတယ်။

“CDM ဝန်ထမ်းတွေကို (၄) ရက်က သူတို့ဆေးရုံဝင်းပေါက်မှာလာပိတ်ပြီး အယောက် (၃၀) လောက်ပေါ့။ အင်အား (၃၀) လောက်နဲ့ ဖိအားပေးတယ်ပေါ့ဗျာ။ ဒီဆေးရုံဆင်းဖို့ဖိအားပေးတဲ့အချိန်မှာ သူတို့ (၁၅) မိနစ်လောက်နေပြီးအခါကျတော့ အဲဒီရပ်ကွက်က တောင်ရပ်ကွက်ပြည်သူတွေအများစု ထွက်လာပြီးတော့ သံပုံးတီးပြီးတော့ သူတို့ ကို မောင်းထုတ်တယ်ပေါ့နော်။ မောင်းထုတ်တဲ့အချိန်မှာ ကားပေါ်တက်ပြီးတော့ ကျနော်တို့ ပြည်သူထဲကတယောက်ပြောတာတော့ ကားထဲကနေပြီးတော့ သူ့ကို သေနတ်ထောင်ပြတယ်ပေါ့။ အဲဒီမှာရုပ်ရုပ်သဲသဲတော့ ဖြစ်သွားတာပေါ့။ ရဲအင်အား (၃၀)(၄၀) ရောက်လာပြီးတော့ လူစုခွဲပေါ့နော်။ အဲဒီကားတွေကို လမ်းကြောင်းရှင်းပေးလိုက်တဲ့ အနေအထားပေါ့။ အဲဒီတော့ကား (၃) စီးမှာ (၂) စီးလွတ်သွားတယ်။ တစီးကတော့ရဲစခန်း ရောက်သွားတယ်ပေါ့။”

ဒါပေမဲ့ ဖေဖော်ဝါရီလကုန်တုန်းက စစ်အာဏာသိမ်းမှုဆန့်ကျင်ရေး ဆန္ဒပြလူအုပ်ကြားထဲကို ဒေသခံလက်နက်ကိုင်အဖွဲ့လို့ယူဆရတဲ့ မော်တော်ယဉ်တစင်း ဝင်ရောက်လာပြီး နှစ်ဘက်ရုန်းရင်းဆန်ခတ်ဖြစ်ခဲ့ပါတယ်။ အဲဒီမှာ ပြန်လည်အကြမ်းဖက်တယ်လို့ ယူဆရသူတဦးကို ဆန္ဒပြသူတွေကပဲဖမ်းပြီး ရဲတပ်ဖွဲ့လက်ထဲ အပ်နှံခဲ့ရာမှာ အဲဒီလူဟာ ရဲအချုပ်ထဲမှာပဲ သေဆုံးသွားခဲ့ပါတယ်။

သေဆုံးသူဟာ မူဆယ်မြို့နေ ကိုသိန်းလွင်ဖြစ်ပြီး ဒီကနေ့မွန်းလွဲပိုင်းမှာ သြင်္ဂိုဟ်လိုက်ပြီးဖြစ်ပါတယ်။

ရဲစခန်းမှာထိန်းသိမ်းခံရစဉ်အတွင်းလူသေဆုံးတဲ့အထိဖြစ်ပွါးတဲ့အပေါ် မိသားစုဝင်တဦးက အခုလိုပြောပါတယ်။

“တကယ်တော့သူ ဒလန်လည်း မဟုတ်ပါဘူး။ ရိုးရိုးပြည်သူတွေပါပဲ။ အဓိကတော့ ဒီ ရဲတွေရဲ့ သူတို့ထိန်းသိမ်းထားတဲ့လူတွေအပေါ်မှာ ကျူးလွန်နေတဲ့ ဒီလူ့အခွင့်အရေးချိုးဖောက်မှုပေါ့။ အဲဒီလောက်အထိ သေလောက်တဲ့အထိ နှိပ်စက်တဲ့ကိစ္စပေါ့နော်။ အဲဒါကို ကျနော်တို့က အများပြည်သူကို သိစေချင်တယ်။”

ရှမ်းပြည်နယ်အတွင်း တောင်ကြီး၊ လားရှိုး၊ တာချီလိတ်၊ မူဆယ်မြို့နယ်တွေမှာ ဆန္ဒဖော်ထုတ်မှုဖြစ်စဉ်အတွင်း လူ (၅၀) ကျော်အဖမ်းဆီးခံရပြီး (၅) ဦးခန့် ထိခိုက်ဒဏ်ရာရရှိခဲ့တယ်လို့ ရှမ်းပြည်နယ်အခြေစိုက် ရှမ်းသံတော်ဆင့်သတင်း ဌာနအယ်ဒီတာတဦးက ဆိုပါတယ်။

တပ်မတော် အာဏာထိန်းသိမ်းခဲ့တဲ့ ဖေဖော်ဝါရီ တလတာအတွင်း ဖမ်းဆီး၊ တရားစွဲ ပြစ်ဒဏ်ချခံရသူ ၁,၂၁၃ ဦး ရှိပြီဖြစ်သလို အကြမ်းဖက် ဖြိုခွင်းခံရလို့ ကျဆုံးသွားခဲ့သူ ၃၀ ဦးခန့် ရှိခဲ့တယ်လို့ နိုင်ငံရေး အကျဉ်းသားများ ကူညီစောင့်ရှောက်ရေးအသင်း (AAPP) က စာရင်းထုတ်ပြန်ထားပါတယ်။

ကိုနိုင်ကွန်းအိန်/ VOA Burmese

https://burmese.voanews.com/a/myanmar-military-coup-cdm-muse-shan-northen-nai-kunenn-/5804257.html