ကလေးမြို့ဆန္ဒပြမှုအကြမ်းဖက်ဖြိုခွဲခံရ၊ ဆန္ဒပြသူ နှစ်ဦး ဒဏ်ရာပြင်းထန်

ကလေးမြို့ဆန္ဒပြပွဲ မြင်ကွင်း။ (ဓာတ်ပုံ - Citizen Journalist - မတ် ၂၊ ၂၀၂၁)

စစ်ကိုင်းတိုင်း ကလေးမြို့က ဆန္ဒပြသူတွေကို အကြမ်းဖက်ဖြိုခွင်းတာကြောင့် လူတဒါဇင်လောက် ထိခိုက်ဒဏ်ရာရရှိပြီး လူ နှစ် ဦးကတော့ စိုးရိမ်ရတဲ့ အခြေအနေမှာ ရှိနေပါတယ်။ ဒီသတင်းကို ဗွီအိုအေမြန်မာပိုင်း သတင်းထောက် မအေးအေးမာက တင်ပြပေးပါမယ်။

စစ်ကိုင်းတိုင်း ကလေးမြို့မှာတော့ စစ်အာဏာရှင်ဆန့်ကျင်ရေးဆန္ဒပြပွဲတွေကို လုပ်ခဲ့ရာမှာတော့ ဒီကနေ့မှာတော့ အကြမ်းဖက်ဖြိုခွဲခဲ့ပြီး သေစေနိုင်တဲ့ သေနတ်တွေနဲ့ ပစ်ခတ်တာကြောင့် လူ နှစ် ဦးဟာ ဒဏ်ရာပြင်းထန်ရရှိပြီး ခွဲစိတ်ကုသမှုခံယူနေရဆဲဖြစ်ကြောင်း ဆန္ဒပြပွဲကိုဦးဆောင်သူ တဦးဖြစ်တဲ့ တကသ တက္ကသိုလ်ကျောင်းသားမျာသမဂ္ဂဥက္ကဋ္ဌ ကိုဝေနိုင်ဦးက အခုလိုပြောပြပါတယ်။

"လက်ရှိမှာတော့ ဆုံးတာတော့ မဟုတ်သေးဘူး။ အော်ပရေးရှင်းလုပ်ထားရတယ်။ လက်ရှိစိုးရိမ်ရတဲ့ သူ နှစ် ဦးရှိပါတယ်။ ဗိုက်ကို ကျည်ဆံထိတဲ့အတွက်ဒီတော့ ရွိုင်ရယ်စီးတီးဆေးရုံမှာ အော်ပရေးရှင်း လုပ်နေပါတယ်။ တစ်ဦးက ဗိုက်မှာမှန်ထားပါတယ်။ တဦးက ရင်ဘတ်နဲ့ ချိုင်းအောက်ကို မှန်ထားပါတယ်။ တကယ်ကျည်ဆံအစစ်နဲ့ ပစ်တာပါခင်ဗျာ။"

ကလေးမြို့ဆန္ဒပြပွဲ မြင်ကွင်း။

ဒဏ်ရာပြင်းထန်စွာရထားတဲ့ လူနာကိုတော့ နီးစပ်ရာဆေးခန်းမှာ ယာယီပို့ထားချိန် စစ်တပ်က လာရောက်ခေါ်ဆောင်ဖို့ ကြိုးစားတာတွေ ရှိတယ်လို့လည်း ကျောင်းသားတွေက ဆိုပါတယ်။

ဆန္ဒပြသူတွေဟာ အရင်နေ့တွေတုန်းကလည်း ငြိမ်းငြိမ်းချမ်းချမ်း ဆန္ဒပြနေကြတာဖြစ်ပြီး မျက်ရည်ယိုဗုံးတွေနဲ့ ဖြိုခွင်းတာတွေ ရှိပေမဲ့ ဒီကနေ့မှာတော့ ပစ်ခတ်ပြီး အကြမ်းဖက်ဖြိုခွင်းတာတွေကို လုပ်လာတယ်လို့ သပိတ်စစ်ကြောင်းမှာ ပါတဲ့ တက်ကြွလုပ်ရှားသူ ဒေသခံအမျိုးသမီးတဦးကပြောပြပါတယ်။

