ရုရှားအတိုက်အခံ Navalny အဖမ်းခံရ
တနင်္ဂနွေနေ့က ရုရှားနိုင်ငံကို ပြန်ရောက်လာတဲ့ အတိုက်အခံခေါင်းဆောင် Alexei Navalny ကို ရက်ပေါင်း ၃၀ ချုပ်ထားဖို့ မော်စကိုက တရားသူကြီးက တနင်္လာနေ့မှာ အမိန့်ချမှတ် လိုက်ပါတယ်။
ပြီးခဲ့တဲ့ သြဂုတ်လထဲမှာ အဆိပ်မိခဲ့တဲ့ Navalny ဟာ ဂျာမဏီနိုင်ငံမှာ ဆေးကုသမှု ခံယူ နေရာ ကနေ တနင်္ဂနွေနေ့က ပထမဆုံံးအကြိမ်အဖြစ် ရုရှားကို ပြန်လာချိန်မှာပဲ မော်စကိုက Sheremetyevo လေဆိပ် ရောက်ရောက်ချင်း အဖမ်းခံခဲ့ရတာပါ။
သူ့ကို မဖမ်းခင်မှာပဲ ပြန်ရောက်လာတာအတွက် သူသိပ်ဝမ်းသာကြောင်းနဲ့ ၅ လအတွင်း ဒီနေ့ဟာ အကောင်းဆုံးနေ့ ဖြစ်ကြောင်း သူက သတင်းထောက်တွေကို ကြေညာချက် ထုတ်ပြန် ပြောဆိုပါတယ်။
သြဂုတ်လမှာ Siberia မှာ ခရီးသွားရင်း စစ်တပ်သုံးအဆင့် ရှိတဲ့ အာရုံကြောထိခိုက်စေတဲ့ အဆိပ်ခတ် ခံခဲ့ရချိန်ကစပြီး ၅ လလောက် ဆေးကုသမှုခံယူခဲ့ရတာပါ။ သူ့ကို အဆိပ်ခတ်ဖို့ ရုရှားသမ္မတ Vladimir Putin က ထောက်လှမ်းရေးတွေကို အမိန့်ပေးခဲ့တာ ဖြစ်ကြောင်း Navalny က လူသိရှင်ကြား စွပ်စွဲခဲ့ပေမယ့် ရုရှားအစိုးရက တော့ မဟုတ်မှန်ကြောင်း ပြင်းပြင်းထန်ထန် ငြင်းဆိုပါတယ်။
တနင်္ဂနွေနေ့ သူ့ကို ဖမ်းဆီးတာဟာလည်း သူဟာ ၂၀၁၄ ခုနှစ်တုန်းက ကျခံရမယ့် အပြစ်ဒဏ်ကာလ မစေ့ခင် ပြန်လွှတ်ပေးတုန်းက ခံဝန်ချက်ကတိကို ဖောက်ဖျက်မှုနဲ့ ဖမ်းဆီးရတာ ဖြစ်ကြောင်း ရုရှားအာဏာပိုင်တွက ပြောပါတယ်။
သူ့ကို အခုလို ဖမ်းဆီးမှုအတွက် အမေရိကန်နဲ့ ဥရောပ နိုင်ငံတွေက ပြင်းပြင်းထန်ထန် ဝေဖန်ခဲ့ကြတာကြောင့် ရုရှားနဲ့ အနောက်နိုင်ငံတွေကြား တင်းမာမှု တွေ တိုးလာစေပါတယ်။Navalny ကို အမြန်ဆုံး ပြန်လွှတ်ပေးဖို့ ဥရောပကော်မရှင် အကြီးအကဲ Ursula von der Leyen ၊ ကုလသမဂ္ဂ လူ့အခွင့်ရေးဆိုင်ရာ မဟာမင်းကြီး၊ ဗြိတိန်နိုင်ငံခြားရေးဝန်ကြီး Dominic Raab နဲ့ အီးယူ ဥရောပ နိုင်ငံတွေက ထိပ်တန်းအရာရှိတွေက တောင်းဆိုခဲ့ကြပါတယ်။
အမေရိကန်နိုင်ငံခြားရေးဝန်ကြီး Mike Pompeo က အခုလို ဖမ်းဆီးမှုအတွက် ပြင်းပြင်းထန်ထန် ရှုတ်ချခဲ့သလို အမျိုးသားလုံခြုံရေး အကြံပေးအဖြစ် အရွေးကောက်ခံ သမ္မတဂျိုးဘိုင်ဒန် ရွေးချယ်ထားတဲ့ Jake Sullivan ကလည်း Navalny ကိုလွှတ်ပေးဖို့ ရုရှားအာဏာပိုင်တွေကို တောင်းဆိုခဲ့ပါတယ်။
ဗွီအိုအေ (မြန်မာပိုင်း)
https://burmese.voanews.com/a/russia-navalny-got-arrested-/5742944.html
No comments:
Post a Comment