ဧရာဝတီမြစ်ရေတက်လို့ ညောင်ဦးဘက်မှာ ရွှေ့ပြောင်းကြရ

မန္တလေးတိုင်းဒေသကြီး ညောင်ဦးမြို့ ဧရာဝတီမြစ်ကမ်းဘေးက နေအိမ်အတွင်းရှိ ပစ္စည်းများကို ကူညီ ရွှေ့ပြောင်းပေးနေတဲ့အရန်မီးသတ်တပ်ဖွဲ့ဝင်များ။ (ဓာတ်ပုံ - Myanamr Fire Services Department - ဇူလိုင် ၃၁၊ ၂၀၂၀)

ဧရာဝတီမြစ်ရေ စိုးရိမ်ရေမှတ် ကျော်လွန်လာနေပြီး ညောင်ဦးဘက်မှာ ရွှေ့ပြောင်းနေကြရသလို ကျန်တဲ့ဒေသတွေက မြစ်ဘေးနားနေသူတွေလည်း သတိထားကြဖို့ နှိုးဆော်နေတဲ့ အကြောင်း ဗွီအိုအေမြန်မာပိုင်းသတင်းထောက် မဆုမွန်က ပြောပြထားပါတယ်။

ဒီသီတင်းပတ်အတွင်းမှာ ကပ္ပလီပင်လယ်ပြင်နဲ့ ဘင်္ဂလားပင်လယ်အော်တောင်ပိုင်းမှာ မုတ်သုံလေအား အလွန်ကောင်းနေတဲ့ အတွက် မြစ်ဝကျွန်းပေါ်အပါအဝင် ဧရာဝတီတိုင်း၊ ပဲခူးတိုင်း၊ တနင်္သာရီတိုင်း၊ မွန်ပြည်နယ်၊ ကရင်ပြည်နယ်စတဲ့ ပြည်နယ်တိုင်း အတော်များများမှာ မိုးရေချိန်မြင့်ပြီး နေရာအနှံ့အပြား မိုးများရေကြီးမှုတွေ ဖြစ်နေပါတယ်။ ဒါကြောင့် မြစ်ရေ အတော်များများ စိုးရိမ်ရေမှတ် အထက်ကို မြင့်တက်လာနေပြီး ဧရာဝတီမြစ်ရေနဲ့ ချင်းတွင်းမြစ်ရေက စိုးရိမ်ရေမှတ်ကို ကျော်လွန်နေတဲ့ အနေအထားဖြစ်တာကြောင့် မြစ်ရေဝင်ရောက်လာလို့ မြစ်ကမ်းနားဘေးနေပြည်သူတချို့ ရေဘေးလွတ်ရာကို တိမ်းရှောင်နေကြရပါတယ်။

နိုင်ငံတဝန်းက မြစ်တွေရဲ့ နောက်ဆုံးအနေအထားကိုတော့ မိုးလေဝသနဲ့ ဇလဗေဒညွှန်ကြားမှုဦးစီးဌာန ညွှန်ကြားရေးမှူးချုပ် ဦးကျော်မိုးဦးက ဗွီအိုအေမြန်မာပိုင်းကို ရှင်းပြပါတယ်။

