ရွေးကောက်ခံအစိုးရထံ အာဏာပြန်အပ်ဖို့ G-7 တောင်းဆို

မြန်မာနိုင်ငံမှာ အာဏာသိမ်းမှု ဖြစ်ပွားအပြီး နိုင်ငံရေး ခေါင်းဆောင်တွေ ထိန်းသိမ်းခံနေရတာကို အထူးစိုးရိမ် ပူပန်နေတဲ့ G-7 အဖွဲ့ နိုင်ငံခြားရေးဝန်ကြီးတွေက မြန်မာနိုင်ငံမှာ ထုတ်ပြန်ထားတဲ့ အရေးပေါ် အခြေအနေကို ချက်ချင်းရပ်ဆိုင်းပစ်ဖို့နဲ့ ဒီမိုကရေစီနည်းအရ ရွေးချယ်ခံ အစိုးရကို ပြန်လည် အာဏာ ပေးအပ်ဖို့ တောင်းဆိုလိုက်ပါတယ်။

ကနေဒါ၊ ပြင်သစ်၊ ဂျာမနီ၊ အီတလီ၊ ဂျပန်၊ ယူကေနဲ့ အမေရိကန်နိုင်ငံနဲ့အတူ ဥရောပ သမဂ္ဂ EU က ကိုယ်စားလှယ်တို့က ပူးတွဲထုတ် ပြန်ချက်တစ်စောင်ကို မြန်မာစစ်တပ်က အာဏာသိမ်းအပြီး ပထမဆုံးအကြိမ်အဖြစ် ဗုဒ္ဓဟူးနေ့မှာထုတ်ပြန်လိုက်တာလည်းဖြစ်ပါတယ်။

အရေးပေါ် အခြေအနေကို ချက်ချင်း ရုပ်သိမ်းဖို့၊ အာဏာပြန်လွှဲပေးဖို့နဲ့ ဖမ်းဆီးထားသူတွေကို ပြန်လွှတ်ပေးဖို့အပြင် လူ့အခွင့်အရေးနဲ့ တရားဥပဒေ စိုးမိုးရေးကို လေးစားလိုက်နာဖို့ကိုလည်း G7 နိုင်ငံခြားရေးဝန်ကြီးတွေကို တောင်းဆိုထားပါတယ်။

နိုဝင်ဘာလ ရွေးကောက်ပွဲ ရလဒ်ကို လေးစားလိုက်နာရမှာ ဖြစ်ပြီး လွှတ်တော်ကို အမြန်ဆုံး ခေါ်ယူသင့်ကြောင်းလည်း ပြောပါတယ်။

သတင်း အချက်အလက် စီးဆင်းမှုကို ကန့်သတ်ထားတာတွေ အပေါ်မှာလည်း အထူး စိုးရိမ်မိကြောင်းနဲ့ လူမှု အဖွဲ့အစည်းတွေနဲ့ မီဒီယာ ကို ဘယ်လို့ပုံစံနဲ့မှ တုံ့ပြန် အပြစ်မပေးသင့်ကြောင်းလည်း ကြေညာချက်မှာ ပါရှိပါတယ်။

ဒါ့အပြင်၊ G7 နိုင်ငံတွေအနေနဲ့ အနာဂတ် ဒီမိုကရေစီကို မြင်တွေ့ချင်တဲ့ မြန်မာ ပြည်သူတွေနဲ့အတူ ရပ်တည်သွားမှာ ဖြစ်ကြောင်းလည်း ပူးတွဲ ကြေညာချက်မှာ ဖော်ပြပါရှိပါတယ်။

ဗွီအိုအေ (မြန်မာပိုင်း)

https://burmese.voanews.com/a/myanmar-military-coup-g7-/5764696.html