ဖိအားပေးခံနေရတဲ့ကြားကပဲ ကျန်းမာရေးဝန်ထမ်းတွေ ဆန္ဒပြနေဆဲ

ဆေးနှင့်ဆေးနှီးနွယ်တက္ကသိုလ်များသပိတ်စစ်ကြောင်း။ (ဖေဖော်ဝါရီ ၂၅၊ ၂၀၂၁)

တပ်မတော်ကာကွယ်ရေးဦးစီးချုပ် ဦးဆောင်ပြီး အာဏာသိမ်းယူ အုပ်ချုပ်နေတဲ့အပေါ် မကျေနပ်တဲ့ ကန့်ကွက်ဆန္ဒပြမှုတွေ ဒီနေ့လည်း နိုင်ငံအနှံ့က မြို့တွေမှာ ဆက်လုပ်နေကြပါတယ်။

မြန်မာနိုင်ငံအေးချမ်းစေဖို့ ရည်ရွယ်ချက်နဲ့ ဒီနေ့ မြန်မာ့ရိုးရာ သနပ်ခါးလိမ်း လှုပ်ရှားမှုလုပ်ကြဖို့ ဆော်သြထားတဲ့အတိုင်း ရန်ကုန်၊ မန္တလေး၊ မုံရွာ၊ ထားဝယ် စတဲ့ မြို့စုံမှာ ဆန္ဒပြသူတွေက သနပ်ခါးတွေလိမ်းပြီး ဆန္ဒပြခဲ့ကြပါတယ်။ အကြမ်းမဖက် အာဏာဖီဆန်တဲ့ CDM လှုပ်ရှားမှုမှာပါဝင်ကြတဲ့ ဆရာဝန်တွေ၊ ဆေးဝန်ထမ်းတွေကလည်း ဝတ်ရုံဖြူတွေ ဝတ်ဆင်ပြီး ရန်ကုန်မြို့မှာ ချီတက်ဆန္ဒပြခဲ့ကြပါတယ်။ ကျန်းမာရေးဝန်ထမ်းတွေ အလုပ်ခွင်ပြန်ဝင်ကြဖို့ အာဏာပိုင်တွေဘက်က ဖိအားပေးမှုတွေ ရှိနေပေမဲ့လည်း အာဏာရှင်စနစ် ဆန့်ကျင်တဲ့ဆန္ဒပြပွဲတွေမှာ အများအပြားဆက်လက်ပါဝင်နေကြပါတယ်။

ဆေးနှင့်ဆေးနှီးနွယ်တက္ကသိုလ်များ သပိတ်စစ်ကြောင်း။

"ညီမတို့မှာတော့ ဖိအားတွေ အများကြီးရှိပါတယ်။ ဒါပေမဲ့ ညီမတို့ကတော့ CDM ကို အဆုံးစွန်အထိကို တွေးထားပြီးသားပေါ့နော်။ ညီမတို့ တွေးထားပြီးတဲ့အခါကျတော့ ဘယ်လိုပုံစံပဲ ဖိအားတွေပဲရှိနေပါစေ၊ CDM ကို လုံးဝလုပ်ဆောင်သွားမှာ။ ဘယ်တော့မှလဲ CDM ကို ရပ်သွားမှာတော့ မဟုတ်ပါဘူး။"

CDM မှာ ပါဝင်လှုပ်ရှားမှုမှာ ပါဝင်တဲ့ ကျန်းမာရေးဝန်ထမ်းတယောက် ပြောသွားတာပါ။

ရန်ကုန်တက္ကသိုလ်ပင်မကျောင်းဝန်းထဲမှာ လူစုပြီး ချီတက်ဆန္ဒပြကြတဲ့ ရန်ကုန်တက္ကသိုလ်ကျောင်းသားများသမဂ္ဂ ကျောင်းသားတွေကို လုံခြုံရေးတွေက တားဆီးပိတ်ဆို့ဖို့ ကြိုးစားခဲ့ကြပေမဲ့ ကျောင်းသားတွေက ရှောင်လွဲပြီး ကျောင်းဝန်းအပြင်ထွက်ပြီး တခြားဆန္ဒပြသူတွေနဲ့ ပူးပေါင်းနိုင်ခဲ့ကြပါတယ်။