"လက်ရှိ ဧရာဝတီမြစ်ဘက်မှာတော့ စိုးရိမ်ရေမှတ်ကို ရောက်နေတာကတော့ ညောင်ဦးပေါ့နော်။ ညောင်ဦးကတော့ ဒါ စိုးရိမ်ရေမှတ်အထက်မှာ ၂၆ စင်တီမီတာလောက်ရှိပါတယ်။ ဒီနှစ်ရက်လောက်အထိကို စိုးရိမ်ရေမှတ်အထက်ကို ဆက်ရှိနေပါမယ်။ နောက်တခုကတော့ ဆိပ်သာပါ ဆိပ်သာကတော့ စိုးရိမ်ရေမှတ်အထက်မှာ ၁၂ စင်တီမီတာအထက်ရှိနေတယ်။ သူ့ရဲ့ အထက်စခန်းတွေဖြစ်တဲ့ မင်းဘူးတို့ မကွေးတို့က ရေဆက်တက်နေတုန်းဖြစ်တဲ့အတွက် နောက် ၃ ရက်အတွင်း ဆက်တက်လာနိုင်တဲ့ အနေအထားရှိပါတယ်။ နောက်တခုက ဧရာဝတီဘက်က ဟင်္သာတပါ သူကတော့ ဒီနေ့ခင်းမှာပဲ စိုးရိမ်ရေမှတ်အထက်ရောက်သွားတဲ့ အနေအထားမှာရှိတယ်။ သူကလည်း နောက် ၃ ရက်အတွင်းမှာ ၁ ပေလောက် စိုးရိမ်ရေမှတ်အထက်ကို ဆက်တက်လာနိုင်တဲ့ အနေအထားမျိုးမှာရှိပါတယ်။

ဧရာဝတီ ဇလွန်ဘက်ကတော့ စိုးရိမ်ရေမှတ်အထက်ရောက်ဖို့ ၂ စင်တီမီတာလောက်ပဲလိုပါတော့တယ်။ ဒီညနေပိုင်းလောက်ဆိုရင်တော့ စိုးရိမ်ရေမှတ်အထက်ရောက်သွားမယ့်အနေအထားမျိုးဖြစ်ပါတယ်။ ဧရာဝတီမြစ်မှာ ရေတွေ တက်လာတာကတော့ အထက်ပိုင်းက မိုးများခဲ့တဲ့ရေတွေက အောက်ပိုင်းကို ဆင်းလာတဲ့အနေအထားကြောင့် ဧရာဝတီမြစ်ရေ တက်လာတဲ့အနေအထားပါ။ နောက် ငဝန်မြစ်နဲ့ ငါးသိုင်းချောင်းကလည်း စိုးရိမ်ရေမှတ်အထက်ကိုရောက်ဖို့အတွက်ကို ပေဝက်လောက်ပဲ လိုပါတော့တယ်။ နောက် ၃ ရက်အတွင်း စိုးရိမ်ရေမှတ်ရောက်နိုင်တဲ့ အနေအထားပါ။ စစ်တောင်းမြစ်တို့ ရွှေကျင်မြစ် ပဲခူးမြစ်တို့ သံလွင်မြစ်တို့ ကျန်တဲ့မြစ်တွေကတော့ စိုးရိမ်ရေမှတ်အထက်ကို ရောက်ဖို့ လိုသေးတယ်ခင်ဗျ။"

(ဓာတ်ပုံ - Department of Meteorology and Hydrology (MYANMAR) - ဇူလိုင် ၃၁၊ ၂၀၂၀)

မိုးဇလညွှန်ချုပ်ပြောပြခဲ့သလိုပါပဲ အခုလက်ရှိမှာတော့ ဧရာဝတီမြစ်ရေ စိုးရိမ်ရေမှတ်အထက်ကိုရောက်နေတဲ့ ညောင်ဦးဘက်မှာတော့ ဧရာဝတီမြစ်ရေ ဝင်လာတဲ့အတွက်မြစ်ကမ်းနဘေးနေပြည်သူအနည်းဆုံး ၂၀၀ ကျော် အိမ်ထောင်စု ၅၇ စုလောက် သူတို့ရဲ့ လယ်ယာသုံး နွားတွေ၊ မြင်းတွေပါ ခေါ်လာပြီး ရေဘေးကယ်ဆယ်ရေးစခန်းတွေမှာ ယာယီ ခိုလှုံနေကြရပါတယ်လို့ ပြန်ကြားရေးက သတင်းထုတ်ပြန်ထားပါတယ်။

