ထိုင်းနိုင်ငံမှာ ကိုဗစ်ကပ်ရောဂါ ကူးစက်မှုတွေ အရှိန်လျော့လာနေတာကြောင့် နိုင်ငံခြားသား အလုပ်သမားတွေကို ခေါ်ယူနေတဲ့ကာလမှာ တရားဝင် အလုပ်သမားအေဂျင်စီတွေနဲ့ ဆက်သွယ်ဆောင်ရွက်ဖို့ ထိုင်းအလုပ်သမားဝန်ကြီးက တိုက်တွန်းလိုက်တဲ့အကြောင်း ပြောပြပါမယ်။ ဗွီအိုအေမြန်မာပိုင်းသတင်းထောက် မအေးအေးမာက ထိုင်း မြန်မာနယ်စပ်ကနေ သတင်းပေးပို့ထားပါတယ်။
ကပ်ရောဂါကာလ ကန့်သတ်ထိန်းချုပ်မှုတွေ လျော့ပေါ့လာနေတဲ့ ထိုင်းနိုင်ငံမှာ မြန်မာနိုင်ငံသားတွေ အပါအဝင် ပြည်ပက အလုပ်သမားတွေ ခေါ်ယူနေချိန်မှာ အလိမ်အညာ မခံရအောင် သတိပြုကြဖို့ ထိုင်းအလုပ်သမားဝန်ကြီးက သတိပေးလိုက်တာပါ။ ဘန်ကောက်မြို့တော် အပါအဝင် နယ်မြို့နယ်တွေမှာပါ အစိုးရက တရားဝင်ခွင့်ပြုထားတဲ့ အလုပ်ကုမ္ပဏီ ၂၅၀ ကျော်ရှိကြောင်းလည်း ထိုင်းအလုပ်သမားဝန်ကြီး နိုင်စူချာတ်ချုံကလင် က အလုပ်သမားသစ်ခေါ်ယူရေး မူဝါဒဆွေးနွေးပွဲပြီးတဲ့နောက် ကြာသပတေးနေ့က သတင်းထောက်တွေကို ပြောဆိုလိုက်တာပါ။
"ထိုင်းနိုင်ငံမှာ ကိုဗစ်ထိန်းချုပ်နိုင်ပြီး နိုင်ငံခြားသားအလုပ်သမားတွေ ခေါ်ယူနေတဲ့ကာလမှာ ပွဲစားအတုတွေ လိမ်လည်မှုတွေ အများအပြားဖြစ်နေပါတယ်။ အလုပ်သမားအေဂျင်စီတွေကလည်း အလုပ်သမားတွေဆီက ငွေကောက်ခံမှုတွေ အများအပြားဖြစ်ပွားနေတယ်။ အဲဒီအတွက် ထိုင်းမှာ အလုပ်လုပ်ကိုင်မဲ့ အလုပ်သမားတွေအနေနဲ့ အလုပ်ရှင်ကိုယ်တိုင် အလုပ်သမားကိုယ်တိုင် တရားဝင်တွေ အထောက်အထားတွေကို ကိုယ်တိုင်လုပ်ကြဖို့၊ တရားဝင်ဖွင့်ထားတဲ့ အေဂျင်စီတွေနဲ့သာ အလုပ်လုပ်ကြဖို့ တကယ်လို့ တရားမဝင် ဆက်သွယ်ပြီး အလုပ်လုပ်မိရင်လည်း အရေးယူခံရမယ်။" ဆိုပြီး အလုပ်သမားဝန်ကြီးက ထိုင်းဘာသာနဲ့ ပြောဆိုသွားတာပါ။
ပြီးခဲ့တဲ့ သီတင်းတပတ်ကျော်ကလည်း မြန်မာအလုပ်သမားတွေအပေါ် ငွေလိမ်လည်မှုနဲ့ တိုင်ကြားခဲ့တာကြောင့် ထိုင်းနိုင်ငံ အလယ်ပိုင်း စမုပရာကမ်ခရိုင်က အကျိုးဆောင်ကုမ္ပဏီတခုကို အာဏာပိုင်တွေက ဝင်ရောက်စီးနင်းခဲ့ပါတယ်။ မြန်မာအလုပ်သမား ၅၀၀ ကျော်ကို လိမ်လည်မှုကြောင့် ဖမ်းဆီးအရေးယူမှုတွေ ဖြစ်ခဲ့ပြီးနောက် အလုပ်သမားဝန်ကြီးက သတိပေးခဲ့တာလို့လည်း AAC အလုပ်သမား ကူညီရေးအဖွဲရဲ့ပြောခွင့်ရှိသူ ကိုရဲမင်းက ပြောပါတယ်။
"တဦးကို ဘတ်ငွေ ၁၇,၀၀၀ ကနေ ၁၈,၅၀၀ လောက်ထိ ကြိုတင်ကောက်ခံပြီးတော့ တချို့ကျတော့ ဗီဇာလောက်ပဲ တိုးပေးတယ်။ work permit မလုပ်ပေးဘူး။ တချို့ကတော့ ဘာမှကို လုပ်မပေးဘူး။ အဲဒါမျိုးတွေ လုပ်ကြတာပေါ့နော်။"
ထိုင်းအလုပ်သမားဝန်ကြီးကတော့ အခုလို လိမ်လည်မှုတွေ လုပ်နေတဲ့ ပွဲစားတွေအနေနဲ့ အရေးယူခံရမယ်ဆိုရင် ထောင်ဒဏ် ၃ နှစ်ကနေ ၁၀ နှစ်အထိ အရေးယူခံရမှာဖြစ်သလို့ ငွေဒဏ်ကလည်း ဘတ် ၆၀၀,၀၀၀ ကနေ ၁,၀၀၀,၀၀၀ အထိ ဒဏ်ငွေရိုက်နိုင်တဲ့ ဥပဒေရှိတယ်လို့လည်း သတိပေးခဲ့ပါတယ်။
အလုပ်သမားတွေကို လိမ်လည်မှုတွေကြောင့် ကိုဗစ်ကာလမှာ အရေးယူဆောင်ရွက်ရတဲ့ ပွဲစားတွေအများအပြား ရှိခဲ့သလို ပြီးခဲ့တဲ့နှစ်ကုန်ကနေ ဒီလပိုင်းအထိအလုပ်သမားဆိုင်ရာ ဥပဒေတွေ ချိုးဖောက်လို့ အရေးယူခဲ့တဲ့ အလုပ်ရှင်ပေါင်း ၁,၅၆၉ ဦးနဲ့ လိမ်လည်မှုနဲ့ ပတ်သက်နေတဲ့ အလုပ်သမားပေါင်း ၁,၉၅၅ ဦး ရှိခဲ့တယ်လို့လည်း ထိုင်းအာဏာပိုင်တွေက ပြောပါတယ်။ မြန်မာနိုင်ငံသား အများစုအပါအဝင် ထိုင်းနိုင်ငံမှာ ပွဲစားတွေနဲ့ ဗီဇာတုံးအတုတွေနဲ့ ဖမ်းမိသူနိုင်ငံခြားသားအလုပ်သမား ၁,၄၇၀ ဦး ကိုလည်း နေရပ်ပြန်ပို့ခဲ့တယ်လို့ ပြောဆိုထားပါတယ်။
မအေးအေးမာ/VOA (Burmese)
https://burmese.voanews.com/a/thai-myanmar-migrant/5632808.html
Reviewed by THITHTOOLWIN
on
18:55
Rating:
No comments:
Post a Comment