မြန်မာစစ်အာဏာသိမ်းမှု အရေးယူဖို့ ကန်အောက်လွှတ်တော် ဥပဒေ ရေးဆွဲမည်

မှတ်တမ်းဓါတ်ပုံ- ရီပတ်ဘလစ်ကန်ကိုယ်စားလှယ် Steve Chabot အပါအဝင် လွှတ်တော်အမတ်များကို ကန်အောက်လွှတ်တော် တွင် တွေ့ရစဉ်

မြန်မာနိုင်ငံမှာ စစ်တပ်က အာဏာသိမ်းတဲ့ လုပ်ရပ်ကို ပြစ်တင်ရှုတ်ချပြီး၊ တာဝန်ရှိသူတွေကို အရေးယူနိုင်ဖို့ အမေရိကန် အောက်လွှတ်တော်မှာ စတင်ပြင်ဆင်နေပါတယ်။ မြန်မာနိုင်ငံမှာ စစ်တပ်က ဖမ်းဆီးထားတဲ့ အရပ်သားအစိုးရ ခေါင်းဆောင်နဲ့ လွှတ်တော်ကိုယ်စားလှယ်တွေကို ပြန်လွှတ်ပေးဖို့ တောင်းဆိုတဲ့ ဆုံးဖြတ်ချက်နဲ့ ဥပဒေတရပ်ပြဌာန်းဖို့ ကြာသပတေးနေ့ကပဲ အောက်လွှတ်တော် နိုင်ငံခြားရေးကော်မတီမှာ တင်ပြခဲ့တာပါ။

"အာဏာသိမ်းခဲ့တဲ့ စစ်ခေါင်းဆောင်တွေ တာဝန်ခံမှု ရှိစေဖို့နဲ့ မြန်မာပြည်သူတွေအတွက် ဒီမိုကရေစီစနစ် အမြန်ဆုံး ပြန်လည်ဖော်ဆောင်နိုင်ဖို့ မြန်မာနိုင်ငံ ဒီမိုကရေစီ အကာအကွယ်ပေးရေး ဥပဒေကို တင်သွင်းရတာဖြစ်ကြောင်း"အောက်လွှတ်တော် နိုင်ငံခြားရေး ကော်မတီမှာ ဆွေးနွေးမယ့် ကိစ္စရပ်တွေကို တင်ပြရာမှာ ဒီမိုကရက်ကိုယ်စားလှယ် Gerry Connolly ကပြောဆိုလိုက်တာပါ။ မြန်မာစစ်တပ်က အာဏာသိမ်းတဲ့လုပ်ရပ်ကို ရှုတ်ချပြီး ဖမ်းဆီးထားသူတွေကို ပြန်လွှတ်ပေးဖို့ တောင်းဆိုထားတဲ့ ဆုံးဖြတ်ချက်တရပ်ကိုလည်း ကော်မတီမီမှာ တင်သွင်းထားပါတယ်။

မြန်မာစစ်တပ်က အာဏာကို ထိန်းချုပ်ဖို့ ဆုံးဖြတ်ခဲ့ပြီး၊ ဒေါ်အောင်ဆန်းစုကြည်နဲ့ သမ္မတဦးဝင်းမြင့် အပါအဝင် ထိပ်တန်း နိုင်ငံရေးခေါင်းဆောင်တွေ၊ ရာနဲ့ချီတဲ့ အပြစ်မဲ့ပြည်သူတွေကို ဖမ်းဆီးခဲ့တာဟာ မြန်မာပြည်သူတွေရဲ့ အခွင့်အရေးကို ပြောင်ပြောင်တင်းတင်း ချိုးဖောက်ရာ ရောက်ခဲ့ကြောင်းလည်း မြန်မာနိုင်ငံဆိုင်ရာ ဆုံးဖြတ်ချက်ကို ပူးတွဲ အဆိုပြုခဲ့တဲ့ အတိုက်အခံ ရီပတ်ဘလစ်ကန်ကိုယ်စားလှယ် Steve Chabot ကပြောဆိုခဲ့တာပါ။

မြန်မာနိုင်ငံမှာ စစ်တပ်က အာဏာသိမ်းလိုက်တဲ့အပေါ် တုံ့ပြန်တဲ့အနေနဲ့ အမေရိကန် အစိုးရက မြန်မာစစ်ခေါင်းဆောင်တွေကို ပစ်မှတ်ထား ဒဏ်ခတ်မှုတွေ ချမှတ်ထားပြီး၊ နောက်ထပ် အရေးယူဒဏ်ခတ်မှုတွေ ချမှတ်ဖို့ သတိပေးထားတဲ့ အချိန်မှာပဲ အမေရိကန် လွှတ်တော်မှာလည်း ဥပဒေပြဌာန်းပြီး ဖိအားပေးအရေးယူဖို့ ပြင်ဆင်နေတာဖြစ်ပါတယ်။

ဗွီအိုအေ (မြန်မာပိုင်း)

https://burmese.voanews.com/a/us-congress-law-for-myanmar-coup-/5793058.html