ကိုဗစ်ကာကွယ်ဆေးတမျိုး ရုရှားအတည်ပြု

Gamaleya Institute ထုတ်လုပ်တဲ့ COVID 19 ကာကွယ်ဆေး။ (သြဂုတ် ၀၆၊ ၂၀၂၀)

ရုရှားနိုင်ငံဟာ ကမ္ဘာမှာ COVID 19 ရောဂါကာကွယ်ဆေးကို ပထမဆုံး တရားဝင် အတည်ပြုထုတ်လုပ်နိုင်တဲ့ နိုင်ငံဖြစ်တယ်လို့ ရုရှား သမ္မတ Vladimir Putin က ပြောပါတယ်။ ဒီကနေ့ အင်္ဂါနေ့မှာ ရုရှား အစိုးရ ဝန်ကြီးတွေနဲ့ ပြုလုပ်နေတဲ့ အစည်းအဝေးကို ရုပ်မြင်သံကြားကနေ တိုက်ရိုက် ထုတ်လွှင့်နေချိန်မှာ သမ္မတ Putin က အခုလို ကြေညာလိုက်တာပါ။

မော်စကိုမြို့က Gamaleya Institute ထုတ်လုပ်တဲ့ COVID 19 ကာကွယ်ဆေးက လိုအပ်တဲ့ စမ်းသပ်မှု အဆင့်ဆင့် ပြုလုပ်ထားပြီး ထိရောက်မှုရှိကြောင်းနဲ့ ရောဂါပိုးကို တိုက်ဖျက်နိုင်တဲ့ ကိုယ်ံစွမ်းအားကို တာရှည်ဖြစ်ပေါ်စေနိုင်ကြောင်း သမ္မတ Putin ကပြောပါတယ်။ ဒီဆေးကို မကြာခင် အမြောက်အမြား ထုတ်လုပ်နိုင်မယ်လို့ မျှော်လင့်ကြောင်းလည်း သူက ပြောပါတယ်။ ဒါပေမဲ့ ကမ္ဘာ့ကျန်းမာရေး အဖွဲ့ WHO အပါအဝင် တခြား ဆေးသိပ္ပံအဖွဲ့အစည်းတွေက ဒီကာကွယ်ဆေးနဲ့ ပတ်သက်လို့ သီးခြား အတည်ပြုပြောဆိုတာတော့ မရှိသေးပါဘူး။

သိပ္ပံပညာရှင်တွေကတော့ ကာကွယ်ဆေး စမ်းသပ်မှုတွေကို လုပ်ဖို့ လူ ထောင်ပေါင်း များစွာနဲ့ လနဲ့ ချီပြီး အချိန်ယူရတာမို့ အခုလို ရုရှားနိုင်ငံက အလောတကြီး ကာကွယ်ဆေးအသုံးပြုဖို့ ပြင်ဆင်နေတဲ့ အပေါ် သတိပေးနေကြပါတယ်။

ဥရောပတလွှား ကိုရိုနာဗိုင်းရပ်စ် ကူးစက်မှုတွေဆက်ပြီးဖြစ်နေတဲ့ကြားကပဲ အစိုးရတွေအနေနဲ့ အသွားအလာတားမြစ်ချက်တွေကို ဖြေလျော့ပေးနေသလို နောက်ထပ်ကူးစက်မှု အသစ်တွေဖြစ်လာနိုင်တဲ့ သတိပေးချက်တွေကိုလည်း ထုတ်ပြန်နေပါတယ်။

ကူးစက်မှု အသစ်တွေက နိုင်ငံခြားခရီးသွားတွေနဲ့ အပြင်ထွက် သွားလာနေကြတဲ့ လူငယ်တွေဆီက ဖြစ်ပါတယ်။ အသွားအလာတွေ ကန့်သတ်ထားတာကို စိတ်မရှည်ကြတဲ့ လူငယ်တွေကြား ကမ်းခြေသွားတာ၊ လူစုလူဝေးလုပ်တာ၊ ပါတီပွဲတွေသွားတာတွေကနေတဆင့် ဥရောပမှာ အသက် ၂၀ နဲ့ ၃၀ ကြား လူငယ်တွေကြား ကူးစက်မှုနှုန်း မြင့်တက်နေတဲ့ ပြဿနာနဲ့ ကြုံနေရတာဖြစ်ပါတယ်။

VOA (Burmese)

https://burmese.voanews.com/a/russia-covid-vaccine/5538967.html