ရွေးကောက်ခံ သမ္မတ Joe Biden နဲ့ ဒုသမ္မတ Kamala Harris တို့က COVID-19 ရောဂါကြောင့် သေဆုံးခဲ့သူ အမေရိကန် ၄၀၀,၀၀၀ အတွက် အောက်မေ့ဘွယ် အမှတ်တရ အခမ်းအနားကို ဝါရှင်တန်မြို့တော်မှာ သမ္မတ ကျမ်းသစ္စာကျိန်ဆိုပွဲ မကျင်းပခင် တရက်အလို အင်္ဂါနေ့မှာ ကျင်းပမှာဖြစ်ပါတယ်။
Joe Biden ရဲ့ ဇနီး Jill Biden နဲ့ Kamala Harris ရဲ့ ခင်ပွန်း Doug Emhoff တို့လည်း အခမ်းအနားကို တက်ရောက်မှာပါ။ ဗုဒ္ဓဟူးနေ့ Biden နဲ့ Harris တို့ ကျမ်းသစ္စာကျိန်ဆိုမယ့် လွှတ်တော်ရှေ့အမျိုးသားရင်ပြင်နဲ့ မျက်နှာချင်းဆိုင် သမ္မတဟောင်း Lincoln အမှတ်တရ အဆောက်အအုံရှေ့ ရေကန်မှာ မီး ၄၀၀ ထွန်းညှိပြီး အောက်မေ့ဘွယ်အမှတ်တရ အခမ်းအနား ကျင်းပမှာဖြစ်ပါတယ်။
နယူးယောက် Empire State အဆောက်အအုံနဲ့ Seattle မြို့က Space Needle အဆောက်အအုံ အပါအဝင် အမေရိကန်ပြည်ထောင်စုတဝှမ်း အထိမ်းအမှတ် အဆောက်အအုံကြီး တွေမှာလည်း COVID-19 ကြောင့် သေဆုံးသူတွေကို ဂုဏ်ပြုပြီး တချိန်တည်းလို အမှတ်တရ မီးတွေ ထွန်းကြမှာဖြစ်ပါတယ်။
နိုင်ငံတဝှမ်း ညီညွှတ်ရေးအတွက် အခါသမယလို့ သတ်မှတ်ပြီး ရာနဲ့ချီတဲ့ မြို့ရွာတွေ၊ လူမျိုးစုနဲ့ လူမှုအသိုင်းအဝိုင်းတွေ ပူးပေါင်းပါဝင်ကြမယ်လို့ Biden ရဲ့ သမ္မတသစ် ကျမ်းသစ္စာကျိန်ဆိုရေး ဆိုင်ရာ ကော်မတီက ပြောပါတယ်။
COVID-19 ရောဂါတိုက်ဖျက်ရေးနဲ့ ကူညီထောက်ပံ့ရေး ကိစ္စတွေကို အစိုးရသစ် တာဝန်ထမ်းဆောင်တဲ့အစောပိုင်း ကာလတွေမှာ အာရုံစိုက် ဆောင်ရွက်သွားမယ်လို့ Biden ရော Harris ရော ပြောဆိုထားပါတယ်။
အဲဒီအထဲမှာ သမ္မတသစ် တာဝန်ယူပြီး ရက် ၁၀၀ အတွင်းမှာ လူပေါင်း သန်း ၁၀၀ ကာကွယ်ဆေးထိုးနိုင်ရေးကို ဦးစားပေး လုပ်ဆောင်သွားမှာဖြစ်သလို ကိုဗစ်ကြောင့် စီးပွားရေး ထိခိုက်ပြီး ရုန်းကန်နေရသူတွေကို ကူညီရေးကိစ္စတွေ ပါဝင်တဲ့အကြောင်း ပြောဆိုထားပါတယ်။
ဗွီအိုအေ (မြန်မာပိုင်း)
https://burmese.voanews.com/a/biden-inauguration-covid/5743154.html
Reviewed by THITHTOOLWIN
on
22:54
Rating:
No comments:
Post a Comment