ဧရာဝတီမြစ်ရေမြင့်တက်လာပြီး ညောင်ဦးက ကမ်းပါးတွေ ပြိုကျလာတဲ့ အန္တရာယ်ကြောင့် အဲ့ဒီ့မှာနေတဲ့ ညောင်ဦးဒေသခံတွေ အရေးပေါ်ပြောင်းရွှေ့နေကြရတဲ့ အနေအထားကို ပုဂံမြို့ခံ ကိုမင်းမင်းဦးက သူသိထားသလောက်ပြောပြပါတယ်။

"ကျွန်းတွေက ဧရာဝတီမြစ်လည်ခေါင်မှာ ရွာလေးတွေ ရှိပါတယ်။ ကြောက်ရတာက ကျွန်းထဲက ရွာတွေပဲ ကြောက်ရတာ။ အဲ့ဒီ့ရွာတွေမှာ ကမ်းပါးတွေပြိုတာ မပြိုတာကြည့်နေကြရတယ် အခု ရွာတရွာတော့ပြိုနေတယ်။ အခု အနောက်သီရိရွာက ပြိုနေတယ်။ သူက ပုဂံမြို့သစ်ရဲ့ အနောက်ဘက်တည့်တည့် ဧရာဝတီမြစ်အလည်ခေါင်က ကျွန်းပေါ့။ အဲ့ဒီ့ရွာမှာတော့ ဘုန်းကြီးကျောင်းတွေဖျက်၊ အိမ်တွေဖျက် ရွှေ့နေကြတယ်။ ဘာဖြစ်လို့ဆိုတော့ ကမ်းပါးတွေ ပြိုကျနေလို့ အဲ့တာတော့တွေ့ရတယ် အဲ့ဒီ့က နေတဲ့သူတွေက ပုဂံမြို့ပေါ်မှာလည်းနေတယ်။ အဲ့ဒီ့ကျွန်းလေးတွေထဲမှာလည်းနေကြတယ်။ လွန်ခဲ့တဲ့ ၂ နှစ်လောက်က သီရိရွာက တခြမ်းပါသွားတာ ဘုရားကြီးတောင် မျောပါသွားတယ်။ ကမ်းပါးပြိုလို့ပေါ့နော်။ အဲ့ဒီ့ကမ်းပါးပြိုလို့ ဘုရားကြီးရေထဲပါသွားတဲ့ရွာပဲ တခြမ်းကျန်ခဲ့တဲ့ရွာက ဒီနှစ်မှာ ထပ်ပြီးပြိုလို့ သူတို့က အခုလူတွေကို ဘေးလွတ်ရာကို ပြောင်းကြရွှေ့ကြရတာပေါ့လေ။ ဧရာဝတီမြစ်ရေကြီးလာပြီဆို ဧရာဝတီမြစ်ရေလည်ခေါင်က ရွာတွေ အကုန်ရွှေ့ကြရတယ်။ ဒါကြောင့် ညောင်ဦးဘက်မှာ အကွက်စိတ်လေးတွေရိုက်ပြီး ကျွန်းထဲကသူတွေ မြို့ပေါ်တင်ပေးလိုက်ရတာ။"

မန္တလေးတိုင်းဒေသကြီး ညောင်ဦးမြို့ ဧရာဝတီမြစ်ကမ်းဘေးက နေအိမ်အတွင်းရှိ ပစ္စည်းများကို ကူညီ ရွှေ့ပြောင်းပေးနေတဲ့အရန်မီးသတ်တပ်ဖွဲ့ဝင်များ။ (ဓာတ်ပုံ - Myanamr Fire Services Department - ဇူလိုင် ၃၁၊ ၂၀၂၀)

