ရန်ကုန်ဆန္ဒပြမှုများ အကြမ်းဖက်ဖြိုခွဲခံရ၊ လမ်းပေါ်ထွက်သူတချို့ ဖမ်းဆီးခံရ

ရန်ကုန်ဆန္ဒပြမှု မြင်ကွင်း။ (မတ် ၂၊ ၂၀၂၁)

ရန်ကုန်မြို့မှာ စစ်အာဏာရှင်ဆန့်ကျင်သူတွေကို စစ်တပ်နဲ့ ရဲက ရက်ဆက်ဆိုသလို ပစ်ခတ် ဖမ်းဆီးပြီး အကြမ်းပတမ်းနှိမ်နင်းနေပေမဲ့ ဆန္ဒပြမှု ပိုမို အရှိန်မြင့်နေပါတယ်။ ရန်ကုန်ရဲ့ အခြေအနေကို ဗွီအိုအေမြန်မာပိုင်း သတင်းထောက် မအဂ္ဂနွန်က တင်ပြပေးမှာပါ။

ရန်ကုန်မြို့ လှည်းတန်း၊ မြေနီကုန်း၊ တာမွေ၊ ယုဇနပလာဇာ အင်းစိန်လမ်းမပေါ်စတဲ့ သပိတ်စစ်ကြောင်း နေရာတွေကို စစ်တပ်နဲ့ ရဲက မျက်ရည်ယိုဗုံး၊ အသံဗုံး၊ ရာဘာကျည်တွေနဲ့ ပစ်ခတ်ဖြိုခွဲနေတာပါ။

ရန်ကုန်ဆန္ဒပြပွဲ မြင်ကွင်း။ (မတ် ၂၊ ၂၀၂၁)

ဆန္ဒပြစုရပ်နေရာ အတော်များများမှာ စစ်တပ်နဲ့ ရဲအင်အား ပိုမိုတင်းကြပ်ထားချပြီး ဖြိုခွဲတဲ့နေရာမှာလည်း မျက်ရည်ယိုဗုံး၊ အသံဗုံး ရာဘာကျည်တွေ ပိုမိုသုံးလာတာ တွေ့ရတယ်လို့ ဆန္ဒပြသူတွေက ပြောကြပါတယ်။

အင်းစိန်လမ်းမက သပိတ်စစ်ကြောင်းကိုလည်း မနက်အစောပိုင်းကတည်းက အသံဗုံး၊ မျက်ရည်ယိုဗုံး အများအပြား သုံးပြီး အကြမ်းဖက်ဖြိုခွဲနေတာပါ။ အဲ့ဒီသပိတ်စစ်ကြောင်းမှာ ရောက်နေတဲ့ သတင်းထောက်တစ်ဦးက ကိုယ်တိုင်းကြုံတွေ့ခဲ့တဲ့ အခြေအနေကို အခုလိုပြောပါတယ်။

“မနက် ၉ နာရီလောက်က စတယ်၊ စပြီးတော့ သူတို့တွေက ၂ နာရီလောက်နေမှပေါ့... စပြီး ၂ နာရီလောက်နေမှ သပိတ်စဖြိုခွဲတယ်ပေါ့နော်။ ဖြိုခွဲတဲ့ ပုံစံက အရင်ရက်တွေကနဲ့ မတူဘဲ ဒီနေ့ အင်အားပိုသုံးတယ်ပေါ့နော်။ မျက်ရည်ယိုဗုံးတွေလည်း ပိုများသုံးတယ်။ ပြီးတော့ တစ်ခါတည်း သူတို့မရပ်ဘူးပေါ့နော်... တောက်လျှောက်ကို ရဲအင်အား စစ်တပ်အင်အားနဲ့ ဝင်ပြီးတော့ သပိတ်တွေကို ဖြိုခွဲတယ်ပေါ့နော်။ ဒီနေ့အကုန်လုံးက ပြန်ပြီးတော့တောင် ဆန္ဒပြန်ပြချိန် မရလိုက်ဘူး။ တစ်ခါတည်း ပြေးလိုက်ရတယ်ပေါ့နော်။ ပြေးပြီးသွားလို့ သက်ဆိုင်ရာ နီးရာနီးရာအိမ်တွေထဲမှာ ပုန်းနေကြတယ်။ ပြီးတော့ အဲ့ဒီစစ်သားကလူတွေ၊ ရဲက လူတွေနဲ့ လမ်းတွေပေါ်မှာ ပြန်ပြီးတော့ စောင့်နေကြတယ်ပေ့ါနော်။ အခုမှာပဲပြန်ထွက်လာကြတယ်။ ကျနော်လည်း အခုမှထွက်လာရတယ်။”

