![]() |
မြန်မာနိုင်ငံမှာ ဖေဖော်ဝါရီ ၁ ရက်နေ့ တုန်းက စစ်တပ်အာဏာ သိမ်းလိုက်တာကို နိုင်ငံအနှံ့ ကန့်ကွက်ဆန္ဒပြမှုတွေ ပေါ်ပေါက်လာနေတာ ဗုဒ္ဓဟူးနေ့အထိ ၅ ရက် ဆက်တိုက်ရှိလာခဲ့ပါပြီ ။ တချို့နေရာတွေမှာ စစ်တပ်က ဆန္ဒပြပွဲတွေကို အင်အားသုံး ဖြိုခွဲတာရှိနေတဲ့ ကြားက အခုလို ရက်ဆက် ဆန္ဒပြနေကြတာပါ။
လူစုခွဲဖို့အတွက် စစ်တပ်က ခြောက်လှန့် ပစ်ခတ်တာ၊ ရာဘာကျည်တွေ၊ မီးသတ်ပိုက်တွေနဲ့ ရေဖြန်းထိုးခွဲတာတွေလုပ်လာတာကြောင့် ဆန္ဒပြသူတွေထဲ ဒဏ်ရာရခဲ့သူတွေလည်း ရှိပါတယ်။
နေပြည်တော်မှာတော့ မနေ့တုန်းက ထောင်နဲ့ချီတဲ့ ငြိမ်းချမ်းစွာ ဆန္ဒပြနေသူတွေကို လုံခြုံရေးတပ်ဖွဲ့က လူစုခွဲဖို့ ဆက်တိုက် သတိပေး ပြောဆိုတယ်လို့ ဆန္ဒပြသူတဦးက VOA ကိုပြောပါတယ်။
အင်္ဂါနေ့တုန်းက နေပြည်တော်မှာဆန္ဒပြသူတွေကို ရဲတပ်ဖွဲ့က သေနတ်နဲ့ ပစ်ခတ်ခဲ့တာကြောင့် အနည်းဆုံး လူ ၂ ဦး ဒဏ်ရာရခဲ့ပါတယ်။ တဦးက ဦးခေါင်းကို သေနတ်ထိမှန်ခဲ့ပြီး နောက်တဦးက ရင်ဘတ်ကို ထိမှန်ခဲ့တာပါ။
ဦးခေါင်းကို သေနတ်ထိမှန်ခဲ့တဲ့ အသက် ၁၉ အရွယ် မမြသွဲ့သွဲ့ခိုင်ကို အခု အထူးကြပ်မတ်ခန်းထဲမှာ အသက်ရှုစက်တပ်ထားပြီး စောင့်ကြည့်နေရတယ်လို့ အမည်မဖော်လိုသူ ဆရာဝန်တဦးက ပြောပါတယ်။
အခုထိ ခေါင်းထဲမှာ ကျည်ဆန်ရှိနေသေးတာကြောင့် အခြေအနေက စိုးရိမ်ရပြီး အသက်ရှင်ဖို့ အခွင့်အလမ်းနည်းတယ်လို့ အဲဒီဆရာဝန်ကပြောပါတယ်။ ရင်ဘတ်ကို သေနတ်ထိမှန်ခဲ့တဲ့သူက အသက် ၂၃ နှစ်အရွယ် ကိုစိုးဝေဖြစ်ပါတယ်။ သူ့အခြေအနေကတော့ မစိုးရိမ်ရတော့ဘူးလို့ ဆရာဝန်က ပြောပါတယ်။
ငြိမ်းငြိမ်းချမ်းချမ်း ဆန္ဒပြနေတဲ့ သူတွေကို အင်အားသုံး ဖြိုခွဲနေတဲ့ ရဲတပ်ဖွဲ့ဝင်တွေ ရာထူးတာဝန်ကနေ နှုတ်ထွက်ပေးဖို့ မြန်မာ့လူ့အခွင့်အရေးဆိုင်ရာ ကုလသမဂ္ဂ အထူးသံတမန် Tom Andrews က တောင်းဆိုခဲ့ပါတယ်။ အခုလို ဆန္ဒပြသူတွေကို အကြမ်းဖက်နှိမ်နှင်းခဲ့တဲ့ လုပ်ရပ်အပေါ် ကုလသမဂ္ဂက ပြစ်တင်ရှုတ်ချထားပါတယ်။
ဗွီအိုအေ (မြန်မာပိုင်း)

No comments:
Post a Comment