ဒဏ်ရိုက်သည်ကို မကျေနပ်၍ စကားများရာမှ ဓားထိုးသည် အထိ ဖြစ်ပွားခဲ့သော လူသတ်မှု နေပြည်တော် ပျဉ်းမနားတွင် ဖြစ်ပွား

မိမိထိုးလိုက်သည့် ဓားချက်ကြောင့် ဦးနီ လဲကျသွားသည့် နေရာကို တရားခံက ပြသနေစဉ်

အောက်တိုဘာလ ၁၁ ရက် နေ့က နေပြည်တော် ပျဉ်းမနားမြို့နယ်၊ ကျွန်းဦးအုပ်စု၊ မအူပင်ကျေးရွာနေ ရာအိမ်မှူး တစ်ဦးကို တစ်ရွာတည်းနေသူ တစ်ဦးက အသွား ခြောက်လက်မ ခန့်ရှိသော ဓားဦးချွန်ဖြင့် ထိုးခဲ့ရာ ဆေးရုံအသွား လမ်း၌ပင် သေဆုံးသွားခဲ့သည်ဟု သတင်း ရရှိသည်။
ညပိုင်း ၇း၃ဝ နာရီအချိန်တွင် ဖြစ်ပွားခဲ့သော အဆိုပါ လူသတ်မှု၏ အဓိက တရားခံမှာ အသက် ၅ဝ အရွယ်ရှိသော ကျပန်းလုပ်ကိုင်သူ တစ်ဦးဖြစ်သည်။ ၄င်းသည် အခင်း ဖြစ်ပွားချိန်၌ အရက်သေစာ သောက်စားထားပြီး သေဆုံးသူ ရာအိမ်မှူး ဦးနီ၏နေအိမ်သို့ လာရောက်ရမ်းကား သူလည်းဖြစ်သည်။ တရားခံ လာရောက် ရမ်းကား ချိန်၌ အသတ်ခံရသူ ရာအိမ်မှူးက သူ၏ နေအိမ်တွင် အရပ်အတွင်း မှကလေးများကို ဗီဒီယို ပြသနေချိန် ဖြစ်ကြောင်း၊ ထိုအချိန် ကလေးများအပြင် အရပ်အတွင်းမှ မိတ်ဆွေ နှစ်ဦးလည်း ဦးနီ၏ အိမ်တွင် ရောက်ရှိ နေကြောင်း၊ တရားခံ လာရောက် ရမ်းကားစဉ် အိမ်အတွင်း တစ်ဦး နှင့် တစ်ဦး တစ်ခဏတာ လုံးထွေးသတ်ပုတ် ကြသဖြင့် နေအိမ်သို့ ရောက်ရှိနေသော တစ်ရပ်တည်းနေ မိတ်ဆွေနှစ်ဦးက ဝိုင်းဝန်း ဖျန်ဖြေခဲ့ရကြောင်း သတင်းရရှိသည်။
ဖျန်ဖြေမှုအပြီး တရားခံမှာ နေအိမ်ခြံဝင်း အပြင်သို့ ထွက်သွားကာ လမ်းပေါ်မှ အော်ဟစ် စိန်ခေါ်သဖြင့် ဦးနီက ၄င်းရှိရာသို့ သွားရောက်စဉ် အသင့် ယူဆောင်လာသော အသွား ခြောက်လက်မရှိ ဓားဦးချွန်ဖြင့် ဝဲဘက်ချိုင်းအောက်မှ တစ်ဆင့် ခန္ဓာကိုယ်အတွင်းသို့ ထိုးခဲ့ခြင်း ဖြစ်သည်ဟု မျက်မြင်သက်သေတို့က နေပြည်တော် ပျဉ်းမနား ရဲစခန်းတွင် တိုင်ကြားခဲ့သည်။ တရားခံ ထိုးလိုက်သည့်ဓားသည် ဦးနီ၏ နှလုံးသို့ တိုက်ရိုက် စူးနစ်ခဲ့သဖြင့် ဦးနီမှာ နေရာ၌ ပင်လဲကျကာ စကားမပြောနိုင်သည့် အခြေ အနေ ရှိနေစဉ် မိသားစုဝင်များ နှင့် မိတ်ဆွေ နှစ်ဦးက မြင်းလှည်း ငှားရမ်းကာ ဆေးရုံသို့ ပို့ဆောင်ခဲ့သည်။ ထိုသို့ ပို့ဆောင်စဉ် ဆေးရုံအသွားလမ်း မြို့ဦးရပ်ကွက် အရောက်တွင် ဦးနီ သေဆုံးခဲ့သည် ဟု သိရသည်။
တရားခံ ဖြစ်သူသည် ၄င်း၏ သမီးဖြစ်သူအား ရာအိမ်မှူး ဦးနီက ကျပ်ငွေငါးထောင် ဒဏ်ရိုက်သည်ကို မကျေနပ်သဖြင့် ဦးနီအိမ်သို့ သွားရောက် ရမ်းကားရာမှ လုံးထွေး သတ်ပုတ်ကြပြီး မကျေနပ်သေး၍ စိန်ခေါ်ရင်း လူသတ်မှု ဖြစ်သည် အထိ ပြစ်မှုကျူးလွန် ခဲ့ခြင်းဖြစ်သည် ဟု မျက်မြင်သက်သေ တို့က ဆိုသည်။
၎င်းအမှုကို နေပြည်တော် ပျဉ်းမနား ရဲစခန်းက ပြစ်မှုပုဒ်မ-၃ဝ၂၊ (ပ)၆၃၃/၁၁ ဖြင့် အမှု ဖွင့်ထားပြီး အမှုကို စခန်းမှူး ရဲအုပ် ကျော်ဝင်း  က တာဝန်ယူ စစ်ဆေးခဲ့သည် ဟု သိရသည်။

စွမ်းရဲထွဋ်