ဖမ်းဆီးထားတဲ့ မြန်မာနိုင်ငံသား ၁၀၀ တရုတ် ပြန်လွှဲပြောင်းပေး

မြန်မာနိုင်ငံသို့ပြန်ဝင်ရန် တရုတ်-မြန်မာနယ်စပ်ဂိတ်တွင် စောင့်နေကြသည့် မြန်မာလုပ်သားများ။ (မူဆယ်) (မေ ၁၂၊ ၂၀၂၀)

ကိုဗစ်ကပ်ရောဂါကာလ တရုတ်နိုင်ငံမှာ ဖမ်းဆီးထိန်းသိမ်းခံထားရတဲ့ မြန်မာနိုင်ငံသား ၁၀၀ ကို ဒီကနေ့ပဲ မြန်မာအာဏာပိုင်တွေထံ နယ်စပ်ကနေ လွှဲပြောင်းပေးခဲ့တဲ့အကြောင်း ဗွီအိုအေမြန်မာပိုင်း သတင်းထောက် မစုစုက တင်ဆက်ပေးမှာပါ။

တရုတ်နိုင်ငံမှာ တရားဝင်နေထိုင်ခွင့် အထောက်အထား မရှိသူတွေအပါအဝင် ဖမ်းဆီးထိန်းသိမ်းထားသူ မြန်မာနိုင်ငံသား ၁၀၀ ကို တရုတ်အာဏာပိုင်တွေက မြန်မာတာဝန်ရှိသူတွေထံ လွှဲပြောင်းပေးလိုက်တာပါ။ ပြန်လည်လွှဲပြောင်းပေးခဲ့တဲ့ မြန်မာနိုင်ငံသားတွေကိုတော့ တရုတ်နိုင်ငံနဲ့နယ်စပ် ရှမ်းပြည်မြောက်ပိုင်း၊ မူဆယ်မြို့က နန်းတော်ပေါက် နယ်စပ်ဂိတ်ကနေ လက်ခံခဲ့ကြောင်း မူဆယ်ခရိုင်အုပ်ချုပ်ရေး ဒုတိယညွှန်ကြားရေးမှူး ဦးမောင်မောင်သန်းက VOA ကိုပြောပါတယ်။

"(ဒီနေ့လွှဲတာ) ၁၀၀ ဗျ၊ ကျား ၆၄၊ မ ၃၆ ယောက်။ ဒီဘက်က ဝင်တဲ့ မြန်မာတွေကို ဖမ်းမိလို့ရှိရင် သူတို့အကျဉ်းထောင်ပေါ့နော်။ ဖမ်းမိတယ်ဆိုတာက သူတို့နိုင်ငံကထုတ်တဲ့ စည်းကမ်းရှိမှာပေါ့၊ ပြီးတော့ Overstay ရှိလိမ့်မယ်ပေါ့။ နောက် သတ်မှတ်နယ်မြေကျော်တာတွေရှိမယ်၊ စည်းကမ်းဖောက်ဖျက်တာတွေ။ အဲဒီလိုတွေဖမ်းမိရင် သူတို့က လူစုမိသွားပြီဆိုရင်တော့ ပြန်လွှဲတာပဲဗျ။"

မကြာသေးခင်လတွေကစလို့ မြန်မာနိုင်ငံမှာ ကပ်ရောဂါကူးစက်မှုတွေ တိုးလာရာက အိမ်နီးချင်းတရုတ်နိုင်ငံက နယ်စပ်ဒေသမှာ သွားလာဝင်ထွက်မှုတွေကို တင်းတင်းကြပ်ကြပ် ထိန်းချုပ်ထားသလို၊ တရုတ်နိုင်ငံ နယ်စပ်မြို့တွေမှာ အလုပ်လုပ်ကိုင်နေကြတဲ့ မြန်မာနိုင်ငံသားတွေကိုလည်း တင်းတင်းကြပ်ကြပ် စောင့်ကြည့် စစ်ဆေးနေပါတယ်။ တရားဝင် နေထိုင်ခွင့် အထောက်အထား မရှိသူတွေ အပါအဝင် အကြောင်းအမျိုးမျိုးကြောင့် ထိန်းသိမ်းခံထားရသူတွေကိုတော့ ကျန်းမာရေးစစ်ဆေးပြီး လွှဲပြောင်းပေးဖို့ ၂ နိုင်ငံ တာဝန်ရှိသူတွေကြား သဘောတူထားတယ်လို့လည်း ဦးမောင်မောင်သန်းက ပြောပါတယ်။

"ကျနော်တို့နဲ့ တရုတ်နဲ့ ညှိနှိုင်းထားတာကတော့ တရုတ်ဘက်ကလည်း ကျန်းမာတဲ့သူကိုပဲ လွှဲပြောင်းပေးမယ်ဆိုပြီးတော့ သူတို့ဘက်ကလည်း ကျန်းမာကြောင်းတော့ ပါတယ်ပေါ့လေ။ ဒါပေမဲ့လည်း ကျနော်တို့ဘက်မှာလည်း (Quarantine စင်တာတွေမှာ) ပြန်ထားတယ်။ ဘောလုံးကွင်းထဲမှာ ပြည်ထောင်စုအားကစားကွင်းထဲမှာ စုထားတယ်။ ပြီးရင် ကျန်းမာရေးစစ်ဆေးတယ်။ ကျန်းမာတယ်ဆိုမှ သက်ဆိုင်ရာဌာနတွေဆီ ပြန်လွှတ်တယ်။"

