မွေးမြူရေး၊ ရေလုပ်ငန်းနှင့် ကျေးလက်ဒေသ ဖွံ့ဖြိုးရေး ၀န်ကြီးဌာန၏ သတင်းထုတ်ပြန် ကြေညာချက်အား ကန့်ကွက် ခြင်း

၁။       မွေးမြူရေး၊ ရေလုပ်ငန်းနှင့် ကျေးလက်ဒေသ ဖွံ့ဖြိုးရေး ၀န်ကြီးဌာန ၏ ၉-၄-၂၀၁၅  ထုတ် နိုင်ငံပိုင် သတင်းစာများပါ သတင်းထုတ်ပြန် ကြေညာချက်မှာ မှားယွင်းနေပါသဖြင့် သက်ဆိုင်သူ ကျွန်တော် ဦးဆလိုင်းခွဲယန်က ကိုယ်တိုင်ကန့်ကွက်ပါသည်။

၂။       သတင်းထုတ်ပြန် ကြေညာချက်တွင် ဖော်ပြ သကဲ့သို့ အမျိုးသား လွှတ်တော်တွင် ၈-၄- ၂၀၁၅ နေ့၌ ပြည်သူ့ငွေစာရင်း ပူးပေါင်းကော်မတီ အစည်းအဝေး ကျင်းပခြင်းလည်း လုံးဝမရှိပါ။ အမျိုးသား လွှတ်တော်တွင် ပြည်သူ့ ငွေစာရင်း ပူးပေါင်းကော်မတီ ဟူ၍ဖွဲ့စည်းထားခြင်း လည်းမရှိပါ။  ပြည်သူ့ငွေစာရင်း ကော်မတီသာ လျှင်ရှိပါသည်။

၃။       ၈-၄-၂၀၁၅ ရက် အမျိုးသားလွှတ်တော် အစည်းအဝေး၌သာ လုပ်ငန်းဆောင်ရွက်မှုမပြီးစီး
သေးဘဲ သက်ဆိုင်ရာဌာနက ၁၀၀% ပြီးစီးသည်ဟူ၍  ပြည်သူ့ငွေစာရင်း ကော်မတီသို့  တင်ပြထား
သောကြောင့် ကော်မတီ၏ အစီအရင်ခံစာပါ နောက်ဆက်တွဲ (ခ-၄) ကို ထောက်ပြ ဆွေးနွေးခြင်း ဖြစ်ပါသည်။ သက်ဆိုင်ရာ ၀န်ကြီးဌာနကို အမျိုးသားလွှတ်တော် ပြည်သူ့ငွေစာရင်း ကော်မတီ၏ အစီရင်ခံစာတွင် ဖော်ပြထားပါသည်။

၎။       ပလက်ဝမြို့နယ်က ၁၀၀% မပြီးစီးသေးသော ဘေလီတံတား ကိစ္စ ဆွေးနွေးတင်ပြရာတွင် မွေးမြူရေး ၊ ရေလုပ်ငန်းနှင့် ကျေးလက် ဒေသဖွံ့ဖြိုးရေး ၀န်ကြီးဌာန ဟူ၍ ထည့်သွင်း ဆွေးနွေးခြင်း လုံးဝလုံးဝမရှိပါ။ လွှတ်တော်မှတ်တမ်း ၏ (အသံ /ဗွီဒီယို ) ဖြင့်တိုက်ဆိုင် စစ်ဆေးနိုင်ပါသည်။

၅။       ပရိုဂျက်တာဖြင့် တင်ပြသော ဓာတ်ပုံများမှာ ၄-၄-၂၀၁၅ ရက်ကာလ၏ မြေပြင်အခြေအနေ
အမှန်ကို ရိုက်ကူးထားသော မှတ်တမ်းပုံများ အစစ်အမှန်ဖြစ်ပါသည်။  မှားယွင်းစွာဖော်ပြ ဆွေးနွေးခြင်း လုံးဝ လုံးဝမဟုတ်ပါ။  မိမိ၏ ဆွေးနွေးတင်ပြမှုကို တာဝန်ယူ တာဝန်ခံပါသည်။

ဦးဆလိုင်းခွဲယန်၊  အမျိုးသားလွှတ်တော်ကိုယ်စားလှယ်၊
ချင်းပြည်နယ် မဲဆန္ဒနယ်အမှတ်(၁၂)၊ ပလက်ဝမြို့နယ်