"ကျမတို့ လူထုက ဆန္ဒပြတယ်ဆိုတာ ငြိမ်းချမ်းစွာ ဆန္ဒပြတယ်။ ကျမတို့ ပြည်သူမှာက ဘာလက်နက်မှ မပါဘူး။ ငြိမ်းချမ်းစွာ ကိုယ်လိုချင်တဲ့ ပန်းတိုင်ကိုသွားကြတယ်။ ကျမတို့က အကြမ်းဖက်ဖို့ ရည်ရွယ်ချက်မရှိဘူး။ ရဲတွေက ကျမတို့ သပိတ်စစ်ကြောင်းလာတဲ့အချိန်မှာ တားတယ်။ မျက်ရည်ယိုဗုံးတွေ၊ အသံမြည်ဗုံးတွေနဲ့ ပစ်တယ်။ ရေတွေနဲ့လည်းဖြိုခွဲတယ်။ အနည်းငယ်နောက်ဆုံးချိန်မှာ သူတိုက ရဲတွေ အချုပ်ကားတွေနဲ့ တက်ပြီး လူတွေကို ရိုက်နှက်တာတွေ လုပ်လာတယ်။ လူထုကလည်း ဒိုင်းတွေနဲ့ ကာကြတယ်။ အဲဒီအချိန်မှာ ရုန်းရင်းဆန်ခတ်ဖြစ်ပြီး ပစ်ခတ်မှုတွေ ဖြစ်သွားတယ်။ ပထမပိုင်းကတော့ ရဲတွေက ရှေ့က နေရာယူတယ်။ စစ်တပ်ကတော့ နောက်ကပစ်တယ်လို့ ယူဆရပါတယ်။ လူတွေကလည်း အရမ်းရှုပ်နေတော့လေ။ ဒဏ်ရာရတာ ၁၆ ဦးလောက်ရှိတယ်။ စိုးရိမ်ရတာ နှစ် ဦးရှိတယ်ရှင့်။

ကလေးမြို့မှာတော့ သေနတ်တွေနဲ့ အကြမ်းဖက်ဖြိုခွင်းတာ တလအတွင်း ပထမဦးဖြစ်ပြီး ဆန္ဒပြသူတွေဟာ ထိပ်တိုက်မတွေ့ဘဲ ရှောင်ကြပေမဲ့ မြို့လယ်ခေါင်မှာ ဆုံကြပြီး ပစ်ခတ်မှုတွေဖြစ်ပွားခဲ့တာလို့ ကလေးမြို့ခံတဦးကလည်း ပြောပြပါတယ်။

"ပထမပိုင်းက လူထုတွေက ရှောင်ကြတယ်။ လမ်းကြားကပဲ သွားတယ်။ နောက်တော့ လမ်းဆုံ တခုပဲရှိတယ်။ လမ်းဆုံံကြတော့ ဆုံကြတယ်။ သွားဆုံပြီးတော့ လူထုကလည်း သူတို့ ဝင်မလာအောင်ကာကြတယ်။ ကလေးမြို့လမ်းဆုံက တခုပဲ။ အဲဒီနေရာက မြို့လယ်ခေါင်လိုဖြစ်နေတာ။ အဲဒီမှာပဲ စုရပ်ရှိတာကိုး။"

မြန်မာနိုင်ငံမှာ စစ်အုပ်ချုပ်ရေးကောင်စီ တက်လာပြီးကတည်းက ဆန္ဒပြမှုတွေ ဆက်တိုက်ဖြစ်နေရာမှာ စစ်ကိုင်းတိုင်း ကလေးမြို့မှာလည်း လူငယ်ကျောင်းသားတွေ၊ ဒေသခံတွေက နေ့စဉ်နီးပါး ကန့်ကွက်ဆန္ဒပြနေကြတာ ဖြစ်ပါတယ်။

 မအေးအေးမာ/ VOA Burmese

https://burmese.voanews.com/a/myanmar-military-protest-in-kalay-sagaing/5798235.html