အလာတူပဲ စမ်းချောင်းမြို့နယ်၊ ဗားကရာလမ်း၊ ကျွန်းတောလမ်း၊ မြေနီကုန်းတစ်ဝိုက်မှာ စစ်တပ်နဲ့ ရဲအင်အား အမြောက်အများချထားပြီး ပစ်ခတ်ဖြိုခွင်းလို့ ရာဘာကျည် ထိမှန်သူတွေရှိသလို အဖမ်းခံရသူ ၃ ဦးထက်မနည်း ရှိနေတယ်လို့ အဲ့ဒီမှာ သတင်းယူနေတဲ့ သတင်းထောက်တဦးက ပြောပါတယ်။

“ဒီနေ့ကတော့ အခါတိုင်းရက်တွေလိုပဲ ကျွန်းတောလမ်း၊ ပဒုမ္မာလမ်း၊ ဗားကရာလမ်း၊ ဒီလမ်းတွေပေါ်မှာ ဆန္ဒပြကြတယ်။ မနေ့ကလိုပဲ၊ ဟိုတစ်နေ့ကလိုပဲ အကာတွေနဲ့ အကာတွေ တဆင့်၊ နှစ်ဆင့်ခံပြီးတော့ ဆန္ဒပြကြတယ်။ ၁၁ နာရီကျော်၊ ၁၁ နာရီဝန်းကျင်ကျတော့ ရဲတွေက ဝင်လာပြီးတော့ အသံဗုံးတွေ ဖောက်တယ်။ မျက်ရည်ယိုဗုံးတွေ ဖောက်တယ်။ ဖောက်ပြီးတော့ လူစုခွဲတာပေါ့။ လူစုခွဲပြီးတော့ ဆန္ဒပြတဲ့ လူကို ဖမ်းတယ်။ ကျွန်းတောလမ်းက သုံးယောက်ပါသွားတယ်။ ပဒုမ္မာလမ်းမှာ အဲ့ဒီလို လူစုခွဲလိုက်တယ်။ ဒါပေမဲ့ ဘယ်နှယောက်ပါလည်းဆိုတာ စာရင်းမသိသေးဘူး။ ညနေ ၃ နာရီကျော်ကျော်လောက်ကျတော့ လူစုခွဲသွားကြတယ်။”

ဆန္ဒပြသူတွေဆီ စစ်တပ်နဲ့ ရဲတပ်ဖွဲ့တွေ အလွယ်တကူ မဝင်ရောက်နိုင်အောင် အကာအရံတွေ ပိတ်ထားတာကို ရဲက မြေကော်စက်တွေနဲ့ ဖယ်ရှားခဲ့ပါတယ်။

မနေ့ကလည်း စမ်းချောင်းမြို့နယ် ဗဟိုလမ်းပေါ်မှာ အာဏာသိမ်း စစ်တပ်ဆန့်ကျင်သူတွေကို အကြမ်းဖက် ပစ်ခတ်ဖြိုခွဲတာ၊ အိမ်ပေါ်ထောင်ပစ်တာတွေ ကျမကိုယ်တိုင် မြင်တွေ့ခဲ့ရပါတယ်။

ဒီကနေ့မှာလည်း တာမွေဘက်က ဆန္ဒပြ လူအုပ်ထဲ အရပ်ဝတ်တစ်ဦး ဝင်လာပြီး မျက်ရည်ယိုဗုံး ပစ်ဖောက်လို့ အနီးအနားလူတွေ ထိခိုက်တာတွေ ရှိတယ်လို့ ဆန္ဒပြသူတစ်ဦးက ပြောပါတယ်။