ယူနန်ပြည်နယ်အစိုးရက နယ်စပ်ဂိတ်လူအဝင်အထွက်ကို ဧပြီလကုန်ပိုင်းက ကန့်သတ်လိုက်ပြီး မြန်မာဘက်ကနေ တရားမဝင် ဝင်ရောက်တာမျိုးမရှိအောင် နယ်စပ်တလျှောက်မှာ ခြံစည်းရိုး ပိတ်ဆို့ကာရံတာတွေလည်း လုပ်ခဲ့ပါတယ်။ ရွှေလီနဲ့ ကြယ်ဂေါင်မြို့ထဲမှာ အထောက်အထားမရှိတဲ့ မြန်မာနိုင်ငံသားတွေကို လက်ခံထားတဲ့ဘယ်သူမဆို မြန်မာငွေ သိန်း ၁၀၀ နီးပါးရှိတဲ့ ယွမ်ငွေ ၅၀,၀၀၀ ကို ဒဏ်ငွေအဖြစ် ပေးဆောင်ရမယ်လို့ နိုဝင်ဘာလလယ်လောက်က အမိန့်ထုတ်ပြန်ထားပါတယ်။ မြန်မာနိုင်ငံသားတွေအနေနဲ့ ကပ်ရောဂါကာလ တရုတ်အာဏာပိုင်တွေ ချမှတ်ထားတဲ့ စည်းကမ်းတွေကို လိုက်နာဖို့ လိုအပ်ကြောင်းလည်း ကြယ်ဂေါင်မြို့က လူမှုရေးအဖွဲ့တခုဖြစ်တဲ့ ကြင်နာနွေးထွေးပရဟိတ ဥက္ကဋ္ဌ ဦးဖိုးသားက VOA ကိုပြောပါတယ်။

"အခု တရုတ်နိုင်ငံထဲမှာဆိုရင် ခြံစည်းရိုးတွေဘာတွေ လုံလုံခြုံခြုံကာထားပြီး၊ အဓိကတော့ သူက မြန်မာနိုင်ငံဘက်ကနေ ဝင်လာမယ့်ဟာတွေကို သူကပိတ်ပင်ထားတာ၊ အဲဒီလိုမျိုးမဝင်လာဖို့ကိုလေ တင်းတင်းကြပ်ကြပ်တားမြစ်ထားတာ အဲဒါပါပဲ။ သူတို့နိုင်ငံက ချမှတ်ထားတဲ့ စည်းမျဉ်းစည်းကမ်း ဥပဒေအထောက်အထားလေးတွေနဲ့ ပြည့်စုံစွာနေရင် အားလုံးဒီဘက်မှာ အဆင်ပြေပါတယ်။"

ယူနန်ပြည်နယ်၊ တယ်ဟုန်ပြည်နယ်ခွဲထဲမှာပါတဲ့ တရုတ်ရွှေလီနဲ့ ကြယ်ဂေါင်မြို့ထဲက မြန်မာနိုင်ငံသားတွေအနေနဲ့ နှစ်နိုင်ငံချစ်ကြည်ရေးအရ ထုတ်ပေးထားတဲ့ ပေါက်ဖော်ကဒ်လို့ လူသိများတဲ့ မြန်မာနိုင်ငံသား အသိအမှတ်ပြုကဒ်အပါအဝင်၊ စာအုပ်အစိမ်းလို့ခေါ်တဲ့ နေထိုင်ခွင့်ကဒ်တွေအပြင်၊ အခုနောက်ပိုင်းထုတ်ပေးတဲ့ ကိုဗစ်ရောဂါစစ်ဆေးပြီးကြောင်း အထောက်အထားကဒ်ပြားကိုပါ ကိုင်ဆောင်ထားကြဖို့ ဒေသခံတာဝန်ရှိသူတွေက သတိပေးထားပါတယ်။ မြန်မာနိုင်ငံမှာ မကြာသေးခင်ကစလို့ ကိုဗစ်ရောဂါ ကူးစက်မှုတွေ တိုးလာရာမှာ အခုဆိုရင် သေဆုံးသူ ၂,၂၀၀ ကျော်နဲ့ ကူးစက်သူ ၁၀၄,၀၀၀ ကျော် ရှိခဲ့ပြီး၊ ရောဂါကူးစက်မှုတွေ ပထမဆုံး စတင်ခဲ့တဲ့ တရုတ်နိုင်ငံကတော့ သေဆုံးသူ ၄,၆၀၀ ကျော်နဲ့ ကူးစက်သူ ၈၆,၀၀၀ ကျော် ရှိနေပါတယ်။

စုစု/VOA (Burmese)

https://burmese.voanews.com/a/myanmar-migrant-china/5695718.html