ယူနန်ပြည်နယ်တွင်း တရားမဝင်မြန်မာနိုင်ငံသားလက်ခံသူတွေကို တရုတ်အရေးယူမည်

မြန်မာ ယူနန်နယ်စပ်ဂိတ်မြင်ကွင်း (နိုဝင်ဘာလ ၁၈၊၂ဝ၂ဝ)

မြန်မာနိုင်ငံနဲ့နယ်စပ် ယူနန်ပြည်နယ်မှာ ကိုဗစ်ကပ်ရောဂါကာလ တရားမဝင်ရောက်ရှိနေတဲ့ မြန်မာနိုင်ငံသားတွေကို လက်ခံထားသူတွေကို ကြီးလေးတဲ့ ဒဏ်ငွေပေးဆောင်ရမှာဖြစ်ကြောင်း တရုတ်အာဏာပိုင်တွေ သတိပေးလိုက်တဲ့အကြောင်း ကိုဇော်ထက် သတင်းပေးပို့ထားပါတယ်။

မြန်မာနိုင်ငံသား အများအပြားရှိတဲ့ ရွှေလီနဲ့ ကျယ်ဂေါင်မြို့တွေ အပါအဝင် ယူနန်ပြည်နယ်ထဲမှာ တရားဝင်နေထိုင်ခွင့် အထောက်အထားမရှိဘဲ နေထိုင်အလုပ်လုပ်ကိုင်နေသူတွေကို လက်မခံဖို့နဲ့ ပျက်ကွက်ခဲ့မယ်ဆိုရင် တရားမဝင်နေထိုင်သူ တယောက်ကို မြန်မာကျပ်ငွေ သိန်း ၁၀၀ နီးပါးနဲ့ ညီမျှတဲ့ တရုတ်ယွမ်ငွေ ၅၀၀၀၀ ဒဏ်ငွေဆောင်ရမှာဖြစ်ကြောင်း တရုတ်ဒေသခံ အာဏာပိုင်တွေ သတိပေးလိုက်တာ ဖြစ်ပါတယ်။မြန်မာအလုပ်သမားတွေ လက်ခံထားတဲ့ တရုတ်လုပ်ငန်းရှင်တွေလည်း ဒီညွှန်ကြားချက်ကို လိုက်နာရမှာဖြစ်ကြောင်းလည်း ညွှန်ကြားချက်မှာ ဖော်ပြထားပါတယ်။

မြန်မာနိုင်ငံမှာ ကပ်ရောဂါ တကျော့ပြန်တိုးလာရာက နယ်စပ်ဒေသလုံခြုံရေး တိုးမြှင့်ထားတဲ့ တရုတ်နိုင်ငံက ရောဂါကူးစက်မှုတွေ တိုးမြှင့်ထိန်းချုပ်ဖို့ ရည်ရွယ်ချက်နဲ့ အခုလို ညွှန်ကြားချက်တွေ ထုတ်ပြန်နေတာလို့လည်း ရွှေလီမြို့မှာ ကျောက်အရောင်းအဝယ် လုပ်ငန်းလုပ်ကိုင်နေတဲ့ ကိုမိုးထွန်းကပြောပါတယ်။

“ တယ်ဟုန်ပြည်နယ်ပေါ့ တယ်ဟုန်ပြည်နယ်ဆိုတော့ သူက ပန်ဆိုင်းတို့ဘာတို့ ဘက်မှာလည်း ခိုးပေါက်တွေ ဘာညာရှိတယ်လေ၊ ခိုးပေါက်ကနေ ဝင်မလာနိုင်အောင် တားမြစ်တဲ့ပုံစံပေါ့။ အဓိကတော့ တရုတ်ပြည်ထဲက တရုတ်အိမ်ရှင်၊ အိမ်ငှားတွေအတွက် ထုတ်ပြန်တာပေါ့။ အလုပ်သမားဆိုရင်လည်း တရုတ်တွေဆီမှာ အခန်းငှားပြီး နေရင် အိမ်ရှင်နဲ့ဆိုင်သွားပြီလေ ဒါက။ အကယ်၍ဒီဘက်မှာ ကိုယ်ပိုင်နေတဲ့ အခန်းတွေဘာညာ ရှိတယ်ဆိုရင်တော့၊ မြန်မာပြည်သား အချင်းချင်းကတော့ လက်မခံဘူး။ သူကထုတ်ပြန်တာ။”