မြစ်ရေစိုးရိမ်ရေမှတ်တွေ ရောက်လာချိန် မြစ်ကမ်းနားဘေးနေပြည်သူတွေ မိုးလေဝသတင်းနဲ့ မြစ်ရေသတင်းတွေကို စဉ်ဆက်မပြတ် သတိထားကြဖို့နဲ့ အထူးသဖြင့် ကမ္ဘာ့ကပ်ရောဂါ ကိုဗစ် ၁၉ ဖြစ်ပွားနေချိန်မှာ ရေဘေးရှောင်ပြည်သူတွေအနေနဲ့ရောဂါကူးစက်မှု မရှိအောင် ကျန်းမာရေး ကာကွယ်မှုတွေ ဂရုတစိုက် ကြဖို့ကိုလည်း မိုးဇလညွှန်ကြားရေးမှူးချုပ်က အထူးသတိပေးပါတယ်။

"အဓိကကတော့ မြစ်ကမ်းနားဘေးနေပြည်သူတွေ အထူးသတိထားကြပါ မိမိတို့နေတဲ့နေရာတွေက မြစ်ရေတွေ စိုးရိမ်ရေမှတ်ရောက်လာပြီဆိုရင် ရေဘေးကင်းတဲ့နေရာတွေကို အမြန်ဆုံးရှောင်နိုင်အောင် ကြိုတင်ပြင်ဆင်ပါ။ မြစ်ရေတွေဝင်လာပြီ စိုးရိမ်ရေမှတ်ကိုရောက်လာပြီဆိုရင် သက်ဆိုင်ရာ သဘာဝဘေးကာကွယ်ရေးအဖွဲ့တွေရဲ့ လမ်းညွှန်ချက်တွေအတိုင်း လိုက်နာဆောင်ရွက်ပေးပါ လိုက်နာဆောင်ရွက်တဲ့နေရာမှာလည်း ရေဘေးကာကွယ်ရေးစခန်းတွေမှာ အရင်တုန်းကတော့ စခန်းတွေမှာသွားနေတယ်ဆိုရင် ပြဿနာက အများကြီးမရှိခဲ့ဘူး။ ဒါပေမဲ့ အခုဒီကာလက COVID 19 ကာလဖြစ်နေတဲ့အချိန်ဆိုတော့ ကျန်းမာရေးနဲ့ဆိုင်တဲ့ အသိပညာတွေ ဗဟုသတတွေ ရှိဖို့ အထူးလိုပါတယ်။ အဲ့ဒီ့အတွက် သဘာဝဘေးကာကွယ်ရေးအဖွဲ့တွေက ကျန်းမာရေးဆိုင်ရာဝန်ထမ်းတွေရဲ့ လမ်းညွှန်မှုတွေကိုလည်း လိုက်နာဆောင်ရွက်သင့်ပါတယ်။"

အခုဆိုရင်တော့မြစ်ရေစိုးရိမ်ရေမှတ်အထက်နဲ့ စိုးရိမ်ရေမှတ်ရောက်လာပြီဆိုရင် မြစ်ကမ်းနဘေးနေပြည်သူတွေ ရေဘေးအန္တရာယ် သတိထားကြဖို့ ရပ်ကွက်ကျေးရွာတွေထဲ သက်ဆိုင်ရာအုပ်ချုပ်ရေး တာဝန်ရှိသူတွေနဲ့ မီးသတ်တပ်ဖွဲ့ဝင်တွေ ကူညီကယ်ဆယ်ရေး အဖွဲ့တွေကလည်း လိုက်လံနှိုးဆော်သတိပေးနေကြပြီး ဧရာဝတီမြစ်ရေဝင်ရောက်လာနိုင်မယ့် နေရာတွေကိုလည်း ရေထိန်းတံခါးတွေ အရေးပေါ်ရေတားစောင့်ကြည့်မှုတွေနဲ့ ကာကွယ်ဆောင်ရွက်နေကြပါတယ်။

မဆုမွန်  / ဗွီအိုအေ ( မြန်မာပိုင်း)
https://burmese.voanews.com/a/nyaung-oo-ayeyarwaddy-flood/5525171.html