အမျိုးသားဒီမိုကရေစီအဖွဲ့ချုပ်ကိုအားပေးတာ ဒေါ်အောင်ဆန်းစုကြည်ကိုအားပေးတာနဲ့ အတူတူပဲ

၂၀၁၂ခုနှစ် ဖေဖ၀ါရီလ (၅)ရက်နေ့ ၊ မန္တလေးတိုင်းဒေသကြီး၊ မဟာအောင်မြေမြို့နယ် အမျိုးသားဒီမိုကရေစီအဖွဲ့ချုပ်၏ မဟာအောင်မြေမြို့နယ်ရုံးခွဲဖွင့်ပွဲအခမ်းအနားတွင် အန်အယ်ဒီအဖွဲ့ချုပ်၏ နာယကကြီးတဦးဖြစ်သော ၊ သတင်းစာဆရာကြီး ဦးဝင်းတင်မှ အမျိုးသားဒီမိုကရေစီကို အားပေးခြင်းသည် ဒေါ်အောင်ဆန်းစုကြည်အား အားပေးခြင်းနှင့် အတူတူပင် ဖြစ်ကြောင်း မြို့ခံလူထုကိုပြောကြားခဲ့ပြီး အန်အယ်ဒီကိုယ်စားလှယ်များနှင့် မိတ်ဆက်ပေးခဲ့သည်။

အဆိုပါ အခမ်းအနားတွင် သတင်းစာဆရာကြီးဦးဝင်းတင်မှ လာရောက်ကြည့်ရှု့အားပေးသော
ပြည်သူလူထုအား နှုတ်ဆက်မိန့်ခွန်းပြောကြားပြီး မဟာအောင်မြေမြို့နယ်မှ
ဝင်ရောက်အရွေးခံမည့် ဦးအုန်းကြိုင်အား ပရိတ်သတ် နှင့် မိတ်ဆက်ပေးခဲ့သည်။

“ အမျိုးသားဒီမိုကရေစီအဖွဲ့ချုပ်ကိုအားပေးရင်ဒေါ်အောင်ဆန်းစုကြည်ကိုအားပေးတာနဲ့ အတူတူပဲ ၊ ဦးအုန်းကြိုင်ကို မဲပေးရင်ဒေါ်အောင်ဆန်းစုကြည်ကို မဲပေးတာနဲ့ အတူတူပဲ။ ဦးအုန်းကြိုင်ဟာ
ထိုးစစ်ဆင်မဲ့ လူမျိုးဖြစ်တယ်” ဟု ဦးဝင်းတင်မှ လူထုကို ပြောကြားသည်။

အမျိုးသားဒီမိုကရေစီအဖွဲ့ချုပ်ရုံးခန်းကို ၄၁လမ်း ၊ ၈၁လမ်းနှင့် ၈၂လမ်းကြားတွင် ဖွင့်လှစ်ခဲ့ခြင်းဖြစ်ပြီး ဖွင့်ပွဲအခမ်းအနားသို့ မဟာအောင်မြေမြို့နယ်ကိုယ်စားပြုယှဉ်ပြိုင် အရွေးခံမည့်
ဒီလှိုင်းဂျာနယ်တာဝန်ခံ ဦးအုန်းကြိုင် ၊မန္တလေးတိုင်းအမျိုးသားဒီမိုကရေစီအဖွဲ့ချုပ်ဥက္ကဌ ဦးသိန်းတန်နှင့်မစိုးရိမ်တိုက်သစ်ကျောင်းမှ ဆရာတော် ဦးဝီရသူတို့တက်ရောက်ကာ
နံနက်(၉)နာရီတွင် ဖဲကြိုးဖြတ်ဖွင့်လှစ်ပေးခဲ့သည်။

“ ကျွန်တော်ဟာ ဟိုးအရင်က ဟံသာဝတီသတင်းစာခေတ်ကတည်းက
ကျွန်တော့်ဆရာလဲ ဖြစ်တဲ့ဦးဝင်တင်နဲ့အတူ ကျွန်တော် မန္တလေးကိုရောက်ခဲ့တာပါ
၊ ၁၀နှစ်လောက်နေခဲ့တော့ မန္တလေးမြို့ကလူ တွေက ကျွန်တော့်ကို
မန္တလေးသားတစ်ယောက်လိုပဲမှတ်ထားတော့တယ်။ မဲဆွယ်စည်းရုံးရေးကာလကြရင်
ပြန်တွေ့ကြပါမယ် ” ဟုဦးအုန်းကြိုင်က ပြောကြားသည်။

အဆိုပါမဟာအောင်မြေမြို့နယ် အမျိုးသားဒီမိုကရေစီရုံးခန်းဖွင့်ပွဲနှင့်
ဆိုင်းဘုတ်တင်အခမ်းအနားသို့ အမျိုးသား ဒီမိုကရေစီပါတီဝင်များနှင့်
မန္တလေးမြို့သူမြို့သားများတက်ရောက်ခဲ့ကြသည်။

မင်းမင်းလတ်(ရွှေမြစ်မခ-မန္တလေး)