မြန်မာနိုင်ငံသား အများအပြား အလုပ်လုပ်ကိုင်နေတဲ့ ရွှေလီမြို့မှာ မကြာသေးခင်တုန်းက မြန်မာနိုင်ငံသားတချို့ ကိုဗစ်ကပ်ရောဂါ ကူးစက်မှုတွေ တွေ့ရှိခဲ့တာကြောင့် တရုတ်အာဏာပိုင်တွေက နယ်စပ်ဒေသလုံခြုံရေး တိုးမြှင့်တာ အပါအဝင် ရောဂါထိန်းချုပ်ရေးအတွက် အရှိန်မြှင့် ဆောင်ရွက်လာနေတာပါ။ ဒါပေမဲ့လည်း နယ်စပ်ဒေသမှာ တရားမဝင် ဝင်ရောက်နေသူတွေ ရှိနေဆဲဖြစ်တဲ့အတွက် အခုလို တင်းကြပ်လာတာလို့လည်း ရွှေလီမြို့အခြေစိုက် မိုးမခဖောင်ဒေးရှင်း ဥက္ကဋ္ဌ ဒေါ်မိုးမခက ပြောပါတယ်။

“ အရင်တုန်းကလည်း အဲဒီလိုဒဏ်ငွေ ဆောင်ရမယ် ထောင်ချခံရမယ် အမြဲတမ်းသတိပေးတယ်၊ သတိပေးရဲ့သားနဲ့ကို အခုဆိုရင် ခိုးပေါက်တွေ ဘာတွေဆိုရင် သူတို့က အမြင့်ကြီးပဲ ခြံတွေ၊ ဘာတွေ ထပ်ကာတယ်၊ စာအုပ်မရှိ၊ ဘာမှအထောက်အထားမရှိ ခိုးဝင်လာသူကို ကိုယ်က လက်ခံထားမယ် ဆိုရင်တော့ သူတို့ဒီ အရေးယူမှာပေါ့။”

ဒီကိစ္စနဲ့ပတ်သက်လို့ သံတမန်လမ်းကြောင်းအရ မြန်မာဘက် သတင်းပေးပို့တာမျိုးမရှိပေမဲ့ ကပ်ရောဂါ ကာကွယ်ရေးအတွက် ယူနန်အစိုးရက သူ့ပြည်နယ်အတွင်းမှာ မကြာခဏဆိုသလို ညွှန်ကြားချက်တွေ ပြောင်းလဲ ထုတ်ပြန်တာမျိုး ရှိကြောင်း မူဆယ်ခရိုင် အုပ်ချုပ်ရေးဦးစီးဌာန လက်ထောက် ညွှန်ကြားရေးမှူး ဦးမောင်မောင်သန်းက ဗွီအိုအေကို ပြောပါတယ်။

“ သူတို့ဘက်က အမိန့်ညွှန်ကြားချက်က အမျိုးမျိုး ထုတ်နေတာပဲလေ၊ ထုတ်နေတာကို ကျနော်တို့လည်း ဒီ အစည်းအဝေးတွေ ဘာတွေမှာကျ သက်ဆိုင်ရာ ဌာနတွေက တင်ပြမှသိတာလေ။ ကိုယ့်ဘက်ကို သံတမန် လမ်းကြောင်းအရ တရားဝင်အကြောင်းမကြားရင် ကျနော်တို့လည်း မသိကြဘူး။ သူ့ဘက်အခြမ်းတော့ သူ့တိုင်းပြည်ရဲ့ ဥပဒေပေါ့၊ သူတို့အတိုင်း ထုတ်နေတာတွေတော့ ရှိမှာပေါ့လေ။”

မြန်မာပြည်မှာ ကိုဗစ်အတည်ပြုလူနာ တဖြည်းဖြည်းတိုးလာတဲ့ မတ်လကုန်ကစလို့ တရုတ်ဘက်က မြန်မာနဲ့ ထိစပ်နေတဲ့ နယ်စပ်မြို့တွေမှာ လူအဝင်အထွက်ကို တားမြစ်ထားတာ ဖြစ်ပါတယ်။ ကုန်စည်ပို့ဆောင်ရေးကိုလည်း အကန့်အသတ်နဲ့ ခွင့်ပြုထားပေမဲ့ ဆောင်းသီးနှံ့ပေါ်တဲ့ ရာသီဖြစ်လို့ တရုတ်ဘက်က အမြန်ဆုံး ဖြေလျှော့ပေးဖို့လည်း ကုန်သည်တွေက တောင်းဆိုနေကြပါတယ်။

ကျနော်ကတော့ ဇော်ထက်ပါ ဗွီအိုအေအတွက် သတင်းပေးပို့လိုက်တာပါ။ 

ဇော်ထက်/VOA (Burmese)

https://burmese.voanews.com/a/china-burmese-yunnan-illegal-migrant/5667461.html