အနည်းဆုံးအခကြေးငွေနှုန်းထားတွင် အလုပ်ရှင်၊ အလုပ်သမား တောင်းဆိုချက် ကွာဟလျက်ရှိ

အနည်းဆုံးအခကြေးငွေနှုန်းထား ပြဋ္ဌာန်းနိုင်ရန် မြေပြင်ကွင်းဆင်းစစ်တမ်းကောက်ခံရာတွင် အလုပ်ရှင်အလုပ်သမား တောင်းဆိုဖော်ပြချက်များနှင့် ကွာဟလျက်ရှိကြောင်း မြန်မာဖွံ့ဖြိုးမှုအရင်းအမြစ်အဖွဲ့ (MDRI) အကြီးတန်းသုတေသနပညာရှင် ဒေါက်တာအောင်သူငြိမ်းက ပြောကြားသည်။

ပြီးခဲ့သည့် ဇူလိုင် ၁၂ ရက်က အနည်းဆုံးအခကြေးငွေဥပဒေ ထုတ်ပြန်ခဲ့ပြီးနောက် ခေတ်ကာလနှင့်လျော်ညီသည့် နှုန်းထားသတ်မှတ်နိုင်ရန် အစိုးရက ပညာရှင်များနှင့် ပူးပေါင်း၍ မြေပြင်ကွင်းဆင်းလေ့လာမှုများကို အောက်တိုဘာလပိုင်းက စတင်ကာလုပ်ဆောင်ခဲ့သည်။ ထိုသို့ ကွင်းဆင်းလေ့လာမှုတွင် လက်ရှိ လုပ်သားများရရှိနေသည့် လုပ်ခလစာနှင့် အသုံးစရိတ်တို့ကို အသေးစိတ်ရရှိရန် ဆန္ဒပြမှုအများဆုံးဖြစ်ပွားလျက်ရှိသည့် အဓိကမြို့သုံးမြို့ဖြစ်သော ရန်ကုန်၊ မန္တလေးနှင့် ပဲခူးကို နှစ်လကျော်ကြာ ဦးစားပေးစစ်တမ်းကောက်ခံခဲ့သည်။

အဆိုပါစစ်တမ်းကောက်ခံမှု ရလဒ်တို့ကို နိုင်ငံတကာအဖွဲ့အစည်းဖြစ်သည့် ကုလသမဂ္ဂအဖွဲ့အစည်းများနှင့် အပြည်ပြည် ဆိုင်ရာအလုပ်သမားအဖွဲ့ချုပ် (ILO) တို့ထံ ယခုလဆန်းပိုင်းက တင်ပြထားပြီး အကြံပြုချက်များကို ရယူသွားမည်ဖြစ်သည်။ ထိုသို့ ရရှိလာမည့် အကြံပြုချက်များအပေါ် လေ့လာသုံးသပ်ပြီးပါက အနည်းဆုံးအခကြေးငွေနှုန်းထား သတ်မှတ်ရေး အမျိုးသားကော်မတီအဖွဲ့သို့ တင်ပြသွားမည်ဖြစ်ကြောင်း သတင်းရရှိသည်။

““တချို့လုပ်သားတွေရဲ့ ကုန်ကျစရိတ်အပိုင်းတော့ တွက်ချက်ပြီးသွားပြီ။ ကုန်ကျစရိတ် နှုန်းထားပိုင်းတော့ မပြောသေးဘူး။ အငြင်းပွားမှုတွေ ဖြစ်လာမှာစိုးတယ်။ သူတို့တောင်းဆိုတဲ့ နှုန်းထားနဲ့တော့ ကွာခြားမှုရှိတာတော့ တွေ့ရတယ်””ဟု ဒေါက်တာအောင်သူငြိမ်းကပြောသည်။

လက်ရှိတွင် အနည်းဆုံးအခကြေးငွေနှုန်းထားအပေါ် အလုပ်သမားများက တစ်ရက်လျှင် အနိမ့်ဆုံးငွေ ကျပ် ၅၆၀၀ မှ ၇၀၀၀ ထိ ပေးရန် တောင်းဆိုဆန္ဒပြုလျက်ရှိသော်လည်း အလုပ်ရှင်ဘက်က ၎င်းတုိ့ကို ငွေကျပ် နှစ်ထောင်ထိသာ ပေးနိုင်ကြောင်း အပြန်အလှန်ပြောဆိုဆွေးနွေးလျက် ရှိသေးသည်။

ယင်းစစ်တမ်းကောက်ခံရာတွင် အငြင်းပွားမှုအများဆုံးဖြစ်ပွားလျက်ရှိသည့် လုပ်ခစား (CMP) လုပ်ငန်းမှ အလုပ်သမားများကို အဓိကထား၍ ကောက်ခံခဲ့ပြီး အဆိုပါကောက်ခံရရှိခဲ့သည့် နှုန်းထားများ အမျိုးသားကော်မတီအဖွဲ့သို့ ရောက်ရှိရန် အချိန် ကြန့်ကြာဦးမည်ဖြစ်သည်။

အရပ်သားအစိုးရလက်ထက်တွင် လုပ်ခလစာ နည်းပါးစွာရရှိသည့်အပြင် အလုပ်သမားအခွင့်အရေး နစ်နာလျက်ရှိသော စက်မှုဇုန်ရှိ အလုပ်သမားများသည် ၎င်းတို့ရပိုင်ခွင့်များကို အလုပ်ရှင်ထံ တိုက်ရိုက်တောင်းဆိုမှုများ ပြုလုပ်လာခဲ့ကြသည်။ ထို့နောက် အလုပ်ရှင်၊ အလုပ်သမား အငြင်းပွားမှုများဖြစ်ပွားလာခဲ့ပြီး ဆန္ဒပြတောင်းဆိုမှုများ ဆက်တိုက်ဖြစ်ပေါ်ခဲ့သည်။

Author:  အေးမြတ်သူ

7day Daily