“မနက်ကရှင် မနက် ၁၁ နာရီ ၁၀ မိနစ်က စပြီး မျက်ယိုရည်ဗုံးခွဲပါတယ်။ အရင်နေ့ကထက်ဆိုးလား ဟုတ်၊ မျက်ရည်ယိုဗုံးခွဲတာတော့ ဆိုးတယ်လို့ပြောတယ်။ ပြီးတော့ ဒီနေ့ မျက်ရည်ယိုဗုံးကိုပေါ့နော်.. လူစုအုပ်ထဲကနေပြီးတော့ အရပ်ဝတ်နဲ့ စစ်သားကနေပြီးတော့ ခွဲသွားပြီး ဒီဘက်က နည်းနည်းလေး ပိုထိသွားတယ်ရှင်။ ညီမတို့က ဒီဟာကို မြန်မာနိုင်ငံရဲ့ စစ်တပ်၊ ရဲတပ်ဖွဲ့လို့ မသတ်မှတ်တော့ပါဘူး၊ ဒါအကြမ်းဖက်သဘော မြို့ပေါ်တက်ပြီးတော့ လူသတ်၊ ဓားပြတိုက်၊ ပစ္စည်းလုနေတယ်လို့ အဲ့ဒီလိုပဲ သတ်မှတ်ပါတော့တယ်။”

စစ်တပ်ကို ဆန့်ကျင်သူတွေသာမက လမ်းသွားလမ်းလာသူတွေလည်း ရိုက်နှက်ဖမ်းဆီးနေတာလည်း ရှိပါတယ်။ ဒီမနက် လှည်းတန်းလမ်းဆုံမှာ အသက် ၆၀ နှစ်အထက် အမျိုးသားတစ်ဦး အဖမ်းခံရတဲ့ အခြေအနေကို မိသားစုဝင် ဒေါ်ခင်လေးက အခုလို ပြောပါတယ်။

“မနက်ကတော့ ကျမတို့ အဖေက ဆန္ဒပြတဲ့ လူတော့ မဟုတ်ဘူးရှင့်။ သူက ဖြိုခွဲတာလည်း မဟုတ်ဘူး။ ကျမတို့အဖေက မနက်ဆိုလို့ရှိရင် လက်ဖက်ရည်ထွက်သောက်တယ်ရှင်။ လက်ဖက်ရည်ထွက်သောက်တော့ အိမ်ကနေပြီးတော့ အဖေက လှည်းတန်းလမ်းအပေါ်လမ်း လမ်းဆုံမှာနေတာဆိုတော့ ကားကို ရှေ့ကို ထွက်ပြီးတော့ ကွေ့တာနဲ့ ကားရပ်ပြီး အဖမ်းခံလိုက်ရတာ။ ဘာကြောင့် အဖမ်းခံတာလဲ။ သပိတ်ကြောင်းကို ဖြိုခွဲတာလားဆိုတာ ကျမတို့ ရှင်းရှင်းလင်းလင်းမသိပါဘူးရှင်။ လှည်းတန်းလမ်းရဲ့ တစ်ဘက်ခြမ်းမှာရှိတဲ့ အဖေရော ညာတစ်ဘက်ခြမ်းမှာရှိတဲ့ အန်တီဒေါ်ခင်ခင်ထွေးကိုရော ဖမ်းသွားတာပါရှင်။”

ဒီကနေ့မှာတော့ ရန်ကုန်မြို့မှာ စစ်တပ်နဲ့ ရဲတပ်ဖွဲ့က အကြမ်းဖက်ဖြိုခွဲရာ ဒဏ်ရာရှိသူနဲ့ အဖမ်းအဆီးတွေ ရှိခဲ့ကြောင်း ရပ်ကွက်နေပြည်သူတွေက ပြောပေမဲ့ ဗွီအိုအေဘက်က သီးခြားအတည်မပြုနိုင်သေးပါဘူး။

အဂ္ဂနွန်/ VOA Burmese

https://burmese.voanews.com/a/yangon-myanmar-military-coup-protest/5798289.html