မြန်မာနိုင်ငံမှာ အာဏာသိမ်းယူအုပ်ချုပ်နေတဲ့ စစ်တပ်အပေါ် ထောက်ခံသူတွေကလည်း ဒီနေ့ ရန်ကုန်မြို့မှာ ချီတက်ဆန္ဒပြပါတယ်။ တပ်မတော်ကို ထောက်ခံပါတယ်။ စစ်အုပ်ချုပ်ရေးကောင်စီကို ထောက်ခံပါတယ်ဆိုတဲ့ စာတန်းတွေ ကိုင်ဆောင် ဆန္ဒပြခဲ့ကြတာပါ။ သူတို့ကို ကန့်ကွက်သူတွေက ဘေးကနေ သံပုံးတွေတီး၊ လက်တွေကို ကြက်ခြေခတ်ပုံတွေလုပ်ပြီး အော်ဟစ်ပြီး ကန့်ကွက်ဆန္ဒပြခဲ့ကြပါတယ်။

"၅,၀၀၀ စားတွေ အလိုမရှိ။ ၅,၀၀၀ စားတွေ အလိုမရှိ။ ၅,၀၀၀ စားတွေ အလိုမရှိ။"

ခုလိုစစ်တပ်ထောက်ခံသူတွေ လမ်းပေါ်ထွက်လာတာနဲ့အတူ ရန်ကုန်မြို့ထဲက နေရာတချို့မှာ စစ်တပ်လိုလားတဲ့ လူရမ်းကားတချို့က တုတ်တွေ၊ ဓါးတွေ၊ လေးဂွတွေနဲ့ တိုက်ခိုက်လို့ တချို့ ဒဏ်ရာရခဲ့ကြပါတယ်။

ရန်ကုန်မြို့လယ် ရှန်ဂရီလာဟိုတယ်နားမှာ သီချင်းဆိုဆန္ဒပြကြတဲ့အဖွဲ့ထဲက သူတယောက်ကို ဘယ်ကမှန်းမသိတဲ့ လူတစုက ဗိုလ်ချုပ်လမ်းမှာ ဝိုင်းပြီး ဓါးထိုးမှုဖြစ်ခဲ့ပါတယ်။ မျက်မြင်တွေ့လိုက်သူတယောက်က စစ်တပ်ကို ထောက်ခံတယ်လို့ ဆိုသူတွေက လုပ်သွားတာလို့ ခုလိုပြောပါတယ်။

"ဆန်ထိုးပိုက်။ ဆန်ထိုးပိုက်။ ကျနော်တို့ အသက်ကြီးနေပြီ။ ၄၆ နှစ် မကိုင်ဖူးဘူး။ အဲဒီ ဆန်ထိုးပိုက်နဲ့ ထိုးတာ။"

ဆန္ဒပြသူတွေကို ခဲတွေ၊ လောက်လေးခွတွေနဲ့ အမည်မသိသူတွေ လိုက်ပစ်နေတဲ့ဓါတ်ပုံတွေ ဗီဒီယိုတွေကို ပြည်တွင်းသတင်းထောက်တွေရဲ့ လူမှုကွန်ယက်တွေပေါ်မှာ ဖော်ပြနေကြပါတယ်။

ဒီနေ့ညဦးပိုင်းကလည်း ရန်ကုန်တိုင်း တာမွေ အောင်မင်္ဂလာရပ်ကွက်မှာ စစ်တပ်က ဖွဲ့စည်းထားတဲ့ အုပ်ချုပ်ရေးကောင်စီက ခန့်ထားတဲ့ ရပ်ကွက် အုပ်ချုပ်ရေးမှူးကို ရပ်ကွက်နေ လူထုက ဝိုင်းပြီးတော့ ကန့်ကွက်နေချိန်မှာပဲ ရဲ အင်အားအလုံးအရင်းနဲ့ ရောက်လာပြီးတော့ ရပ်ကွက်နေလူထုက ဆန္ဒပြ ကြွေးကြော်ချိန်မှာ ရဲတွေက လူအုပ်ထဲကို အတင်းဝင်ရိုက်နှက်ခဲ့ပါတယ်။ သေနတ်တွေနဲ့လည်း ပစ်ဖောက်ခဲ့ပါတယ်။ ဒီအခြေအနေတွေကိုတော့ အခင်းဖြစ်တဲ့နေရာကနေ တိုက်ရိုက်လွှင့်နေတဲ့ ဗီဒီယိုတွေမှာ တွေ့ရပါတယ်။

ဗွီအိုအေ (မြန်မာပိုင်း)

https://burmese.voanews.com/a/myanmar-military-coup-protest/5792276.html